കോഴിക്കോട് ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റും (ഐ.ഐ.എം.കെ), സെന്റർ ഫോർ മാനേജ്‌മെന്റും (സി.എം.ഡി) വിവിധ മേഖലയിൽ സഹകരിച്ച് പ്രവർത്തിക്കുന്നതിന് ധാരണയായി. കോഴിക്കോട് ഐ.ഐ.എം-ൽ നടന്ന ചടങ്ങിൽ ഐ.ഐ.എം ഡീൻ പ്രൊഫ. ജി.ശ്രീധർ, സി.എം.ഡി ഡയറക്ടറും മെമ്പർ സെക്രട്ടറിയുമായ സിഎ. ഡോ.ബിനോയ് .ജെ. കാറ്റാടിയിൽ എന്നിവർ ധാരണാപത്രം കൈമാറി.

കേരള സർക്കാർ സ്വയംഭരണ സ്ഥാപനമായ സി.എം.ഡിയുടെ പ്രവർത്തന മേഖല വിപുലീകരിക്കുന്നതിന്റെ ഭാഗമായി ദേശീയ അന്തർദേശീയ തലത്തിലുള്ള സ്ഥാപനങ്ങളുമായി സഹകരിക്കുന്നതിന്റെ ഭാഗമാണ് ധാരണാപത്രം. സാങ്കേതിക അറിവ്, വിദ്യാർഥികൾ, ഫാക്കൽറ്റി അംഗങ്ങൾ, അക്കാദമിക്ക് വിവരങ്ങൾ, സാമഗ്രികൾ എന്നിവയുടെ കൈമാറ്റം, വിഭവശേഷി പങ്കിടൽ, സഹകരണ ഗവേഷണം, സ്റ്റാർട്ടപ്പുകൾക്കുള്ള ശേഷി വർധിപ്പിക്കൽ, വിശദമായ പ്രോജക്ട് റിപ്പോർട്ട് തയ്യാറാക്കൽ, പ്രോജക്ട് മാനേജ്‌മെന്റ് കൺസൾട്ടൻസി, പരിശീലനങ്ങൾ തുടങ്ങിയവയിലും രണ്ട് സ്ഥാപനങ്ങളും യഥാസമയത്ത് സമ്മതിക്കുന്ന മറ്റ് അക്കാദമിക് കാര്യങ്ങളിലും പരസ്പരം സഹകരിച്ച് പ്രവർത്തിക്കും. അഹമ്മദാബാദിലെ എന്റർപ്രണർഷിപ്പ് ഡവലപ്പ്‌മെന്റ് ഇൻസ്റ്റിറ്റ്യൂട്ടുമായി സമീപകാലത്ത് സി.എം.ഡി ധാരണാപത്രം ഒപ്പുവച്ചിരുന്നു.

ഗവൺമെന്റുകൾ, പൊതുമേഖലാ സ്ഥാപനങ്ങൾ, എസ്.പി.വികൾ, എൻ.ജി.ഒകൾ, വ്യവസായങ്ങൾ, കോർപ്പറേറ്റുകൾ എന്നിവക്കുവേണ്ടി ഗവേഷണം, കൺസൾട്ടൻസി, പ്രോജക്ട് മാനേജ്‌മെന്റ്, പരിശീലനം, മറ്റ് സേവനങ്ങൾ എന്നിവ നൽകുന്ന കേരള സർക്കാരിന്റെ കീഴിലുള്ള ഒരു പ്രൊഫഷണൽ സ്വയംഭരണ സ്ഥാപനമാണ് സെന്റർ ഫോർ മാനേജ്‌മെന്റ് ഡവലപ്പ്‌മെന്റ് (സി.എം.ഡി). പ്രോജക്ട് മാനേജ്‌മെന്റ്, ടെക്‌നോളജി, എന്റർപ്രണർഷിപ്പ്, ഫിനാൻസ്, ഹ്യൂമൻ റിസോഴ്‌സ്, ഡാറ്റാ അനലിറ്റിക്‌സ് തുടങ്ങിയ മേഖലകളിൽ നിർണായക സാന്നിദ്ധ്യമാണ് സി.എം.ഡി. ഐ.ഐ.എം കോഴിക്കോട് ഉൾപ്പെടെ മികവിന്റെ കേന്ദ്രങ്ങളുമായുള്ള സി.എം.ഡി യുടെ സഹകരണം സംസ്ഥാനത്തിന്റെ വളർച്ചയെ സഹായിക്കുന്ന നിർണ്ണായക ചുവടുവയ്പായി മാറുമെന്ന് സി.എം.ഡി പറഞ്ഞു.