ആറ്റുകാല്‍ ഭഗവതി ക്ഷേത്രത്തില്‍ പൊങ്കാല ഉത്സവത്തോട് അനുബന്ധിച്ചുള്ള പ്രധാന ചടങ്ങുകളിലൊന്നായ കുത്തിയോട്ട വ്രതാരംഭത്തിന് ഇന്നു തുടക്കം. ഇത്തവണ 743 ബാലന്മാരാണ് കുത്തിയോട്ട വ്രതം അനുഷ്ഠിക്കുന്നത്. രണ്ടാം ഉത്സവ ദിവസമായ ഇന്നലെ ദേവീ ദര്‍ശനത്തിനായി വളരെ തിരക്കായിരുന്നു.

12 വയസ്സില്‍ താഴെയുള്ള ബാലന്മമാരാണ് കുത്തിയോട്ട വ്രതം അനുഷ്ഠിക്കുന്നത്. ക്ഷേത്ര മതില്‍ക്കെട്ടിനുള്ളില്‍ ഏഴ് ദിവസങ്ങള്‍ താമസിച്ച് 1008 നമസ്‌കാരം ദേവിക്കു മുന്‍പില്‍ പൂര്‍ത്തിയാക്കണമെന്നതാണ് അനുഷ്ഠാനം. രാവിലെ പന്തീരടി പൂജകള്‍ക്കു ശേഷം കുത്തിയോട്ട വ്രതത്തിനുള്ള ഒരുക്കങ്ങള്‍ തുടങ്ങും. 9.20 ന് കുത്തിയോട്ട വ്രതമാരംഭിക്കുന്നതാണ്.

മഹിഷാസുര മര്‍ദിനിയുടെ മുറിവേറ്റ ഭടന്മാരായാണ് കുത്തിയോട്ട ബാലന്മാരെ സങ്കല്‍പിക്കുന്നത്. ക്ഷേത്രക്കുളത്തില്‍ കുളിച്ച് ഈറനണിഞ്ഞ് ആറ്റുകാലമ്മയെ വണങ്ങിയ ശേഷം പള്ളിപ്പലകയില്‍ ഏഴ് വെള്ളിനാണയങ്ങള്‍ വച്ച് ക്ഷേത്ര മേല്‍ശാന്തിക്ക് ദക്ഷിണ നല്‍കിയാണ് വ്രതം തുടങ്ങുക.

പൊങ്കാല ദിവസം വൈകുന്നേരം കിരീടവും ആടയാഭരണങ്ങളും ധരിപ്പിച്ച് ദേവീസന്നിധിയില്‍ ബാലന്മാര്‍ക്കു ചൂരല്‍ കുത്തും. മണക്കാട് ശാസ്താ ക്ഷേത്രത്തിലേക്കുള്ള ദേവിയുടെ പുറത്തെഴുന്നള്ളത്തിന് അകമ്പടി സേവിക്കുന്നത് കുത്തിയോട്ട ബാലന്മാരാണ്. തിരികെ ക്ഷേത്രത്തിലെത്തി ചൂരല്‍ ഇളക്കുന്നതോടെ വ്രതം അവസാനിക്കുകയും ചെയ്യും.