ലഹരി വിമുക്ത സമൂഹത്തിനായുള്ള പോരാട്ടത്തിൽ മുന്നിൽ നിൽക്കേണ്ടവരാണ് എക്സൈസ് ഉദ്യോഗസ്ഥർ.
എന്നാൽ എക്സൈസ് ഉദ്യോഗസ്ഥൻ തന്നെ ലഹരിക്കടത്തിൽ പിടിയിലായാലോ.
സംഭവം സിനിമയിൽ ഒന്നുമല്ല, സത്യമാണ്.
കൊല്ലം അഞ്ചലിൽ
എം ഡി എം എയും, കഞ്ചാവുമുൾപ്പടെയുള്ള ലഹരി വസ്തുക്കളുമായി എക്സൈസ് ഉദ്യോഗസ്ഥൻ ഉൾപ്പടെയുള്ള മൂന്നഗ സംഘം പിടിയിൽ.
കിളിമാനൂർ എക്സൈസ് റേഞ്ചിലെ സിവിൽ എക്സൈസ് ഓഫീസറായ അഖിലും സുഹൃത്തുക്കളുമാണ് ലഹരി വസ്തുക്കളുമായി പിടിയിലായത്.
കൊല്ലം ജില്ലയിൽ സിന്തറ്റിക് ലഹരി മാഫിയകളുടെ സാന്നിധ്യം ശക്തമാകുന്നുവെന്ന വിവരത്തെ തുടർന്ന് കഴിഞ്ഞ ദിവസങ്ങളിൽ പോലീസ് പരിശോധനകൾ ശക്തമാക്കിയിരുന്നു.

കൊല്ലം ചവറയിൽ 200 ഗ്രാമിലേറെ എം ഡി എം എ പിടികൂടിയതിന് പിന്നാലെയാണ് ഇന്ന് ജില്ലയിയുടെ കിഴക്കൻ മേഖലയായ അഞ്ചലിൽ എക്സൈസ് ഉദ്യോഗസ്ഥനായ അഖിലും സുഹൃത്തുക്കളായ അൽസാബിത്ത്, ഫൈസൽ എന്നിവരും പിടിയിലായത്.
ഇവരിൽ നിന്നും 20 ഗ്രാം എം ഡി എം എയും 58 ഗ്രാം കഞ്ചാവും പിടിച്ചെടുത്തു.
ആറുമാസമായി ഇവർ അഞ്ചലിലെ ലോഡ്ജ് കേന്ദ്രീകരിച്ച് ലഹരിമരുന്ന് വിൽപ്പന നടക്കുന്നതായി പോലീസിന് രഹസ്യവിവരം ലഭിച്ചിരുന്നു. ഇതേത്തുടർന്ന് നടത്തിയ അന്വേഷണത്തിലാണ് കൊല്ലം റൂറൽ പോലീസിന്റെ ഡാൻസാഫ് സ്ക്വാഡും അഞ്ചൽ പോലീസും ചേർന്ന് മൂന്നുപേരെയും പിടികൂടിയത്.
അഖിലിനെയും സുഹൃത്തുക്കളെയും വിശദമായി ചോദ്യം ചെയ്യുമെന്നും ലഹരി വിൽപ്പന സംഘത്തിന് ഉന്നതരിൽ നിന്നും സഹായം ലഭിച്ചിട്ടുണ്ടോയെന്ന് പരിശോധിക്കുമെന്നും പോലീസ് പറഞ്ഞു.