ഒറ്റ രാത്രി കൊണ്ട് സ്വപ്ന സുരേഷ് പറഞ്ഞ കഥയ്ക്ക് ട്വിസ്റ്റുണ്ടാക്കി രംഗത്തെത്തിയിരിക്കുകയാണ് വിജേഷ് പിള്ള. സ്വപ്ന പറഞ്ഞ ഓരോ കാര്യത്തിനും സിനിമാ കഥപോലെ വിജേഷ് പിള്ള സമര്‍ത്ഥമായി എതിര്‍ത്തു. മാത്രമല്ല തനിക്ക് അമ്പലത്തില്‍ പോകാനാണ് താത്പര്യമെന്നും ബിജെപിക്കാരനാണെന്നും ഒക്കെ പറഞ്ഞു വച്ചു. ഇതോടെ വിജേഷ് പിള്ള സഖാക്കളുടെ കണ്ണിലുണ്ണിയായി.

സ്വര്‍ണക്കടത്ത് കേസ് പ്രതി സ്വപ്ന സുരേഷ് തനിക്കെതിരെ ഉന്നയിച്ച ആരോപണങ്ങള്‍ക്കു തെളിവുണ്ടെങ്കില്‍ പുറത്തുവിടട്ടെയെന്ന് വിജേഷ് പിള്ള വെല്ലുവിളിച്ചു. കോടതിയെ സമീപിച്ചാല്‍ തെളിവ് നല്‍കാമെന്ന സ്വപ്നയുടെ വെല്ലുവിളി ഏറ്റെടുക്കുന്നതായി വിജേഷ് അറിയിച്ചു. എനിക്കെതിരായ തെളിവുണ്ടെങ്കില്‍ സ്വപ്ന പുറത്തുവിടട്ടെ. സുരക്ഷാ പ്രശ്‌നം മൂലം വെബ് സീരീസ് ഷൂട്ട് ഹരിയാനയിലോ മറ്റോ നടത്താമെന്ന് പറഞ്ഞത് സ്വപ്നയാണ്. സ്വപ്നയുടെ പുസ്തകത്തിലെ വിവരങ്ങളായിരുന്നു വെബ് സീരീസിന് ആധാരമെന്നും വിജേഷ് പിള്ള പറഞ്ഞു.

സ്വര്‍ണക്കടത്ത് കേസുമായി ബന്ധപ്പെട്ട ആരോപണങ്ങളില്‍നിന്നു പിന്മാറാനും മുഖ്യമന്ത്രിക്കും കുടുംബത്തിനുമെതിരായ തെളിവുകള്‍ നശിപ്പിക്കാനും 30 കോടി രൂപ വാഗ്ദാനം ചെയ്തുവെന്ന സ്വപ്നയുടെ ആരോപണം വിജേഷ് നേരത്തേ തള്ളിയിരുന്നു. ഒടിടി പ്ലാറ്റ്‌ഫോമിനു വേണ്ടി വെബ് സീരീസ് നിര്‍മിക്കുന്ന കാര്യം സംസാരിക്കാനാണ് സ്വപ്നയെ കണ്ടതെന്നും സ്വപ്നയുമായി ബിസിനസ് ഇടപാട് മാത്രമാണ് നടത്തിയതെന്നുമായിരുന്നു വിജേഷിന്റെ വിശദീകരണം.

അതേസമയം, 'കെഞ്ചിര' സിനിമയുടെ സംവിധായകന്‍ മനോജ് കാനയുടെ ആരോപണങ്ങള്‍ വിജേഷ് പിള്ള നിഷേധിച്ചു. 'കെഞ്ചിര' സിനിമ കണ്ടത് വളരെക്കുറച്ച് ആള്‍ക്കാര്‍ മാത്രമാണെന്നും സിനിമ കാണാന്‍ പ്രേക്ഷകര്‍ എത്താതിരുന്നത് തന്റെ കുഴപ്പം കൊണ്ടല്ലെന്നും വിജേഷ് പിള്ള ചൂണ്ടിക്കാട്ടി. വിജേഷിന്റെ ഒടിടിയില്‍ പ്രദര്‍ശനം സുഗമമായിരുന്നില്ലെന്നും വക്കീല്‍ നോട്ടിസ് അയച്ചിട്ട് മറുപടി നല്‍കിയില്ലെന്നുമായിരുന്നു മനോജ് കാനയുടെ ആരോപണം.

അതേസമയം ഒത്തുതീര്‍പ്പിനായി സിപിഎം സംസ്ഥാന സെക്രട്ടറിയുടെ ഇടനിലക്കാരന്‍ ബന്ധപ്പെട്ടെന്ന സ്വര്‍ണ്ണക്കടത്ത് കേസിലെ പ്രതി സ്വപ്ന സുരേഷ് നടത്തിയ പുതിയ ആരോപണങ്ങള്‍ തള്ളി സിപിഎം സംസ്ഥാന സെക്രട്ടറിയേറ്റ്. സ്വപ്നയുടേത് കള്ളക്കഥയാണെന്ന് സിപിഎം പ്രസ്താവനയിലൂടെ മറുപടി നല്‍കി. സ്വര്‍ണ്ണ കടത്തില്‍ കേസ് എടുത്തത് കേന്ദ്ര ഏജന്‍സികളാണെന്നിരിക്കെ, കേസ് പിന്‍വലിക്കാന്‍ സിപിഎം വാഗ്ദാനം നല്കിയെന്നത് കല്ലുവെച്ച നുണയാണ്. കേന്ദ്ര ഏജന്‍സികളുടെ കേസില്‍ സംസ്ഥാന സര്‍ക്കാരിന് ഒന്നും ചെയ്യാനില്ലെന്നതാണ് വാസ്തവം.

എന്നിട്ടും സംസ്ഥാനം ഭരിക്കുന്ന പാര്‍ട്ടിയെന്ന നിലയില്‍ കേസ് പിന്‍വലിക്കാന്‍ വാഗ്ധാനം നല്‍കിയെന്നത് നട്ടാല്‍ മുളക്കാത്ത നുണയാണെന്നും സിപിഎം പ്രസ്താവനയിലൂടെ അറിയിച്ചു. ഇതിന്റെ പേരില്‍ പാര്‍ടിക്കും, സര്‍ക്കാരിനുമെതിരെ കള്ള പ്രചാരവേല അഴിച്ചുവിടാനാണ് പ്രതിപക്ഷ പാര്‍ടികളും, ചില മാധ്യമങ്ങളും ശ്രമിക്കുന്നത്. ചില മാധ്യമങ്ങളും പ്രതിപക്ഷവും ചേര്‍ന്ന് തയ്യാറാക്കുന്ന ഈ തിരക്കഥകളില്‍ ഇനിയും പുതിയ കഥകള്‍ കൂട്ടിച്ചേര്‍ക്കപ്പെടുമെന്നും വാര്‍ത്താക്കുറിപ്പില്‍ സിപിഎം ആരോപിച്ചു.

അതേ സമയം, തനിക്കെതിരെ ആരോപണമുന്നയിച്ച സ്വപ്നസുരേഷിനെതിരെ സാധ്യമായ എല്ലാ നിയമനടപടികളും സ്വീകരിക്കുമെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. കണ്ണൂരില്‍ പിള്ളമാരില്ലെന്ന് പരിഹസിച്ച എംവി ഗോവിന്ദന്‍ ആദ്യ മിനിട്ടില്‍ തന്നെ പൊളിഞ്ഞ് പോയ തിരക്കഥയാണിതെന്ന് പറഞ്ഞു. ജാഥ തകര്‍ക്കാനുള്ള ശ്രമത്തെ ചെറുത്ത് തോല്‍പ്പിക്കുമെന്നും എംവി ഗോവിന്ദന്‍ വാര്‍ത്താസമ്മേളനത്തില്‍ അറിയിച്ചു.

കേസില്‍ നിന്ന് പിന്‍മാറണമെന്നും മുഴുവന്‍ രേഖകളും കൈമാറണമെന്നും ആവശ്യപ്പെട്ട് കണ്ണൂര്‍ സ്വദേശിയായ വിജേഷ് പിളള എന്ന വിജയ് പിളള തന്നെ സമീപിച്ചെന്നാണ് സ്വപ്നയുടെ ആരോപണം. ഇതോടെ വിജേഷിനെ പൊക്കാന്‍ ഇഡിയും കേരളത്തിലെത്തിയാല്‍ സ്വപ്നയെപ്പൊക്കാന്‍ പോലീസും കാത്തിരിക്കുകയാണ്.