അരലക്ഷം പേര് എത്തും... കേന്ദ്ര ആഭ്യന്തരമന്ത്രി അമിത്ഷാ ഞായറാഴ്ച തൃശൂരില്; നാളത്തെ അമിത്ഷായുടെ സന്ദര്ശനം പാര്ലമെന്റ് തെരഞ്ഞെടുപ്പ് ഒരുക്കത്തിന്റെ തുടക്കമാകും; അരലക്ഷം പേരുടെ പൊതുയോഗം; താരമാകാന് ഉറച്ച് സുരേഷ് ഗോപി
കഴിഞ്ഞ തവണ എടുത്തിട്ടും എടുക്കാതെ പോയ തൃശൂരിനെ ഇത്തവണയെടുക്കാന് സുരേഷ് ഗോപി തയ്യാറാണ്. കേന്ദ്ര ആഭ്യന്തരമന്ത്രി അമിത്ഷായുടെ ഞായറാഴ്ചത്തെ തൃശ്ശൂര് സന്ദര്ശനം പാര്ലമെന്റ് തിരഞ്ഞെടുപ്പിനുള്ള മുന്നൊരുക്കത്തിന്റെ കേരളത്തിലെ തുടക്കമാകും. അമിത്ഷാ പങ്കെടുക്കുന്നത് തൃശ്ശൂര് പാര്ലമെന്റ് മണ്ഡലം നേതൃയോഗത്തിലാണ്.
തുടര്ന്നുള്ള ദിവസങ്ങളില് നിരവധി ദേശീയ നേതാക്കള് കേരളത്തിലെത്തുമെന്നും ബി.ജെ.പി. സംസ്ഥാന ജനറല് സെക്രട്ടറി എം.ടി. രമേശ് പത്രസമ്മേളനത്തില് അറിയിച്ചു. ഓരോ പാര്ലമെന്റ് മണ്ഡലത്തിലും തിരഞ്ഞെടുപ്പ് മാനേജ് മെന്റ് കമ്മിറ്റിയായി. എല്ലാ മണ്ഡലങ്ങളിലും യോഗങ്ങള് വിളിക്കും.
കേരളത്തിന്റെ ചുമതലയുള്ള പ്രകാശ് ജാവദേക്കര് എല്ലായിടത്തും സന്ദര്ശനം നടത്തുമെന്നും രമേശ് പറഞ്ഞു. അമിത്ഷായെത്തുമ്പോള് ബി.ജെ.പി. പദ്ധതിയിടുന്നത് അരലക്ഷം പേരുടെ പൊതുയോഗം സംഘടിപ്പിക്കാനാണ്. വൈകീട്ട് നാലിന് തേക്കിന്കാട് മൈതാനിയിലാണ് പൊതുയോഗം. നെടുമ്പാശ്ശേരിയില്നിന്ന് ഹെലികോപ്റ്ററില് ശോഭാസിറ്റി ഹെലിപ്പാഡില് ഒന്നരയോടെ എത്തുന്ന അമിത്ഷാ മൂന്നു പരിപാടികളിലാണ് പങ്കെടുക്കുക.
രണ്ടിന് ശക്തന്തമ്പുരാന് സ്മാരകത്തില് പുഷ്പാര്ച്ചന. ശക്തന്തമ്പുരാനെ ഇരുമുന്നണികളും വിസ്മരിക്കുകയാണെന്നും ഉചിതസ്മാരകം ഉണ്ടായില്ലെന്നും പരിപാടി വിശദീകരിച്ച എം.ടി. രമേശ് ആരോപിച്ചു. മൂന്നുമണിക്ക് ജോയ്സ് പാലസിലാണ് നേതൃയോഗം. ഇതിനുശേഷം വടക്കുന്നാഥക്ഷേത്രത്തില് ദര്ശനം നടത്തും. അതിനുശേഷമാണ് പൊതുയോഗം. പൊതുയോഗത്തിനുശേഷം കാര്മാര്ഗം നെടുമ്പാശ്ശേരിയിലെത്തുന്ന അമിത്ഷാ ഡല്ഹിയിലേക്ക് തിരിച്ചുപോകും. പത്രസമ്മേളനത്തില് അഡ്വ. കെ.ആര്. ഹരി, ജസ്റ്റിന് ജേക്കബ്, എന്.ആര്. റോഷന് എന്നിവരും പങ്കെടുത്തു.
കേരളം പിടിക്കാന് ബിജെപി നേരത്തെ തന്നെ തയ്യാറെടുപ്പ് നടത്തിയിരുന്നു. സംസ്ഥാനത്ത് ജയ സാധ്യതയുള്ള ആറ് ലോക്സഭാ മണ്ഡലങ്ങളില് ഉടന് പ്രവര്ത്തനം ശക്തമാക്കാന് ബിജെപി ദേശീയ അധ്യക്ഷന് ജെ പി നദ്ദയുടെ നിദ്ദേശം. ബൂത്ത് ഇന് ചാര്ജുമാര് മുതല് മുതിര്ന്ന നേതാക്കള് വരെ സജീവമായി വീടുകളില് കയറി ഇറങ്ങി പ്രവര്ത്തിക്കണമെന്നാണ് നിര്ദേശം നല്കിയിരിക്കുന്നത്.
കഴിഞ്ഞ സെപ്റ്റംബറില് തിരുവനന്തപുരത്ത് ചേര്ന്ന കോര് കമ്മിറ്റി യോഗത്തിലായിരുന്നു ബിജെപി ദേശീയ അധ്യക്ഷന്റെ നിര്ദേശം. മത സാമുദായിക സംഘടനകകളുടെയും റെസിഡന്സ് അസോസിയേഷനുകളുടെയും പരിപാടികളില് പങ്കെടുക്കണമെന്നും ജെ പി നദ്ദ ആവശ്യപ്പെട്ടു. മണ്ഡലത്തിന്റെ ചുമതലയുള്ള ദേശീയ നേതാക്കള് ഓരോ മാസവും നേരിട്ടെത്തി പ്രവര്ത്തനം ഏകോപിപ്പിക്കുമെന്നും അദ്ദേഹം പറഞ്ഞു. ബിജെപിയുടെ കര്മ്മ പദ്ധതി തിരുവനന്തപുരം, ആറ്റിങ്ങല്, പത്തനംതിട്ട, മാവേലിക്കര, തൃശ്ശൂര്, പാലക്കാട് എന്നീ സീറ്റുകള് ലക്ഷ്യമിട്ടാണ്.
കേരളം പിടിക്കുക എന്ന ഒറ്റ ലക്ഷ്യമാണ് ബിജെപിയുടെ ഈ കര്മ്മ പദ്ധതിയ്ക്കുള്ളത്. ഇതിനായി ഇന്നു മുതല് ആറ് മണ്ഡലങ്ങള് കേന്ദ്രീകരിച്ചുള്ള പ്രവര്ത്തനം ശക്തമായി തുടങ്ങണമെന്നാണ് നദ്ദയുടെ നിര്ദേശം. ദേശീയ തലത്തില് തയാറാക്കിയ പട്ടികയില് നിന്നും ബിജെപിക്ക് ജയസാധ്യതയുണ്ടെന്ന് വിലയിരുത്തിയ ആറ് മണ്ഡലങ്ങളിലാണ് കര്മ്മ പദ്ധതി ഇപ്പോള് നടപ്പാക്കുന്നത്.
ക്രിസ്ത്യന് ഭൂരിപക്ഷ മേഖലയായ വടക്ക് കിഴക്കന് സംസ്ഥാനങ്ങളില് നിയസഭ തിരഞ്ഞെടുപ്പില് വന് വിജയം നേടിയതിന്റെ ആത്മവിശ്വാസത്തില് കേരളത്തിലും ക്രിസ്ത്യന് വോട്ടുറപ്പിക്കാനുള്ള തന്ത്രങ്ങളുമായി ബിജെപി. മതപരിവര്ത്തന വിഷയം ഉള്പ്പെടെ ഉയര്ത്തികാട്ടിയും ക്രൈസ്തവര് ഉന്നയിക്കുന്ന വിഷയങ്ങള്ക്ക് പിന്തുണ നല്കിയും സമുദായത്തെ ഒപ്പം നിര്ത്താനുള്ള പദ്ധതികളാണ് ബിജെപി നടപ്പാക്കാന് ഒരുങ്ങുന്നത്.
https://www.facebook.com/Malayalivartha
