കണ്ണീര്ക്കാഴ്ചയായി... ടിപ്പര് ലോറിയുടെ ഹൈഡ്രോളിക് സംവിധാനം നന്നാക്കുന്നതിനിടെ, ഭാരം കയറ്റുന്ന ഭാഗം താഴേക്ക് പതിച്ച് മെക്കാനിക്കിന് ദാരുണാന്ത്യം...
അപ്രതീക്ഷിത ദുരന്തം... ഓടി വന്നവര്ക്കാര്ക്കും ഒന്നും ചെയ്യാനായില്ല. ടിപ്പര് ലോറിയുടെ ഹൈഡ്രോളിക് സംവിധാനം നന്നാക്കുന്നതിനിടെ, ഭാരം കയറ്റുന്നഭാഗം താഴേക്ക് പതിച്ച് മെക്കാനിക്കിന് ദാരുണാന്ത്യം... ചങ്ങനാശ്ശേരി മാടപ്പള്ളി വല്യവീട്ടില് വി.എന്. സന്തോഷ് (52) ആണ് ദാരുണമായി മരിച്ചത്.
എഴുമറ്റൂരിലുള്ള സ്വകാര്യവര്ക്ക് ഷോപ്പിലെ ജീവനക്കാരനായിരുന്നു അദ്ദേഹം. പുല്ലാട് വള്ളിക്കാല ജങ്ഷന് സമീപമുള്ള സ്വകാര്യ ഫാമിലെ ടിപ്പര് ലോറിയുടെ ഹൈഡ്രോളിക് തകരാറ് പരിഹരിക്കുന്നതിനിടെയാണ് അപകടമുണ്ടായത്. വെള്ളിയാഴ്ച പതിനൊന്നുമണിയോടാണ് ലോറി നന്നാക്കാനായി സന്തോഷ് എത്തിയത്.
ടിപ്പറിന്റെ ബോഡിപൊക്കുന്നതിനും താഴ്ത്തുന്നതിനുമുള്ള ഹൈഡ്രോളിക് സംവിധാനത്തിനായിരുന്നു തകരാറുണ്ടായിരുന്നത്. ഡ്രൈവര് ടോറസിന്റെ ബോഡി പൊക്കി നിര്ത്തിയശേഷം സ്പാനര് എടുക്കാന് പോയി.
കാബിന് തൊട്ടുപിന്ഭാഗത്ത് ചെയ്സില് ഇരുന്ന് സന്തോഷ് പണികള് ചെയ്യുന്നതിനിടെ, പൊക്കി നിര്ത്തിയിരുന്ന ബോഡി വേഗത്തില് താഴേക്ക് പതിച്ചു.
കാബിനും ബോഡിക്കും ചെയ്സിനും ഇടയിലായി സന്തോഷ് അമര്ന്നു. തല ചതഞ്ഞുപോയി. കൈകാലുകള് പുറത്ത് കാണാവുന്ന നിലയിലായിരുന്നു. വലിയ ശബ്ദംകേട്ട് ഓടിവന്ന ഡ്രൈവര്ക്കും നാട്ടുകാര്ക്കും ഒന്നുംചെയ്യാന് കഴിയുമായിരുന്നില്ല. ടിപ്പര് സ്റ്റാര്ട്ടാക്കാന് ശ്രമിച്ചെങ്കിലും സാധിച്ചില്ല. അതിനാല് ബോഡി മുകളിലേക്ക് ഉയര്ത്താനായില്ല.
ടിപ്പറിന്റെ ഉടമ വിവരം അറിയിച്ചതിനെത്തുടര്ന്ന് കോയിപ്രം പോലീസും തിരുവല്ലയില് നിന്ന് അഗ്നിരക്ഷാസേനാംഗങ്ങളും സ്ഥലത്തെത്തിയെങ്കിലും ഒന്നുംചെയ്യാന് കഴിഞ്ഞില്ല. ക്രെയിന് വരുത്തിയാണ് ടോറസിന്റെ ബോഡി മുകളിലേക്ക് ഉയര്ത്തിയത്. തുടര്ന്ന് മൃതദേഹം പുറത്തെടുത്ത് കോഴഞ്ചേരി ജില്ലാ ആശുപത്രിയിലേക്ക് മാറ്റി. സുനിതയാണ് സന്തോഷിന്റെ ഭാര്യ.രണ്ടു മക്കളുണ്ട്.
അതേസമയം ദുരന്തം കേട്ടറിഞ്ഞവരെല്ലാം വള്ളിക്കാലായിലെ അപകടസ്ഥലത്തേക്ക് ഓടിയെത്തിയെങ്കിലും ആര്ക്കും ഒന്നും ചെയ്യാനാകുമായിരുന്നില്ല. ഒന്നു നോക്കിയശേഷം എല്ലാവരും മാറിനിന്നു. അത്രയ്ക്ക് ദാരുണമായിരുന്നു ആ കാഴ്ച. സങ്കടക്കടലിലായി നാട്.
ലോറിയുടെ ബോഡിക്കടിയില് അമര്ന്നിരിക്കുന്ന മെക്കാനിക്ക് സന്തോഷിന്റെ കഴുത്ത് മുതല് മുളിലേക്കുള്ള ഭാഗം പൂര്ണമായും ചതഞ്ഞുപോയി. സാധാരണ സ്റ്റാര്ട്ടാക്കിയാല് ടിപ്പര് ലോറികളുടെ ഹൈഡ്രോളിക് ഉയര്ത്താവുന്നതാണ്. എന്നാല്, ഇവിടെ ലോറി സ്റ്റാര്ട്ടാക്കാന് കഴിയാതിരുന്നത് രക്ഷാപ്രവര്ത്തനത്തിനെ തടസ്സപ്പെടുത്തി.
ക്രെയിന് ഉപയോഗിച്ചിട്ടും ഏറെ പണിപ്പെട്ടാണ് ലോറിയുടെ ബോഡി ഉയര്ത്താനായത്. അപകടം എങ്ങനെയുണ്ടായെന്നതില് വ്യക്തത വരേണ്ടതുണ്ടെന്ന് പോലീസ്.
"
https://www.facebook.com/Malayalivartha