രാഹുല്‍ ഗാന്ധി ഇന്ത്യ മൊത്തം നടന്നെങ്കില്‍ ഗോവിന്ദന്‍മാഷ് വാഹനത്തില്‍ കേരളം മൊത്തം ജാഥ നടത്തുന്നെങ്കില്‍ എന്തെങ്കിലും ചെയ്താലെന്താ കുഴപ്പം. അങ്ങനെയാണ് ബി.ജെ.പി. സംസ്ഥാന പ്രസിഡന്റ് കെ.സുരേന്ദ്രന്‍ പദയാത്ര നടത്താന്‍ തീരുമാനിച്ചത്. എന്നാല്‍ കേന്ദ്രം അത് പൊളിച്ചു.

ലോക്സഭാ തിരഞ്ഞെടുപ്പിനു മുന്നോടിയായി 20 മണ്ഡലങ്ങളിലും പദയാത്ര നടത്താനുള്ള തീരുമാനത്തിന് പാര്‍ട്ടി കേന്ദ്രനേതൃത്വത്തിന്റെ ഉടക്ക്. ബൂത്ത് കമ്മിറ്റികള്‍ ശാക്തീകരിച്ചശേഷം പദയാത്ര നടത്തിയാല്‍ മതിയെന്നാണ് നിര്‍ദേശം.

യാത്രയോടെ താഴേത്തട്ടില്‍ പാര്‍ട്ടിയെ ശക്തിപ്പെടുത്താമെന്ന സംസ്ഥാനനേതൃത്വത്തിന്റെ നിര്‍ദേശം കേന്ദ്രം തള്ളുകയായിരുന്നു. ബൂത്ത് ശാക്തീകരണ പരിപാടിക്കൊപ്പം കര്‍ഷകര്‍, വിമുക്തഭടര്‍, യുവാക്കള്‍ എന്നിവരുടെ സമ്മേളനങ്ങള്‍ നടത്തും. ഏപ്രില്‍-മേയ് മാസങ്ങളില്‍ പദയാത്ര നടത്താനായിരുന്നു ആലോചന. പ്രധാനമന്ത്രി അടക്കമുള്ള ദേശീയ നേതാക്കള്‍ പങ്കെടുക്കുന്ന സമ്മേളനങ്ങള്‍ നടക്കുന്നതിനാലാണ് പദയാത്ര നീട്ടിവെച്ചതെന്നാണ് സുരേന്ദ്രന്‍ വിഭാഗം പറയുന്നത്.

കടുത്ത ചൂട് വെല്ലുവിളിയാകും എന്നതും പദയാത്ര നീട്ടിവെക്കാന്‍ കാരണമായി. സെപ്റ്റംബര്‍, ഒക്ടോബര്‍ മാസങ്ങളില്‍ പദയാത്ര നടത്താനാണ് ഇപ്പോഴത്തെ തീരുമാനം. തിരഞ്ഞെടുപ്പിനോട് അടുത്തസമയത്ത് പദയാത്ര നടത്തിയാല്‍ ഗുണമുണ്ടാകുമെന്ന വിലയിരുത്തലുമുണ്ടായി.

20 ലോക്സഭാ മണ്ഡലങ്ങളിലും ഒരുദിവസം വീതമുള്ള പദയാത്രയായിരുന്നു ഉദ്ദേശിച്ചിരുന്നത്. എന്നാല്‍ കാസര്‍കോട്ടുനിന്ന് തുടങ്ങി തിരുവനന്തപുരത്ത് സമാപിക്കുന്ന യാത്ര നടത്താനാണ് ഇപ്പോഴത്തെ ആലോചന. കഴിഞ്ഞ ദേശീയ നിര്‍വാഹകസമിതി തീരുമാനിച്ച 'നന്ദി മോദി' അടക്കമുള്ള പരിപാടികളൊന്നും കേരളത്തില്‍ വിജയിച്ചില്ലെന്നാണ് കേന്ദ്ര നേതൃത്വത്തിന്റെ വിലയിരുത്തല്‍. ഈ സാഹചര്യത്തില്‍ ബൂത്ത് ശാക്തീകരണത്തിന് അതീവ ശ്രദ്ധകൊടുക്കണമെന്ന കര്‍ശന നിര്‍ദേശമാണ് കേന്ദ്രനേതൃത്വം മുന്നോട്ടുവെച്ചിരിക്കുന്നത്.

സിപിഎം സംസ്ഥാന സെക്രട്ടറി എം.വി.ഗോവിന്ദന്റെ കേരള യാത്രയ്ക്കു പിന്നാലെ ഏപ്രില്‍ അവസാനത്തോടെയോ മേയിലോ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്റെ കേരള പര്യടനമായിരുന്നു സംസ്ഥാന നേതൃത്വം ആലോചിച്ചത്. കഴിഞ്ഞമാസം ആദ്യം ഇക്കാര്യം ചൂണ്ടിക്കാട്ടി കേന്ദ്ര നേതൃത്വത്തിനു കത്ത് നല്‍കിയിരുന്നു.

ലോക്‌സഭാ തിരഞ്ഞെടുപ്പ് പ്രചാരണത്തിന്റെ ഭാഗമായി ദേശീയ തലത്തില്‍ യാത്രകള്‍ തീരുമാനിക്കും. ഇപ്പോള്‍ ബൂത്ത് തലത്തിലുള്ള നിശബ്ദ പ്രവര്‍ത്തനങ്ങളിലാണ് ബിജെപി നേതാക്കള്‍. പന്ത്രണ്ടിന് തൃശൂരെത്തുന്ന കേന്ദ്ര ആഭ്യന്തര മന്ത്രി അമിത് ഷാ പ്രവര്‍ത്തനങ്ങള്‍ നേരിട്ടു വിലയിരുത്തും. കാസര്‍കോടുനിന്ന് തിരുവനന്തപുരം വരെ 20 ലോക്‌സഭാ മണ്ഡലങ്ങളിലൂടെ പദയാത്ര നടത്താനാണു കെ.സുരേന്ദ്രന്‍ പദ്ധതിയിട്ടത്. അതാണ് ഇപ്പോള്‍ മാറ്റിവച്ചത്. തിരുവനന്തപുരം ഉള്‍പ്പെടെ ആറുമണ്ഡലങ്ങളില്‍ കൂടുതല്‍ ശക്തമായി പ്രവര്‍ത്തിക്കണമെന്നും നിര്‍ദേശമുണ്ട്. മൂന്നുവീതം മണ്ഡലങ്ങളുടെ ചുമതല കേന്ദ്രമന്ത്രിമാരായ ശോഭാ കരന്തലജെ, ഭഗവത് റാവു ഖുബ എന്നിവര്‍ക്കാണ്.

ബിജെപി സംസ്ഥാന അധ്യക്ഷനായി കെ.സുരേന്ദ്രന്‍ തുടരുമെന്ന് നേരത്തെ തീരുമാനിച്ചിരുന്നു. ജനുവരിയിലെ ദേശീയ നിര്‍വാഹക സമിതി യോഗത്തിലാണ് തീരുമാനം. ദേശീയ അധ്യക്ഷന്‍ ജെ.പി.നഡ്ഡയുടെ കാലാവധി 2024 ജൂണ്‍ വരെ നീട്ടി. 2024ല്‍ ലോക്‌സഭാ തിരഞ്ഞെടുപ്പ് നടക്കുന്ന സാഹചര്യത്തിലാണ് ജെ.പി.നഡ്ഡയുടെ കാലാവധി നീട്ടാന്‍ തീരുമാനിച്ചത്.

സംസ്ഥാന നേതൃത്വം മാറുമെന്ന് വാര്‍ത്തകളുണ്ടായിരുന്നെങ്കിലും കേന്ദ്രത്തിന്റെ പിന്തുണ ഉറപ്പിക്കാനായതോടെയാണ് സുരേന്ദ്രന് സ്ഥാനത്ത് തുടരാനായത്. ഇതിന് പിന്നാലെയാണ് പദയാത്രയെപ്പറ്റി ചിന്തിച്ചത്.