കോണ്‍ഗ്രസ് നേതാവ് കെ മുരളീധരന്റെ വായ് അടപ്പിക്കാന്‍ ശ്രമിച്ച കെ.പി.സി.സി. പ്രസിഡന്റ് കെ. സുധാകരന് കൂട്ട പ്രഹരം. കോണ്‍ഗ്രസില്‍ മുതിര്‍ന്ന നേതാക്കളുടെ കലഹം പ്രധാനമായും ലക്ഷ്യംവെക്കുന്നത് കെ. സുധാകരനെയാണ്.

കെ. മുരളീധരനാണ് എതിര്‍പ്പുമായി മുന്നിട്ടിറങ്ങിയതെങ്കിലും എ ഗ്രൂപ്പിന്റെയും രമേശ് ചെന്നിത്തലയുടെ നേതൃത്വത്തിലുള്ള ഐ വിഭാഗത്തിന്റെയും പിന്തുണ അദ്ദേഹത്തിനുണ്ട്. പാര്‍ട്ടി കാര്യങ്ങള്‍ മുതിര്‍ന്ന നേതാക്കളോട് ആലോചിക്കുന്നില്ലെന്നാണ് അവരുടെ പരാതി. ലോക്സഭാ തിരഞ്ഞെടുപ്പിലേക്ക് നീങ്ങുന്ന വേളയില്‍ രണ്ട് എം.പി.മാരെ പാര്‍ട്ടി അച്ചടക്കം പഠിപ്പിക്കാനെന്നപേരില്‍ കെ.പി.സി.സി. പ്രസിഡന്റ് ചാടിപ്പുറപ്പെടേണ്ടിയിരുന്നില്ലെന്ന വികാരമാണ് എ, ഐ ഗ്രൂപ്പുകളിലുള്ളത്.

എം.കെ. രാഘവനും കെ. മുരുളീധരനും എ.ഐ.സി.സി. അംഗങ്ങളും എം.പി.മാരുമായതിനാല്‍ അവര്‍ക്ക് അച്ചടക്കത്തിന്റെ പേരില്‍ കത്തുനല്‍കേണ്ടത് എ.ഐ.സി.സി.യില്‍ നിന്നാണെന്നാണ് അവരുടെ പക്ഷം. ഇല്ലാത്ത അധികാരം ഉപയോഗിച്ച് സുധാകരന്‍ തങ്ങള്‍ക്ക് കത്തുനല്‍കിയതും ഇരുവരുടെയും പ്രസ്താവനകളിലുള്ള അതൃപ്തി ഹൈക്കമാന്‍ഡിനെ അറിയിച്ചതും തങ്ങളെ ഇകഴ്ത്താനുള്ള നടപടികളായാണ് അവര്‍ കണ്ടത്.

ഇതിന്റെ പേരിലാണ്, വായ മൂടിക്കെട്ടാനാണ് തീരുമാനമെങ്കില്‍ ഇനി മത്സരിക്കാനില്ലെന്ന് മുരളീധരന്‍ പ്രഖ്യാപിച്ചത്. ഇപ്രാവശ്യവും പാര്‍ലമെന്റിലേക്ക് മത്സരിക്കുമെന്ന് ഏതാണ്ട് ഉറപ്പിച്ചവരാണ് ഇരുവരും. കെ. മുരളീധരന്റെ പ്രഖ്യാപനത്തെ ഹൈക്കമാന്‍ഡ് ഇടപെടലിനുള്ള സമ്മര്‍ദമായാണ് വിലയിരുത്തുന്നത്.

എ, ഐ ഗ്രൂപ്പുകളും ഈയാവശ്യം താരിഖ് അന്‍വര്‍, കെ.സി. വേണുഗോപാല്‍ എന്നിവരോട് നേരത്തേതന്നെ ഉന്നയിച്ചിരുന്നു. സംസ്ഥാനതലത്തില്‍ മുതിര്‍ന്ന നേതാക്കള്‍ക്കുകൂടി പങ്കാളിത്തമുള്ള ഒരു ആലോചനാസംവിധാനമാണ് അവരുടെ ആവശ്യം. 60 കെ.പി.സി.സി. അംഗങ്ങളെ നാമനിര്‍ദേശം ചെയ്തത് ഏകപക്ഷീയമായിപ്പോയി എന്നതാണ് അവസാന പ്രകോപനമെങ്കിലും വി.ഡി. സതീശന്‍-കെ. സുധാകരന്‍ ടീം വന്നതിനുശേഷം നടത്തിയ പുനഃസംഘടന ആദ്യംമുതലേ ഗ്രൂപ്പ് നേതൃത്വത്തിന് ദഹിക്കുന്നതായിരുന്നില്ല.

എന്നാല്‍, ഗ്രൂപ്പ് മാനേജര്‍മാരോട് ചോദിച്ചുമാത്രം പുനഃസംഘടനയെന്ന വാദം നടക്കില്ലെന്ന മറുവാദമാണ് ഔദ്യോഗിക പക്ഷത്തിനുള്ളത്. ഡി.സി.സി. ഭാരവാഹികള്‍, ബ്ലോക്ക് പ്രസിഡന്റുമാര്‍ എന്നിവരുടെ പട്ടിക ജില്ലകളില്‍നിന്ന് ചോദിച്ചിരുന്നു. 15-നകമെങ്കിലും അവ ലഭ്യമാക്കി പുനഃസംഘടന നടത്താനാണ് കെ.പി.സി.സി. നേതൃത്വം തീരുമാനിച്ചത്. കാര്യങ്ങള്‍ വഷളായസ്ഥിതിക്ക് ഗ്രൂപ്പുകള്‍ നിസ്സഹകരണത്തിലാണ്.

പരസ്യ പ്രസ്താവനയില്‍ നോട്ടിസ് നല്‍കിയ കെപിസിസി നേത്യത്വത്തിനെതിരെ ആഞ്ഞടിച്ച് കെ മുരളീധരന്‍ രംഗത്തെത്തിയിരുന്നു. ലോക് സഭയിലേക്കോ നിയമസഭയിലേക്കോ ഇനി മത്സരിക്കാനില്ലെന്നും നോട്ടീസ് നല്‍കിയത് ബോധപൂര്‍വം അപമാനിക്കാനുള്ള ശ്രമാണെന്നും മുരളീധരന്‍ തുറന്നടിച്ചു. അതേസമയം വിമര്‍ശനങ്ങളോട് പ്രതികരിക്കാന്‍ കെ സുധാകരന്‍ തയ്യാറായില്ല.

പരസ്യ പ്രസ്താവനയില്‍ കെപിസിസിനെ നേതൃത്വത്തിന്റെ നോട്ടീസിനെതിരെ നിലപാട് കടുപ്പിച്ചായിരുന്നു മുരളീധരന്റെ പ്രതികരണം. നേതൃത്വത്തിനെതിരെ തുറന്നടിക്കുക മാത്രമല്ല സമ്മര്‍ദ്ദത്തിലാക്കുക കൂടിയാണ് മുരളീധരന്‍. നോട്ടീസ് നല്‍കിയത് ബോധപൂര്‍വ്വം അപമാനിക്കാനാണെന്ന് പ്രതികരിച്ച മുരളീധരന്‍ ലോക്സഭയിലേക്കോ നിയമസഭയിലേക്കോ മത്സരിക്കാനില്ലെന്ന് വ്യക്തമാക്കി

അഭിപ്രായം പറയാന്‍ കഴിയുന്ന വേദികളായ രാഷ്ട്രീയ കാര്യസമിതിയും നിര്‍വാഹക സമിതിയും ചേര്‍ന്നിട്ട് കുറെ കാലമായി. രണ്ട് എം പി മാരെ പിണക്കിയത് നല്ലതിനല്ലെന്നും മുരളിധരന്‍ മുന്നറിയിപ്പ് നല്‍കി. കെ മുരളീധരന്റെ വിമര്‍ശനത്തോട് ഇപ്പോള്‍ പ്രതികരിക്കാന്‍ ഇല്ലെന്ന് കെ സുധാകരന്‍ പറഞ്ഞു. സംഘടനാ പ്രശ്നങ്ങള്‍ കെപിസിസി പരിഹരിക്കുമെന്ന് കെസി വേണുഗോപാല്‍ പറഞ്ഞു.