യൂസഫലിയക്ക് രണ്ട് പ്രാവശ്യം ഇഡിനോട്ടീസ് നല്കിയെങ്കിലും അന്വേഷണ സംഘത്തിന് മുന്നല്‍ ഹാജരായിട്ടില്ല. ഈ  സാഹചര്യത്തിലാണ് ഇഡി കളം മാറ്റി ചവിട്ടുന്നത്.ലൈഫ് മിഷന്‍ കോഴ കേസില്‍ ആരോപണ വിധേയരായ സ്പ്‌ന സുരേഷ്, സരിത്, ശിവശങ്കര്‍ എന്നിവര്‍ നടത്തിയെന്ന് പറയുന്ന ദേശവിരുദ്ധ പ്രവര്‍ത്തനങ്ങളെ എതിര്‍ക്കുന്ന ആളാണ് എം.എ.യൂസഫലിയെന്ന പുതിയ വിശേഷണമാണ് ഇഡി ഇപ്പോള്‍ നല്കിയിരിക്കുന്നത്.അതിന് പുറമേ വടക്കാഞ്ചേരി ലൈഫ് മിഷന്‍ കമ്മിഷന്‍ കള്ളപ്പണ ഇടപാട്, നയതന്ത്ര പാഴ്‌സല്‍ സ്വര്‍ണക്കടത്ത് കള്ളപ്പണ ഇടപാട് കേസുകളില്‍ പ്രവാസി വ്യവസായി എം.എ.യൂസഫലിയുടെ മൊഴി രേഖപ്പെടുത്തുന്നതു സംബന്ധിച്ച് എന്‍ഫോഴ്‌സ്‌മെന്റ് ഡയറക്ടറേറ്റ് നിയമോപദേശം തേടിയതായാണ് പുതിയ വിവരം.

കേസുമായി ബന്ധപ്പെട്ടു മൊഴി നല്‍കാന്‍ ഈ മാസം ഒന്നിനും 8നും ഇഡി നോട്ടിസ് നല്‍കിയെങ്കിലും അസൗകര്യം അറിയിച്ചിരുന്നു. മൂന്നാം തവണ വീണ്ടും നോട്ടിസ് നല്‍കുന്നതിനു മുന്നോടിയായാണ് നിയമോപദേശം തേടിയത്. ദേശസുരക്ഷയുമായി നേരിട്ടു ബന്ധമുള്ള കേസില്‍ പ്രതികള്‍ ചെയ്ത കുറ്റകൃത്യങ്ങളോട് അങ്ങേയറ്റം എതിര്‍പ്പുള്ളയാളെന്നു പ്രതികള്‍ തന്നെ വിശ്വസിക്കുന്ന യൂസഫലിയുടെ മൊഴികള്‍ കേസന്വേഷണത്തിന് ഏറെ നിര്‍ണായകമാണെന്നാണ് ഇഡിയുടെ നിലപാട്. യൂസഫലി അറിഞ്ഞു കൊണ്ടാണോ അതോ അറിയാതെയാണോ റെഡ്ക്രസന്റുമായി കള്ളപ്പണ ഇടപാട് നടന്നതെന്ന് അന്വേഷിക്കുകയാണ് ഇഡിയുടെ ലക്ഷ്യം. അറിഞ്ഞു കൊണ്ടാണെങ്കില്‍ വിവരം നേരത്തെ നല്കാത്തതിന് നടപടി വന്നേക്കാം.

യുഎഇയിലെ സന്നദ്ധ സംഘടനയായ റെഡ് ക്രസന്റിന്റെ 20 കോടി രൂപയുടെ സഹായം ലൈഫ് മിഷനു കൈമാറിയ പ്രതിനിധി സംഘത്തില്‍ യുഎഇ ചേംബര്‍ ഓഫ് കൊമേഴ്‌സ് ഉപാധ്യക്ഷന്‍ എന്ന നിലയില്‍ യൂസഫലിയും ഉണ്ടായിരുന്നു. ഈ സാഹചര്യത്തിലാണ് ഇഡി വിവരങ്ങള്‍ തേടുന്നത്. പാവപ്പെട്ടവര്‍ക്കു വേണ്ടി പ്രവര്‍ത്തിക്കുമ്പോള്‍ പലതും കേള്‍ക്കേണ്ടി വരുമെന്നു ലുലു ചെയര്‍മാന്‍ എം.എ.യുസഫലി പറഞ്ഞിരുന്നു. ലൈഫ് മിഷന്‍ അഴിമതി കേസില്‍ ഇഡി സമന്‍സ് അയച്ചോ എന്ന ചോദ്യത്തിനു മറുപടി പറയുകയായിരുന്നു യുസഫലി. സമന്‍സ് സംബന്ധിച്ച കാര്യങ്ങള്‍ വാര്‍ത്ത നല്‍കിയവരോടു ചോദിക്കണമെന്നും അദ്ദേഹം പറഞ്ഞു

അതേസമയം മുഖ്യമന്ത്രി പിണറായി വിജയനും അദ്ദേഹത്തിന്റെ ഓഫീസുമായി അതിരുകടന്ന ബന്ധമാണ് യൂസഫലിയ്ക്കുള്ളത്. ഇത്തരം ബന്ധങ്ങളിലൂടെയാണ് വടക്കാഞ്ചേരിയില്‍ ഫ്‌ളാറ്റ് പണിയാനായി റെഡ് ക്രസന്റുമായി ബന്ധപ്പെട്ട് കരാര്‍ പിറക്കുന്നത്. കരാറിനും മറ്റെല്ലാ കാര്യങ്ങള്‍ക്കും നേതൃത്വം നല്കിയതാവട്ടെ സ്വപ്‌ന സുരേഷും , എം.ശിവശങ്കറുമാണ്. കരാറുകളുടെ ചര്‍ച്ച നടക്കുന്ന സമയത്ത് യൂസഫലിയും ഉണ്ടായിരുന്നതായി സ്വപ്‌ന സുരേഷ് ആരോപിച്ചിരുന്നു. അതിന്റെ തെളിവുകളും സ്വപ്‌ന ഇഡിയ്ക്ക് നല്കിയിരുന്നു. ഇതിന്റെ അടിസ്ഥാനത്തിലാണ് ,യൂസഫലിയെ ചോദ്യം ചെയ്യലിനായി വിളിപ്പിച്ചത്.

എന്നാല്‍ രണ്ട് നോട്ടീസ് നല്കിയിട്ടും ഹാജരാകാത്ത യൂസഫലിയെ വിളിപ്പിക്കുന്നതിനെ കുറിച്ച് വിശദമായ നിയമോപദേശം തേടണമെന്ന് കേന്ദ്രം ഇഡിയ്ക്ക് നിര്‍ദ്ദേശം നല്കിയതായി അറിയുന്നു. കേന്ദ്രത്തിന്റെ ഇടപെടലിനെ തുടര്‍ന്നാണ് കള്ളപ്പണ ഇടപാട് എതിര്‍ക്കുന്ന വ്യക്തിയാണ് യൂസഫലിയെന്ന പരിവേഷം ചാര്‍ത്തി ഇഡി നല്ലപിള്ളയാക്കാന്‍ ശ്രമിക്കുന്നതെന്നും ആരോപണമുയരുന്നുണ്ട്. കേന്ദ്രത്തിന്റെ ഇടപെടലിനേക്കാള്‍ പ്രധാനമന്ത്രി നരേന്ദ്രമോദിയുടെ നേരിട്ടുള്ള ഇടപെടല്‍ ഈ വിഷയത്തില്‍ ഉണ്ടായതായും ആരോപണമുയരന്നുണ്ട്. ചോദ്യം ചെയ്യാന്‍ വിളിച്ച ആളിന്റെ സാമൂഹിക പശ്ചാത്തലം നോക്കി അദ്ദേഹത്തിന് ഇഡി ക്ലീന്‍ചിറ്റ് നല്കിയതിന് പിന്നില്‍ കേന്ദ്രസര്‍ക്കാരിന്റെ കടുത്ത സമ്മര്‍ദ്ദമുണ്ടായി എന്നാണ് അനുമാനിക്കുന്നത്.

എന്തായാലും ഇഡിയ്ക്ക് കടുത്ത സമ്മര്‍ദ്ദമുള്ളതായാണ് അറിവ്. കേരളത്തിന് മാത്രമല്ല കേന്ദ്രത്തിനും ഏറെ വേണ്ടപ്പെട്ട വ്യവസായിയാണ് യൂസഫലി. ബിജെപി ഭരിക്കുന്ന ഗുജറാത്ത,ഉത്തര്‍പ്രദേശ് ഉള്‍പ്പടെയുള്ള സംസ്ഥാനങ്ങളില്‍ കോടാനുകോടി രൂപയുടെ നിക്ഷേപമാണ് ലുലു ഗ്രൂപ്പ് നടത്തി കൊണ്ടിരിക്കുന്നത്. അതുമാത്രവുമല്ല പ്രധാനമന്ത്രി നരേന്ദ്ര മോദിയും അമിത് ഷായുമൊക്കെയായി അടുത്ത ബന്ധത്തിലുമാണ് യൂസഫലി. ആ സാഹചര്യത്തില്‍ ഇഡിയ്ക്ക് അവരുടെ ഇഷ്ടപ്രകാരം അദ്ദേഹത്തെ കൈകാര്യം ചെയ്യാനാവില്ലെന്നാണ് കണക്ക് കൂട്ടുന്നത്.