തന്റെ ചിത്രം എഡിറ്റ് ചെയ്ത് മോശമായി പ്രചരിപ്പിക്കുന്നതിനെതിരെ രൂക്ഷ പ്രതികരണവുമായി നടി അന്ന രേഷ്മ രാജന്
ലിജോ ജോസ് പെല്ലിശ്ശേരി സംവിധാനം ചെയ്ത 'അങ്കമാലി ഡയറീസ്' എന്ന ചിത്രത്തിലൂടെയാണ് അന്ന രാജന് അഭിനയരംഗത്തേക്ക് വന്നത്. ഈ സിനിമയിലെ അവരുടെ കഥാപാത്രമായ 'ലിച്ചി' എന്ന പേരിലാണ് അന്ന പ്രേക്ഷകര്ക്കിടയില് അറിയപ്പെടുന്നത്. സമൂഹ മാധ്യമങ്ങളിലൂടെ തന്റെ ചിത്രം എഡിറ്റ് ചെയ്ത് മോശമായി പ്രചരിപ്പിക്കുന്നതിനെതിരെ രൂക്ഷ പ്രതികരണമാണ് താരം നടത്തിയിരിക്കുന്നത്. വ്യാജ ചിത്രം പങ്കുവച്ച ഇന്സ്റ്റഗ്രാം അക്കൗണ്ടിന്റെ വിവരങ്ങളും നടി പുറത്തുവിട്ടു. ഇതിനു പിന്നിലുളള ആളുകള്ക്കെതിരെ എത്രയും പെട്ടന്ന് നിയമനടപടി എടുക്കണമെന്ന് കേരള പൊലീസിനോടും സൈബര് സെല്ലിനോടും നടി ആവശ്യപ്പെട്ടിട്ടുണ്ട്.
''എന്റെ സല്പ്പേരിന് കളങ്കം വരുത്തുക എന്ന ദുരുദ്ദേശ്യത്തോടെ, ഈ ചിത്രം അശ്ലീലകരവും അപകീര്ത്തികരവുമായ രീതിയില് എഡിറ്റ് ചെയ്ത് പ്രചരിപ്പിച്ചിരിക്കുകയാണ്. ഇത് ലജ്ജാകരവും, അംഗീകരിക്കാനാവാത്തതും, എന്റെ സ്വകാര്യതയുടെയും അന്തസ്സിന്റെയും ഗുരുതരമായ ലംഘനവുമാണ്.
ഞാന് ഈ അക്കൗണ്ട് ഔദ്യോഗികമായി ഇന്സ്റ്റാഗ്രാമിന് റിപ്പോര്ട്ട് ചെയ്യും, കൂടാതെ ബാധകമായ നിയമങ്ങള്ക്കനുസരിച്ച് ഒരു പൊലീസ് പരാതി ഫയല് ചെയ്യുകയും ചെയ്യും. ഈ എഡിറ്റ് ചെയ്ത ഉള്ളടക്കം ഉണ്ടാക്കുകയോ പങ്കുവയ്ക്കുകയോ ചെയ്തവര് ആരായാലും ഉത്തരം പറയേണ്ടിവരും. നിയമപരമായ നടപടികള് സ്വീകരിക്കും, നീതി ഉറപ്പാക്കും വരെ ഞാന് ഈ കാര്യത്തില് മുന്നോട്ട് പോകും.
ദയവായി ഇത്തരം അധിക്ഷേപകരമായ ഉള്ളടക്കത്തെ പിന്തുണയ്ക്കുകയോ പങ്കുവയ്ക്കുകയോ ചെയ്യരുത്.''–
ഇത് ആദ്യമായല്ല അന്നയ്ക്ക് ഈ രീതിയിലുള്ള സൈബര് ആക്രമണം നേരിടേണ്ടി വരുന്നത്. 'ലിച്ചി' എന്ന വിളിപ്പേരില് പ്രശസ്തയായ നടി അന്ന രാജന് ഉദ്ഘാടന വേദികളിലെ വസ്ത്രധാരണത്തിന്റെ പേരില് സാമൂഹിക മാധ്യമങ്ങളില് നിരന്തരമായി വിമര്ശനങ്ങള് നേരിടാറുണ്ട്. അതു ചിലപ്പോള് ബോഡി ഷെയ്മിങുകളിലേക്കും വള്ഗര് ആയ അഭിപ്രായ പ്രകടനങ്ങളിലേക്കും പോകാറുണ്ട്.
നടി ഉദ്ഘാടന വേദികളില് പങ്കെടുക്കുന്നതിന്റെ വിഡിയോകളോ ചിത്രങ്ങളോ സോഷ്യല് മീഡിയയില് വരുമ്പോള് പലപ്പോഴും താരത്തിന്റെ വസ്ത്രധാരണത്തെക്കുറിച്ചുള്ള മോശം കമന്റുകളാണ് കമന്റ് ബോക്സുകളില് നിറയാറുള്ളത്. വസ്ത്രത്തിന്റെ 'ഫിറ്റിങ്' സംബന്ധിച്ചും, 'ശരീരത്തെ എടുത്തു കാണിക്കുന്നു' എന്ന രീതിയിലുള്ളതുമായ വിമര്ശനങ്ങളാണ് കൂടുതലും. ഈ കമന്റുകള് പലപ്പോഴും ബോഡി ഷെയ്മിങ് എന്ന നിലയിലേക്ക് മാറാറുമുണ്ട്. അന്നയുടെ തന്നെ പല ചിത്രങ്ങളും വള്ഗര് ആയ രീതിയിലും പ്രചരിപ്പിക്കാറുണ്ട്.
'അങ്കമാലി ഡയറീസ്' കൂടാതെ, ലാല് ജോസ് സംവിധാനം ചെയ്ത 'വെളിപാടിന്റെ പുസ്തകം', 'മധുരരാജ', 'അയ്യപ്പനും കോശിയും' തുടങ്ങിയ ശ്രദ്ധേയമായ ചിത്രങ്ങളിലും അവര് അഭിനയിച്ചിട്ടുണ്ട്. രജനികാന്ത് ചിത്രം 'ജയിലര് 2' ആണ് നടിയുടെ പുതിയ പ്രോജ്ക്ട്. നടിയുടെ തമിഴ് അരങ്ങേറ്റ ചിത്രം കൂടിയാണിത്. സിനിമയില് വരുന്നതിനു മുമ്പ് നഴ്സ് ആയി ജോലി ചെയ്യുകയായിരുന്നു അന്ന.
https://www.facebook.com/Malayalivartha
