ബ്രഹ്‌മപുരം മാലിന്യസംസ്‌കരണ കേന്ദ്രത്തിലെ തീപിടിത്തം സംബന്ധിച്ച അന്വേഷണത്തിന്റെ ഭാഗമായി പ്രദേശത്തെ സിസിടിവി ദൃശ്യങ്ങള്‍ ശേഖരിച്ചു പൊലീസ്. ഇവിടെ സ്ഥാപിച്ചിരുന്ന 12 ക്യാമറകളില്‍ ആറെണ്ണം മാത്രമാണ് പ്രവര്‍ത്തിച്ചിരുന്നത്. ഇതില്‍നിന്നുള്ള ദൃശ്യങ്ങളാണ് ശേഖരിച്ചതെന്നു സിറ്റി പൊലീസ് കമ്മിഷണര്‍ കെ.സേതുരാമന്‍ പറഞ്ഞു. മാലിന്യസംസ്‌കരണ കേന്ദ്രത്തിലെ സെക്ടര്‍ ഒന്നില്‍നിന്നാണ് തീ പടര്‍ന്നത് എന്നാണ് ദൃശ്യങ്ങളില്‍നിന്ന് വ്യക്തമാകുന്നതെന്നും കമ്മിഷണര്‍ അറിയിച്ചു.

പ്രദേശത്തെ സിസിടിവി ദൃശ്യങ്ങള്‍ പ്രവര്‍ത്തനക്ഷമമല്ലെന്നായിരുന്നു നേരത്തെ പുറത്തുവന്ന റിപ്പോര്‍ട്ടു. എന്നാല്‍ പകുതിയെണ്ണം പ്രവര്‍ത്തിക്കുന്നുണ്ടെന്നാണ് ഇപ്പോള്‍ കണ്ടെത്തിയത്. തീപിടിത്തത്തിന് പിന്നില്‍ അട്ടിമറിയുണ്ടെന്ന ആരോപണം ഉയര്‍ന്നിട്ടുള്ള പശ്ചാത്തലത്തില്‍ സിസിടിവി ദൃശ്യങ്ങള്‍ ഏറെ നിര്‍ണായകമാണ്. തിങ്കളാഴ്ചയാണ് ബ്രഹ്‌മപുരത്ത് പൊലീസ് ശാസ്ത്രീയ പരിശോധന ആരംഭിച്ചത്. ഇന്നലെയും പരിശോധന തുടര്‍ന്നു. സിറ്റി പൊലീസ് കമ്മിഷണര്‍ കെ.സേതുരാമന്റെ നേതൃത്വത്തിലായിരുന്നു തെളിവെടുപ്പ്.

തൃശൂര്‍, എറണാകുളം ഫൊറന്‍സിക് സയന്‍സ് ലാബുകളില്‍ നിന്നുള്ള എട്ടംഗ സംഘം സ്ഥലപരിശോധന നടത്തി കത്തിയ മാലിന്യത്തിന്റെ സാംപിളുകള്‍ ശേഖരിച്ചിട്ടുണ്ട്. തീപിടിത്തത്തിന്റെ യഥാര്‍ഥ കാരണം കണ്ടെത്താന്‍ വിശദമായ പരിശോധനയും തെളിവെടുപ്പും വേണ്ടി വരുമെന്നു കെ.സേതുരാമന്‍ പറഞ്ഞു. അട്ടിമറി സാധ്യത ഉള്‍പ്പെടെയുള്ളവ പരിശോധിക്കും. പെട്രോള്‍ ഒഴിച്ചു കത്തിച്ചതാണെന്നുള്ള ആരോപണങ്ങള്‍ നിലനില്‍ക്കെയാണ് സാംപിളുകള്‍ പരിശോധിക്കുന്നത്.

സെക്ടര്‍ ഒന്നില്‍നിന്നാണ് തീ പടര്‍ന്നതെന്ന് സോണ്ട ഇന്‍ഫ്രാടെക്കിലെ ചില ഉദ്യോഗസ്ഥരും ബ്രഹ്‌മപുരത്തെ ചില ജീവനക്കാരും നേരത്തെ പറഞ്ഞിരുന്നു. ബ്രഹ്‌മപുരം മാലിന്യപ്ലാന്റിലേക്ക് പ്രവേശിക്കുമ്പോള്‍ വലതുഭാഗത്തുള്ള പ്രദേശമാണ് സെക്ടര്‍ ഒന്ന്. ഇവിടെനിന്നുതന്നെയാണ് തീ പടര്‍ന്നതെന്നാണ് സിസിടിവി ദൃശ്യങ്ങളില്‍നിന്നു വ്യക്തമാകുന്നത്. മാര്‍ച്ച് 2നു വൈകിട്ടാണ് തീപ്പിടിത്തം ആരംഭിച്ചത്. വളരെ വേഗത്തില്‍ ഈ തീ ആളിപ്പടര്‍ന്നെന്ന് ദൃശ്യങ്ങളില്‍ കാണിക്കുന്നു. ഇത് അണയ്ക്കാനുള്ള ശ്രമം ബ്രഹ്‌മപുരം പ്ലാന്റിലെ ജീവനക്കാര്‍ നടത്തിയെങ്കിലും വിഫലമായി. ഇതോടെ അഗ്‌നിരക്ഷാ സേന എത്തിയത്.