ലൈഫ് മിഷന്‍ കോഴയുമായി ബന്ധപ്പെട്ട കള്ളപ്പണക്കേസില്‍ ഇ.ഡി അറസ്റ്റ് ചെയ്ത എം. ശിവശങ്കറിന്റെ ആരോഗ്യസ്ഥിതി സംബന്ധിച്ച രേഖകള്‍ ഹാജരാക്കാന്‍ വിചാരണക്കോടതിക്ക് നിര്‍ദ്ദേശവുമായി ഹൈക്കോടതി.

കള്ളപ്പണം വെളുപ്പിക്കുന്നതു തടയല്‍ നിയമപ്രകാരമുള്ള കേസുകള്‍ പരിഗണിക്കാനായി ചുമതലപ്പെട്ട എറണാകുളം അഡി. സെഷന്‍സ് കോടതിക്കാണ് ജസ്റ്റിസ് എ. ബദറുദ്ദീന്റെ നിര്‍ദ്ദേശമുള്ളത്. ആരോഗ്യസ്ഥിതി വളരെ മോശമാണെന്നു വ്യക്തമാക്കിയാണ് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറികൂടിയായ ശിവശങ്കര്‍ ജാമ്യ ഹര്‍ജി നല്‍കിയത്.

ഈ വാദം തെറ്റാണെന്ന് ഇ.ഡി മറുവാദം ഉന്നയിച്ചപ്പോള്‍ ആരോഗ്യസ്ഥിതി സംബന്ധിച്ച രേഖകള്‍ ഹാജരാക്കാന്‍ ഹൈക്കോടതി നിര്‍ദ്ദേശിക്കുകയായിരുന്നു.


ശിവശങ്കറിന് ഗുരുതരമായ ആരോഗ്യപ്രശ്നങ്ങളുണ്ടെന്ന് അദ്ദേഹത്തിനുവേണ്ടി ഹാജരായ സുപ്രീം കോടതിയിലെ സീനിയര്‍ അഭിഭാഷകന്‍ ജയദീപ് ഗുപ്ത വാദിച്ചിട്ടുണ്ടായിരുന്നു. നേരത്തെ ഈ വാദം ഉന്നയിച്ചു ജാമ്യം നേടിയ ശേഷം ശിവശങ്കര്‍ സര്‍വീസില്‍ തിരിച്ചുകയറിയെന്നും വിചാരണക്കോടതിയില്‍ ആരോഗ്യസ്ഥിതി സംബന്ധിച്ചു നല്‍കിയ രേഖകള്‍ വിളിച്ചുവരുത്തി പരിശോധിക്കണമെന്നും ഇ.ഡിക്കു വേണ്ടി ഹാജരായ കേന്ദ്ര സര്‍ക്കാര്‍ അഭിഭാഷകന്‍ ആവശ്യപ്പെട്ടു.

ലൈഫ് മിഷന്‍ കേസില്‍ കോഴപ്പണത്തിലൊരു ഭാഗം ഡോളറാക്കി വിദേശത്തേക്ക് കടത്തിയെന്ന കേസിലെ അന്വേഷണ പുരോഗതി റിപ്പോര്‍ട്ട് ഇ.ഡി മുദ്രവച്ച കവറില്‍ ഹാജരാക്കി. സ്വപ്നയുടെ ബാങ്ക് ലോക്കറുകളില്‍ നിന്ന് ലഭിച്ച പണം ശിവശങ്കറിന്റേതാണെന്ന് ചാര്‍ട്ടേഡ് അക്കൗണ്ടന്റ് വേണുഗോപാല്‍ നല്‍കിയ മൊഴി റിപ്പോര്‍ട്ടിലുണ്ടെന്നും വ്യക്തമാക്കി ഇ.ഡി. ഹര്‍ജി ഏപ്രില്‍ അഞ്ചിനു വീണ്ടും പരിഗണിക്കും.