മലയാളികളുടെ മുന്നിലേക്ക് ഒരുപുതിയ സാറ്റലൈറ്റ് ചാനൽകൂടി ഉദയംചെയ്യുന്നു. ജനാധിപത്യത്തലെ നാലാംതൂൺ എന്നാണ് മാധ്യമ മേഖലയെ വിശേഷിപ്പിക്കുന്നത്. ഈ അർത്ഥം ഉൾക്കൊണ്ട് ദി ഫോർത്ത് എന്നാണ് പുതിയ ചാനലിൻറെ പേര്.
പ്രമുഖ ദൃശ്യമാധ്യമ പ്രവർത്തകനും ഏഷ്യാനെറ്റ്‌ ന്യൂസിൽ കോ ഓർഡിനേറ്റിംഗ് എഡിറ്ററും ആയിരുന്ന ജിമ്മി ജെയിംസ് ആണ് ദ ഫോർത്ത് ടിവി എക്സിക്യൂട്ടിവ് എഡിറ്റർ. . സ്വാതന്ത്ര്യദിനമായ ഓഗസ്റ്റ് 15ന് സാറ്റലൈറ്റ് സംപ്രേഷണം ആരംഭിക്കാൻ ലക്ഷ്യമിട്ടുള്ള പ്രവർത്തനങ്ങൾ പുരോഗമിക്കുന്നതിനിടെയാണ് ജിമ്മിയുടെ നിയമനം.
ചാനല്‍ ടീമിന്റെ തലപ്പത്ത് ജിമ്മി കൂടി എത്തുമ്പോൾ ദി ഫോർത്തിൽ ഏറെ പ്രതീക്ഷ അർപ്പിക്കുകയാണ് പ്രേക്ഷകർ.25 വർഷത്തെ പരിചയസമ്പത്തോട് കൂടി ദൃശ്യ മാധ്യമ രംഗത്തെ ശ്രദ്ധേയമായ മുഖമായി മാറിയ ജിമ്മി പോയിന്റ് ബ്ലാങ്ക് എന്ന അഭിമുഖ പരിപാടിയിലൂടെ മലയാളി ടെലിവിഷൻ പ്രേക്ഷകരുടെ പ്രിയങ്കരനായി മാറിയിരുന്നു .
അദ്ദേഹം കഴിഞ്ഞ രണ്ടുവർഷമായി ന്യൂഡൽഹി ആസ്ഥാനമായ സെന്റർ ഫോർ ഫിനാൻഷ്യൽ അക്കൗണ്ടബിലിറ്റിയിൽ കമ്മ്യൂണിക്കേഷൻ ഡയറക്ടറായി പ്രവർത്തിച്ചു വരികെയാണ് പുതിയ നിയോഗം. .
ന്യൂ ഡൽഹി ആസ്ഥാനമായ ടി വി ഐ യിലും എൻടിവിയിലും പ്രവർത്തിച്ച ശേഷമാണ് ജിമ്മി 2001-ൽ ഏഷ്യാനെറ്റ് ന്യൂസിന്റെ ഭാഗമാകുന്നത്.

മികച്ച റിപ്പോർട്ടർ, മികച്ച ഇൻവെസ്റ്റിഗേറ്റീവ് ജേണലിസ്റ്റ്, മികച്ച അഭിമുഖ കർത്താവ് എന്നീ വിഭാഗങ്ങളിൽ സംസ്ഥാന ടെലിവിഷൻ അവാർഡ് ജേതാവാണ്.

ഓൺലൈൻ മാധ്യമ രംഗത്ത് ചെറിയ കാലയളവിനുള്ളിൽ തന്നെ ശ്രദ്ധേയ സാന്നിധ്യമാകാന്‍ ദ ഫോർത്തിന് കഴിഞ്ഞിട്ടുണ്ട്.മുഖ്യധാര മാധ്യമങ്ങളിലെ പ്രമുഖർ ഫോർത്തിലേക്ക് എത്തിയതോടെ ടോപ് റേറ്റിംഗ് ചാനലുകളുടെ പട്ടികയിൽ കേറാനുള്ള എല്ലാ തയ്യാറെടുപ്പുകളും ചാനൽ ടീം നടത്തുന്നുണ്ട്.
ദ ഫോർത്ത് ഓൺലൈന്‍ പ്ലാറ്റ്ഫോമിന് ഒരു വയസ് പൂർത്തിയാകുന്ന ഓഗസ്റ്റ് 15ന് സാറ്റലൈറ്റ് ചാനല്‍ ലോഞ്ച് ചെയ്യാനാണ് ലക്ഷ്യമിടുന്നതെന്നാണ് ടൈം സ്‌ക്വയർ കമ്മ്യൂണിക്കേഷൻ ലിമിറ്റഡ് മാനേജിങ് ഡയറക്ടർ റിക്‌സൺ ഉമ്മൻ വർഗീസ് പറയുന്നത്.
മനോരമ ന്യൂസ് ചാനലിന്റെ പ്രധാന മുഖങ്ങളില്‍ ഒരാളായ അയ്യപ്പദാസ് ഫോർത്തിലേക്ക് എത്തുമെന്ന് വാർത്തകൾ വന്നിരുന്നെങ്കിലും ചില കാരണങ്ങളാൽ അത് സംഭവിച്ചില്ല. എക്സിക്യൂട്ടീവ് എഡിറ്റർ സ്ഥാനത്തേക്കെത്തുമെന്നായിരുന്നു സൂചന. എന്നാൽ അത് സാധ്യമല്ലാതെ വന്നവേളയിലാണ് ജിമ്മി ജയിംസ് ഇങ്ങോട്ടേക്കെത്തുന്നത്. ജിമ്മി ജയിംസിന് പിന്നാലെ ഏഷ്യാനെറ്റിലെ അടക്കം ചില പ്രമുഖ ചാനലുകളിലെ ശ്രദ്ധേയരായ മാധ്യപ്രവർത്തകരും ദി ഫോർത്തിലേക്ക് താമസിയാതെ എത്തും .ഇതോടെ സാറ്റലൈറ്റ് ചാനൽ രംഗം കൂടുതൽ മത്സരത്തിലേക്ക് നീങ്ങും. പുതിയ മാനേജ്മെൻ്റ് ഏറ്റെടുത്ത റിപ്പോർട്ടർ ചാനലും പുത്തൻ കരുത്തോടെ ഉടൻ കളത്തിലിറങ്ങും. റിപ്പോർട്ടർ,ദി ഫോർത്ത് ചാനൽ കരുത്തരാകുന്നതോടെ റേറ്റിംഗിൽ മുൻനിരയിലുള്ള ഏഷ്യാനെറ്റ്,24, മനോരമ, മാതൃഭൂമി,ജനം ചാനലുകൾ കൂടുതൽ സമ്മർദ്ദത്തിലാകുമെന്ന് ഉറപ്പാണ്.