കുഞ്ഞ് പൂര്‍ണ ആരോഗ്യാവസ്ഥയിലെന്ന് ഡോക്ടര്‍മാര്‍.... പ്രസവശേഷം അമ്മ ബക്കറ്റില്‍ ഉപേക്ഷിച്ച നവജാത ശിശുവിനെ ഇന്ന് ആശുപത്രിയില്‍ നിന്ന് ഡിസ്ചാര്‍ജ് ചെയ്യും..


തണല്‍ എന്ന സംഘടനയ്ക്കാണ് കുഞ്ഞിനെ കൈമാറുന്നത്. കോട്ട സ്വദേശിനിയാണ് ഏപ്രില്‍ നാലിന് വീട്ടില്‍ പ്രസവശേഷം ശിശുവിനെ ശുചിമുറിയിലെ ബക്കറ്റില്‍ ഇട്ടത്.

അമിത രക്തസ്രാവത്തെ തുടര്‍ന്ന് ചെങ്ങന്നൂരിലെ സ്വകാര്യ ആശുപത്രിയില്‍ എത്തിയതായിരുന്നു യുവതി. പ്രസവശേഷം കുഞ്ഞ് മരണപ്പെട്ടതിനെ തുടര്‍ന്ന് കുഴിച്ചിട്ടെന്നായിരുന്നു യുവതി ഡോക്ടര്‍മാരോട് പറഞ്ഞത്. എന്നാല്‍ കുഞ്ഞ് ശുചിമുറിയിലെ ബക്കറ്റില്‍ ഉണ്ടെന്ന് കൂടെയുണ്ടായിരുന്ന മൂത്തമകന്‍ പറഞ്ഞു.

 ആശുപത്രി അധികൃതര്‍ പൊലീസിനെയും ചൈല്‍ഡ് വെല്‍ഫെയര്‍ കമ്മിറ്റി അധികൃതരേയും വിവരം അറിയിച്ചു.   ഉടന്‍ തന്നെ പൊലീസ് സംഘം യുവതിയുടെ വീട്ടിലെത്തി പരിശോധനയ്ക്കിടെ കുളിമുറിയില്‍ നിന്ന് ശിശുവിന്റെ കരച്ചില്‍ കേട്ടു.



തുടര്‍ന്ന് ഒരു നിമിഷം പോലും കളയാതെ എസ്.ഐ അഭിലാഷ് ബക്കറ്റിലുള്ള കുഞ്ഞുമായി ഓടി പൊലീസ് ജീപ്പില്‍ ആശുപത്രിയില്‍ എത്തിച്ചു.
ആശുപത്രിയിലെത്തി പ്രഥമ ശുശ്രൂഷ നല്‍കി നടപടിക്രമം പൂര്‍ത്തികരിച്ച ശേഷം നവജാതശിശുവിനെ പൊലീസ് കൂട്ടികളുടെ ആശുപത്രിയില്‍ എത്തിച്ചു. നവജാത ശിശുവിന്റെ ജീവന്‍ തിരിച്ചുപിടിക്കുവാനായി ആശുപത്രി സൂപ്രണ്ട് ഡോ.കെ.പി.ജയപ്രകാശിന്റെ നേതൃത്വത്തിലാണ് ചികിത്സ നടത്തിയത്.