സംസ്ഥാനത്ത് പവര്‍കട്ട് ഒഴിവാക്കാനാവാത്ത അടിയന്തര സാഹചര്യമാണ് നിലവിലുള്ളതെന്ന് മന്ത്രി സണ്ണി ജോസഫ് അറിയിച്ചു. എല്‍നിനോ പ്രതിഭാസത്തെ തുടര്‍ന്ന് മഴയുടെ ലഭ്യതയിലുണ്ടായ കുറവും അന്തരീക്ഷ ഊഷ്മാവ് ഉയര്‍ന്നതും വൈദ്യുതി ഉപയോഗം കുത്തനെ കൂട്ടി. രാജ്യവ്യാപകമായി ഉണ്ടായിട്ടുള്ള ഈ വൈദ്യുതി പ്രതിസന്ധി സംബന്ധിച്ച് കേന്ദ്ര സര്‍ക്കാര്‍ സംസ്ഥാനങ്ങള്‍ക്ക് മുന്നറിയിപ്പ് നല്‍കിയിട്ടുണ്ടെന്നും മന്ത്രി പ്രസ്താവനയില്‍ ചൂണ്ടിക്കാട്ടി.

മാര്‍ച്ച്, ഏപ്രില്‍ മാസങ്ങളിലെ ഉപയോഗത്തിനായി നമ്മള്‍ മറ്റു സംസ്ഥാനങ്ങളില്‍ നിന്ന് കടം വാങ്ങിയ 530 മെഗാവാട്ട് വൈദ്യുതി, കൈമാറ്റ കരാര്‍ പ്രകാരം സെപ്റ്റംബര്‍ 15നകം തിരിച്ചു നല്‍കേണ്ട ബാധ്യത നിലനില്‍ക്കുന്നതും പ്രതിസന്ധി രൂക്ഷമാക്കി. മുന്‍ വൈദ്യുതി മന്ത്രി ആര്യാടന്‍ മുഹമ്മദിന്റെ സമയത്ത് ഒപ്പുവെച്ച, യൂണിറ്റിന് 4.29 രൂപ നിരക്കില്‍ വൈദ്യുതി ലഭ്യമായിരുന്ന ദീര്‍ഘകാല കരാറുകള്‍ പിന്നീട് റദ്ദാക്കപ്പെട്ടതും നിലവിലെ പ്രതിസന്ധിക്ക് കാരണമായിട്ടുണ്ട്.

മന്ത്രി സണ്ണി ജോസഫിന്റെ ഫേസ്ബുക്ക് പോസ്റ്റ്

സംസ്ഥാനത്ത് നിലവിലുള്ള വൈദ്യുതി നിയന്ത്രണവുമായി ബന്ധപ്പെട്ട് പൊതുജനങ്ങള്‍ക്കും ഉപഭോക്താക്കള്‍ക്കും ഉണ്ടായിട്ടുള്ള ബുദ്ധിമുട്ടുകള്‍ പൂര്‍ണ്ണമായും മനസ്സിലാക്കുന്നു. എന്നാല്‍, നിയന്ത്രണം പൂര്‍ണ്ണമായി ഒഴിവാക്കാന്‍ കഴിയാത്ത ഒരു അടിയന്തര സാഹചര്യത്തിലാണ് നിലവില്‍ ചെറിയ തോതിലുള്ള വൈദ്യുതി നിയന്ത്രണം ഏര്‍പ്പെടുത്തുവാന്‍ ഞങ്ങള്‍ നിര്‍ബന്ധിതരായത്. ഈ കടുത്ത പ്രതിസന്ധി മറികടക്കുന്നതിന് സാധ്യമായ എല്ലാ ഇടപെടലുകളും കെഎസ്ഇബി ലിമിറ്റഡ് നടത്തുന്നുണ്ട്.

നാം നേരിടുന്ന യാഥാര്‍ത്ഥ്യങ്ങള്‍ (കണക്കുകളിലൂടെ):

വൈദ്യുതി ആവശ്യകതയിലെ വന്‍ വര്‍ദ്ധനവ്: 2025 ജൂലൈ മാസത്തില്‍ പീക്ക് സമയത്തെ വൈദ്യുതി ആവശ്യകത 3500 3600 മെഗാവാട്ട് ആയിരുന്നെങ്കില്‍, 2026 ജൂലൈ മാസത്തില്‍ അത് 4600 4800 മെഗാവാട്ട് ആയി ഉയര്‍ന്നു. മുന്‍വര്‍ഷത്തേക്കാള്‍ 700 1000 മെഗാവാട്ടിന്റെ വര്‍ദ്ധനവാണ് ഉണ്ടായിട്ടുള്ളത്.

പ്രതിദിന ഉപയോഗം: 2025 ജൂലൈയില്‍ പ്രതിദിന ഉപയോഗം 70 ദശലക്ഷം യൂണിറ്റ് ആയിരുന്നെങ്കില്‍, 2026 ജൂലൈയില്‍ അത് 78 ദശലക്ഷം യൂണിറ്റ് ആയി വര്‍ദ്ധിച്ചു. ആഭ്യന്തര ഉല്‍പ്പാദനത്തിലെ ഇടിവ്: 2025 ജൂലൈയില്‍ ആഭ്യന്തര ജലവൈദ്യുതി ഉല്‍പ്പാദനം 45 ദശലക്ഷം യൂണിറ്റ് ആയിരുന്നപ്പോള്‍, 2026 ജൂലൈയില്‍ അത് വെറും 14 17 ദശലക്ഷം യൂണിറ്റ് മാത്രമായി കുറഞ്ഞു.

അണക്കെട്ടുകളിലെ ജലനിരപ്പ്: നമ്മുടെ അണക്കെട്ടുകളിലെ ജലം 2025 ജൂലൈയില്‍ 60% ഉണ്ടായിരുന്ന സ്ഥാനത്ത്, 2026 ജൂലൈയില്‍ അത് 28% മാത്രമാണ്. ഇടുക്കി ജില്ലയില്‍ മാത്രം മഴലഭ്യതയില്‍ 55% കുറവാണ് രേഖപ്പെടുത്തിയിട്ടുള്ളത്.

പ്രതിസന്ധിക്ക് കാരണമായ പ്രധാന ഘടകങ്ങള്‍:

കാലാവസ്ഥാ വ്യതിയാനം: എല്‍നിനോ പ്രതിഭാസത്തെ തുടര്‍ന്ന് മഴയുടെ ലഭ്യതയിലുണ്ടായ കുറവും അന്തരീക്ഷ ഊഷ്മാവ് ഉയര്‍ന്നതും വൈദ്യുതി ഉപയോഗം കുത്തനെ കൂട്ടി. രാജ്യവ്യാപകമായി ഉണ്ടായിട്ടുള്ള ഈ വൈദ്യുതി പ്രതിസന്ധി സംബന്ധിച്ച് കേന്ദ്ര സര്‍ക്കാര്‍ സംസ്ഥാനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്.

കരാര്‍ പ്രകാരമുള്ള തിരിച്ചടവ്: വേനല്‍ക്കാലമായ മാര്‍ച്ച്, ഏപ്രില്‍ മാസങ്ങളിലെ ഉപയോഗത്തിനായി നമ്മള്‍ മറ്റു സംസ്ഥാനങ്ങളില്‍ നിന്ന് കടം വാങ്ങിയ 530 മെഗാവാട്ട് വൈദ്യുതി, കൈമാറ്റ കരാര്‍ പ്രകാരം സെപ്റ്റംബര്‍ 15നകം തിരിച്ചു നല്‍കേണ്ട ബാധ്യത നിലനില്‍ക്കുന്നതും പ്രതിസന്ധി രൂക്ഷമാക്കി. പൂര്‍വ്വകാല കരാറുകള്‍ റദ്ദാക്കപ്പെട്ടത്: മുന്‍ വൈദ്യുതി മന്ത്രി ബഹു. ആര്യാടന്‍ മുഹമ്മദിന്റെ സമയത്ത് ഒപ്പുവെച്ച, യൂണിറ്റിന് 4.29 രൂപ നിരക്കില്‍ വൈദ്യുതി ലഭ്യമായിരുന്ന ദീര്‍ഘകാല കരാറുകള്‍ പിന്നീട് റദ്ദാക്കപ്പെട്ടതും നിലവിലെ പ്രതിസന്ധിക്ക് കാരണമായിട്ടുണ്ട്.

പകല്‍ സോളാര്‍ വൈദ്യുതിയുടെ സംഭരണ പരിമിതി: പകല്‍ സമയത്ത് ലഭ്യമാകുന്ന സോളാര്‍ വൈദ്യുതി രാത്രികാല ഉപയോഗത്തിനായി വലിയ തോതില്‍ സംഭരിച്ചു വെക്കാന്‍ കഴിയാത്തത്.