പാക് മന്ത്രിയെ അടുപ്പിച്ചില്ല... ചൈനീസ് വിദേശകാര്യ മന്ത്രിയുമായി എസ് ജയശങ്കര് കൂടിക്കാഴ്ച നടത്തി; 12 വര്ഷത്തെ ഇടവേളയ്ക്കുശേഷം ഒരു പാക് വിദേശമന്ത്രി ഇന്ത്യ സന്ദര്ശിച്ചെങ്കിലും ചര്ച്ചയ്ക്ക് വിളിച്ചില്ല; ചൈനയോട് കാര്യങ്ങള് വെട്ടിത്തുറന്ന് പറഞ്ഞ് ജയശങ്കര്
കുറേ നാളുകളായി ചൈന അതിര്ത്തിയില് ഇന്ത്യയുടെ മനസമാധാനം കളയുകയാണ്. അതിനാല് തന്നെ ചൈനീസ് വിദേശകാര്യ മന്ത്രി ക്വിന് ഗാങുമായി വിദേശകാര്യമന്ത്രി എസ്. ജയശങ്കര് നടത്തിയ കൂടിക്കാഴ്ച ഏറെ ശ്രദ്ധിക്കപ്പെട്ടു. ഷാങ്ഹായ് കോര്പ്പറേഷന് ഓര്ഗനൈസേഷന് ഉച്ചകോടിയില് പങ്കെടുക്കാന് ക്വിന് ഗാങ് ഗോവയില് എത്തിയതിന് പിന്നാലെയാണ് ഇരുനേതാക്കളും തമ്മില് ചര്ച്ച നടന്നത്. അതിര്ത്തിയില് സമാധാനം ഉറപ്പാക്കണമെന്ന് ജയശങ്കര് ചൈനയോടാവശ്യപ്പെട്ടു.
ലഡാക്ക് അടക്കമുള്ള അതിര്ത്തി വിഷയങ്ങള് ചര്ച്ച ചെയ്തവയില് പെടുന്നു. ഉഭയകക്ഷി ബന്ധത്തെക്കുറിച്ചും അതിര്ത്തി പ്രദേശങ്ങളില് സമാധാനം ഉറപ്പാക്കുന്നതില് ശ്രദ്ധ കേന്ദ്രീകരിക്കുന്നതിനെക്കുറിച്ചും ചൈനീസ് വിദേശകാര്യ മന്ത്രിയുമായി ആശയവിനിമയം നടത്തിയെന്ന് ജയശങ്കര് ട്വീറ്റ് ചെയ്തു.
രണ്ടുമാസത്തിനിടെ രണ്ടാമത്തെ തവണയാണ് ഇരു വിദേശകാര്യ മന്ത്രിമാര് തമ്മില് ചര്ച്ച നടത്തുന്നത്. ജി 20 വിദേശകാര്യമന്ത്രിമാരുടെ യോഗത്തില് പങ്കെടുക്കാന് എത്തിയപ്പോഴും ഗാങും ജയശങ്കറുമായി ചര്ച്ച നടന്നിരുന്നു. റഷ്യന് വിദേശകാര്യ മന്ത്രിയുമായും ജയശങ്കര് ചര്ച്ച നടത്തി. യോഗത്തില് പങ്കെടുക്കാന് പാക് വിദേശകാര്യ മന്ത്രി ബിലാവല് ഭൂട്ടോയും ഗോവയിലെത്തിയിട്ടുണ്ട്.
രണ്ടുദിവസത്തെ ഷാങ്ഹായ് സഹകരണസംഘം സമ്മേളനത്തിനായി പാകിസ്താന് വിദേശകാര്യമന്ത്രി ബിലാവല് ഭൂട്ടോ സര്ദാരി ഗോവയിലെത്തി. 12 വര്ഷത്തെ ഇടവേളയ്ക്കുശേഷമാണ് ഒരു പാക് വിദേശമന്ത്രി ഇന്ത്യ സന്ദര്ശിക്കുന്നത്.
ഇന്ത്യ-പാക് നയതന്ത്രബന്ധത്തില് വിള്ളലുകള് തുടരുന്നതിനിടെയുള്ള സന്ദര്ശനം നിര്ണായകമാണെങ്കിലും ഉഭയകക്ഷിചര്ച്ച ഉണ്ടാവില്ലെന്ന് വിദേശമന്ത്രാലയവൃത്തങ്ങള് അറിയിച്ചു. എസ്.സി.ഒ.യുടേത് ബഹുരാഷ്ട്ര സമ്മേളനമാണ്. അതില് അധ്യക്ഷതവഹിക്കുന്ന വിദേശകാര്യമന്ത്രി എസ്. ജയ്ശങ്കറും ബിലാവലും തമ്മില് പ്രത്യേക കൂടിക്കാഴ്ചയുണ്ടാവില്ല. ചര്ച്ചയ്ക്കായി പാകിസ്താന്റെ ഭാഗത്തുനിന്ന് അഭ്യര്ഥനയുമുണ്ടായിട്ടില്ലെന്ന് അവര് വ്യക്തമാക്കി.
എസ്.സി.ഒ. ഭരണഘടനയോടുള്ള പാകിസ്താന്റെ പ്രതിജ്ഞാബദ്ധതയുടെ ഭാഗമായാണ് യോഗത്തില് പങ്കെടുക്കാന് തീരുമാനിച്ചതെന്ന് ബിലാവല് ഭൂട്ടോ ട്വീറ്റ് ചെയ്തു. ''എന്റെ നേതൃത്വത്തില് പാകിസ്താന്റെ പ്രതിനിധിസംഘം ഗോവയിലെത്തി. ഷാങ്ഹായ് സഖ്യത്തില്മാത്രമായിരിക്കും ഞങ്ങള് ശ്രദ്ധ കേന്ദ്രീകരിക്കുക. സുഹൃദ്രാജ്യങ്ങളില്നിന്നുള്ള മന്ത്രിമാരുമായി പുരോഗമനാത്മകചര്ച്ച നടത്തും''
2011-ല് ഹിന റബ്ബാനി കൗറിന്റെ സന്ദര്ശനത്തിനുശേഷം ആദ്യമായി ഇന്ത്യയിലെത്തുന്ന പാക് വിദേശമന്ത്രിയാണ് ബിലാവല്. എസ്.സി.ഒ.യോട് ഐക്യദാര്ഢ്യം പ്രഖ്യാപിച്ചാണ് യോഗത്തില് പങ്കെടുക്കുന്നതെന്ന് പാക് പ്രധാനമന്ത്രി ഷഹബാസ് ഷരീഫും പ്രതികരിച്ചു.
അതേസമയം സൂപ്പര് കംപ്യൂട്ടര് ഇന്റര്നെറ്റ് നിര്മിക്കാനൊരുങ്ങി ചൈനീസ് ശാസ്ത്ര സാങ്കേതിക വകുപ്പ്. സാങ്കേതിക കമ്പനികളും ഗവേഷകരും ഇതിന്റെ സാധ്യതകളെക്കുറിച്ച് ചര്ച്ചകള് നടത്താനായി തുറമുഖ നഗരമായ ടിയാന്ജിനില് ഒത്തുകൂടിയെന്ന് സൗത്ത് ചൈന മോണിംങ് പോസ്റ്റ് റിപോര്ട്ടു ചെയ്തു. സൂപ്പര്കപ്യൂട്ടര് ഇന്റര്നെറ്റ് ഉപയോഗിക്കുന്നവര്ക്ക് തങ്ങളുടെ ആവശ്യങ്ങള്ക്ക് ഒന്നിലേറെ സൂപ്പര്കംപ്യൂട്ടറുകളെ ഒരേസമയം ഉപയോഗിക്കാനാവും. വ്യോമയാനം, മരുന്നു നിര്മാണം, ഫിനാന്സ്, നിര്മിത ബുദ്ധി തുടങ്ങി പല മേഖലകളിലും സൂപ്പര്കംപ്യൂട്ടര് ഇന്റര്നെറ്റ് മുന്തൂക്കം നല്കുമെന്നാണ് ചൈന പ്രതീക്ഷിക്കുന്നത്.
ചൈനയിലെ യൂനിവേഴ്സിറ്റി സൂപ്പര് കംപ്യൂട്ടിങ് സെന്ററുകള് ഈ പദ്ധതിയുടെ ഭാഗമാവും. പല മേഖലകളിലേയും സങ്കീര്ണവും സമയമെടുക്കുന്നതുമായ പ്രശ്നങ്ങളെ വേഗത്തില് തീര്ക്കാന് ഈ സൂപ്പര് കംപ്യൂട്ടര് ഇന്റര്നെറ്റുകൊണ്ട് സാധിക്കും. എല്ലാമേഖലയിലേയും അറിവുകള് വളരെയധികം കൂടിയതും നിര്മിത ബുദ്ധിയുടെ പ്രയോഗവുമെല്ലാം സൂപ്പര്കംപ്യൂട്ടറുകളുടെ സാധ്യത വര്ധിപ്പിക്കുന്നുണ്ട്. മാത്രമല്ല ഇത്തരം സൂപ്പര് കംപ്യൂട്ടറുകളുടെ സേവനം ഉപയോഗിച്ച് പരസ്പരം വേഗത്തില് അറിവുകള് പങ്കുവയ്ക്കാനും വിവിധ മേഖലകളിലെ ഗവേഷകര്ക്ക് സാധിക്കും.
"
https://www.facebook.com/Malayalivartha
