ഡ്യൂട്ടിയില് ഇരിക്കെ അക്രമി സന്ദീപിന്റെ കുത്തേറ്റു മരിച്ച ഡോക്ടര് വന്ദന ദാസിനു അന്ത്യാഞ്ജലി.... വൈകാരികമായ രംഗങ്ങളാണ് അസീസിയ മെഡിക്കല് കോളേജില് അരങ്ങേറിയത്
ആശുപത്രിയില് ഡ്യൂട്ടിയില് ഇരിക്കെ അക്രമി സന്ദീപിന്റെ കുത്തേറ്റു മരിച്ച ഡോക്ടര് വന്ദന ദാസിനു അന്ത്യാഞ്ജലി. വന്ദന പഠിച്ച കൊല്ലം അസീസിയ കോളേജിലാണ് അന്ത്യാഞ്ജലി അര്പ്പിക്കാനായി മൃതദേഹം എത്തിച്ചത്. പൊതുപ്രവര്ത്തകരും ഡോക്ടര്മാരും ആരോഗ്യപ്രവര്ത്തകരും ഉള്പ്പെടെ നിരവധിയാളുകളാണ് വന്ദനയ്ക്ക് അന്ത്യാഞ്ജലിയര്പ്പിച്ചത്. അതേസമയം കൊല്ലം അസീസിയ കോളേജില് വ്യാപകമായ പ്രതിഷേധമാണ് ഡോക്ടര്മാരും ഹൗസ് സര്ജന്മാരും നടത്തിയത്. മറ്റുള്ളവരുടെ ജീവന് രക്ഷിക്കുന്ന ഞങ്ങള്ക്ക് ആര് സംരക്ഷണം നല്കും എന്നാണ് ഡോക്ടര്മാര് ഉയര്ത്തിയ മുദ്രാവാക്യം.
കൊല്ലം കൊട്ടാരക്കര താലൂക്ക് ആശുപത്രിയിലാണ് ഇന്നു പുലര്ച്ചെ ജോലിക്കിടെ വനിതാ ഡോക്ടറെ അക്രമി സന്ദീപ് കുത്തിക്കൊലപ്പെടുത്തിയത്. ഹൗസ് സര്ജന് ഡോ. വന്ദനാ ദാസാണ് (22)കൊല്ലപ്പെട്ടത്. പൊലീസ് പരിശോധനക്ക് എത്തിച്ച കൊല്ലം പൂയപ്പള്ളി സ്വദേശി സന്ദീപ് ആണ് ഡോക്ടറെ കുത്തിയത്. പൊലീസുകാര് ഉള്പ്പെടെ നാലുപേര്ക്കും ആക്രമണത്തില് പരിക്കേറ്റു. ലഹരിക്ക് അടിമയായ സന്ദീപുമായി പുലര്ച്ചെ നാലുമണിക്കാണ് പൊലീസ് കൊട്ടാരക്കര താലൂക്ക് ആശുപത്രിയില് എത്തിയത്. ചെറുകരക്കോണം സ്വദേശിയായ സാംദീപ് ലഹരിക്കടിമയാണെന്നാണ് പോലീസ് പറയുന്നത്. പ്രതി നടത്തിയ ആക്രമണത്തില് ഡോക്ടറുടെ ജീവന് പൊലിയുകയും ചെയ്തു.
മന്ത്രിമാരായ കെ.എന്.ബാലഗോപാല്, വി.എന്.വാസവനുമാണ് അസീസിയ മെഡിക്കല് കോളേജില് എത്തിയത്. വൈകാരികമായ രംഗങ്ങളാണ് അസീസിയ മെഡിക്കല് കോളേജില് അരങ്ങേറിയത്. ഒപ്പമുള്ള ഒരാളെ ദാരുണമായി നഷ്ടപ്പെട്ട ആഘാതത്തിലായിരുന്നു മെഡിക്കല് വിദ്യാര്ഥികളും ഡോക്ടര്മാരും ആരോഗ്യപ്രവര്ത്തകരും.
അസീസിയ മെഡിക്കല് കോളേജിലെ പൊതുദര്ശനത്തിനു ശേഷം മൃതദേഹം ജന്മനാടായ കോട്ടയം കടുത്തുരുത്തിയിലേക്ക് കൊണ്ടുപോകും. വ്യാഴാഴ്ച ഉച്ചയ്ക്ക് രണ്ടു മണിയോടെയാണ് വീട്ടില് സംസ്കാര ചടങ്ങുകള് നടത്തുന്നത് എന്നാണ് പുറത്ത് വന്ന വിവരം. നേരത്തെ തിരുവനന്തപുരത്ത് വളരെ വേഗത്തിലാണ് പൊതുദര്ശനം പൂര്ത്തിയാക്കിയത്. ആയിരങ്ങളാണ് വന്ദനയെ ഒരു നോക്കു കാണാന് തിരുവനന്തപുരം മെഡിക്കല് കോളേജിന്റെ മോര്ച്ചറിക്കു മുന്നില് തടിച്ചുകൂടിയത്.
https://www.facebook.com/Malayalivartha
