2021ലെ മാര്‍ഗ്ഗനിര്‍ദ്ദേശത്തില്‍ ഐ.എ.എസ് ഉദ്യോഗസ്ഥര്‍ക്ക് പഞ്ചിംഗ് നിര്‍ബന്ധമായിരുന്നില്ല. ഇതാണ് ഇപ്പോള്‍ മാറ്റിയത്. ഇന്നുമുതല്‍ ഐ.എ.എസുകാര്‍ ഉള്‍പ്പെടെയുള്ളവര്‍ ബയോമെട്രിക് പഞ്ചിംഗ് രേഖപ്പെടുത്തണം താത്ക്കാലിക ജീവനക്കാരും കരാര്‍ തൊഴിലാളികളും പഞ്ച് ചെയ്യേണ്ടതില്ല. രാവിലെ 10.15 മുതല്‍ വൈകിട്ട് 5.15 വരെയാണ് പ്രവൃത്തി സമയം.


ഒരു മാസത്തില്‍ അനുവദനീയമായ ഗ്രേസ് സമയം 300 മിനിട്ടാണ്. ഒരു ദിവസം ഗ്രേസ് സമയം പരമാവധി 60 മിനിട്ടായിരിക്കും. പൂര്‍ണ്ണ ദിവസത്തില്‍ ഗ്രേസ് സമയം അനുവദിച്ചിട്ടുള്ളത് രാവിലെ 10.15 മുതല്‍ 11.15 വരെയും വൈകിട്ട് 4.15 മുതല്‍ 5.15 വരെയുമാണ്. ഹാഫ് ഡേയ്ക്കും പരമാവധി 60 മിനിട്ട് ഗ്രേസ് സമയം വിനിയോഗിക്കാവുന്നതാണ്.


ഷിഫ്റ്റ് ഡ്യൂട്ടിയിലുള്ള ജീവനക്കാര്‍ക്ക് ഗ്രേസ് സമയമില്ല. ശമ്പള വിതരണ സോഫ്റ്റ്വെയറായ സ്പാര്‍ക്കില്‍ അവശേഷിക്കുന്ന ഗ്രേസ് സമയത്തെക്കാള്‍ കൂടുതല്‍ സമയം വിനിയോഗിച്ചാല്‍ ആ ദിവസം അവധിയായി കണക്കാക്കും. ഈ അവധി ക്രമീകരിച്ചു നല്‍കിയാലും പിന്നീട് പഴയ ഗ്രേസ് സമയം പുനഃസ്ഥാപിച്ച് നല്‍കില്ല.

ഒരു മാസം 16-ാം തീയതി മുതല്‍ അടുത്ത മാസം 15-ാംതീയതി വരെയുള്ള ഹാജര്‍ കണക്കാക്കിയാണ് ശമ്പള ബില്‍ തയ്യാറാക്കുന്നത്. ഇക്കാലയളവിലെ അവധികള്‍ സ്പാര്‍ക്കിലൂടെ നല്‍കിയില്ലെങ്കില്‍ അനധികൃത അവധിയായി കണക്കാക്കി ശമ്പളം കുറയ്ക്കും.

പിന്നീട് അവധിയപേക്ഷ സമര്‍പ്പിക്കുമ്പോള്‍ ശമ്പളം അനുവദിക്കും.മറ്റ് പ്രധാന നിര്‍ദ്ദേശങ്ങള്‍ പൂര്‍ണ്ണ ദിവസം പുറത്ത് ഡ്യൂട്ടിയുള്ള ജീവനക്കാര്‍ പഞ്ച് ചെയ്യരുത്

രാവിലെ പുറത്ത് ഡ്യൂട്ടിയുള്ളവര്‍ 2 മണിക്ക് മുമ്പ് ഇന്‍ പഞ്ചിംഗ് രേഖപ്പെടുത്തുകയും 5.15ന് ശേഷം ഔട്ട് പഞ്ചിംഗും രേഖപ്പെടുത്തണം. ഈ ദിവസങ്ങളില്‍ 60 മിനിട്ട് ഗ്രേസ് ടൈമും ലഭിക്കും

ഉച്ചയ്ക്കുശേഷം പുറത്ത് ഡ്യൂട്ടിയുള്ള ജീവനക്കാര്‍ രാവിലെ 11.15ന് മുമ്പ് ഇന്‍ പഞ്ചിംഗും ഉച്ചയ്ക്ക് 1.15ന് ശേഷം ഔട്ട് പഞ്ചിംഗും രേഖപ്പെടുത്തണം

പ്രത്യേക പോസ്റ്റിംഗ് ലഭിക്കാത്ത ഗസറ്റഡ് ജീവനക്കാര്‍ നിലവില്‍ പഞ്ച് ചെയ്യേണ്ട. നോണ്‍ ഗസറ്റഡ് ജീവനക്കാര്‍ പഞ്ച് ചെയ്യണം

ഒറ്റത്തവണ മാത്രമുള്ള പഞ്ചിംഗ് വര്‍ഷത്തില്‍ 2 തവണ ക്രമീകരിക്കാവുന്നതാണ് അതിനുശേഷമുള്ളവ അര്‍ഹമായ ലീവായി മാത്രമേ ക്രമീകരിക്കാനാവൂ

പൊതുഅവധി ദിവസങ്ങളില്‍ ഡ്യൂട്ടിക്ക് ഹാജരായാലും പഞ്ച് ചെയ്യണം. ഇതിനുള്ള കോമ്പന്‍സേറ്ററി ഓഫ് അനുവദിക്കും

അവധി/ഔട്ട് സൈഡ് ഡ്യൂട്ടി അപേക്ഷകള്‍ സ്പാര്‍ക്ക് മുഖേന അതത് മേലധികാരികള്‍ക്ക് സമര്‍പ്പിച്ച് അംഗീകാരം നേടണം ധന - ഭരണ വകുപ്പുകള്‍ മുഖേനയുള്ള അവധികള്‍ സര്‍ക്കുലര്‍ നിര്‍ദ്ദേശങ്ങളുടെ അടിസ്ഥാനത്തില്‍ അപേക്ഷ സമര്‍പ്പിച്ച് അംഗീകാരം നേടണം

ഗ്രേസ് സമയം കഴിഞ്ഞ് ജീവനക്കാര്‍ താമസിച്ചു വരികയും നേരത്തെ പോവുകയും ചെയ്താല്‍ അവധി അപേക്ഷ സമര്‍പ്പിച്ചില്ലെങ്കില്‍ ശമ്പളം തടയും ഡെപ്യൂട്ടേഷനില്‍ പോകുന്ന ഉദ്യോഗസ്ഥര്‍ അക്കാര്യം പൊതുഭരണ വകുപ്പിനെ അറിയിക്കുകയും വേണം.


മാസം 10 മണിക്കൂറോ അതിലധികമോ അധികസമയം ജോലി ചെയ്യുന്ന ഗസറ്റഡ് ഉദ്യോഗസ്ഥര്‍ ഉള്‍പ്പെടെയുള്ളവര്‍ക്ക് ഒരു കോമ്പന്‍സേറ്ററി ഓഫ് അനുവദിക്കാം.