അരിക്കൊമ്പനെ നാടുകടത്തിയിട്ട് ആഴ്ചകള്‍ പിന്നിട്ടിട്ടും അരിക്കൊമ്പന്‍ വാര്‍ത്തകളില്‍ നിറയുന്നു. കേരളം വിട്ടിട്ടും റേഷനരിക്കു പിന്നാലെയാണ് അരിക്കൊമ്പന്‍. തമിഴ്‌നാട്ടിലെ മേഘമലയ്ക്കു സമീപം മണലാര്‍ എസ്റ്റേറ്റിലെ റേഷന്‍കടയുടെ വാതിലും ജനലും അരിക്കൊമ്പന്‍ തകര്‍ത്തെങ്കിലും അരി തിന്നാതെ മടങ്ങി. അതെന്തെന്ന് വനം വകുപ്പിന് പിടികിട്ടുന്നില്ല.

കടയുടെ സമീപത്തെ സിസിടിവി ദൃശ്യം പരിശോധിച്ച് അരിക്കൊമ്പന്‍ തന്നെയാണ് ആക്രമണത്തിനു പിന്നിലെന്നു തമിഴ്‌നാട് വനം വകുപ്പ് സ്ഥിരീകരിച്ചു. ഇന്നലെ വൈകിട്ടുള്ള വിവരം അനുസരിച്ച് ആന കേരള-തമിഴ്‌നാട് അതിര്‍ത്തിയിലെ വട്ടപ്പാറയിലാണുള്ളത്.പുലര്‍ച്ചെ രണ്ടിനു ശേഷമായിരുന്നു മണലാറിലെ ആക്രമണം. എസ്റ്റേറ്റിലെ റേഷന്‍കടയില്‍ തകര ഷീറ്റുകൊണ്ട് മറച്ചിരുന്ന ജനലും വാതിലുമാണു കൊമ്പന്‍ തകര്‍ത്തത്. സമീപത്തെ ലയത്തിന്റെ ഒരു വാതില്‍ തുറക്കാനും ശ്രമിച്ചു.

ഇന്നലെ പുലര്‍ച്ചെയോടെ ആന പെരിയാര്‍ കടുവാസങ്കേതത്തിലെ വനമേഖലയിലെത്തി. കാട്ടാന അതിര്‍ത്തി കടന്നെത്തിയപ്പോള്‍ അപ്പര്‍മണലാര്‍ ഭാഗത്ത് കേരള വനം വകുപ്പിന്റെ ഒരു താല്‍ക്കാലിക ഷെഡ്ഡും ഭാഗികമായി തകര്‍ന്നുവീണു.

ഷെഡ് ആന തകര്‍ത്തതല്ലെന്നും കടന്നുപോയ വഴി യാദൃച്ഛികമായി തകര്‍ന്നു വീണതാണെന്നും വനം വകുപ്പ് അറിയിച്ചു. ഒരാഴ്ചയിലധികമായി മേഘമലയിലെ വനമേഖലയിലും തേയിലത്തോട്ടത്തിലുമായി അരിക്കൊമ്പന്‍ ചുറ്റിത്തിരിയുകയാണ്. കഴുത്തില്‍ റേഡിയോ കോളറുള്ളതിനാല്‍ അരിക്കൊമ്പനെ നാട്ടുകാര്‍ക്കു തിരിച്ചറിയാന്‍ എളുപ്പമാണ്. തമിഴ്‌നാട്ടിലെ ജനവാസ മേഖലയിലിറങ്ങാതിരിക്കാന്‍ നിരീക്ഷണത്തിനായി 30 അംഗ സംഘത്തെ തമിഴ്‌നാട് വനം വകുപ്പ് നിയോഗിച്ചിട്ടുണ്ട്.

തമിഴ്നാട്ടിലും റേഷന്‍ കട തേടിയെത്തിയെന്ന വാര്‍ത്ത പ്രചരിക്കുകയാണ്. കഴിഞ്ഞ കുറച്ചു ദിവസങ്ങളായി മേഘമലയില്‍ തുടരുന്ന അരിക്കൊമ്പന്‍ മണലാര്‍ എസ്റ്റേറ്റിനടുത്ത റേഷന്‍ കടയുടെ വാതില്‍ തള്ളിത്തുറക്കാന്‍ ശ്രമിച്ചു. അതേസമയം നാശനഷ്ടങ്ങളില്ല. കട തകര്‍ക്കാന്‍ ശ്രമിച്ചത് അരിക്കൊമ്പന്‍ തന്നെയാണെന്ന് തമിഴ്നാട് വനംവകുപ്പ് സ്ഥിരീകരിച്ചു.

ഞായറാഴ്ച വൈകീട്ട് ആറുമണിയോടു കൂടിയാണ് മണലാര്‍ എസ്റ്റേറ്റിലെ റേഷന്‍ കടയില്‍ അരിക്കൊമ്പന്‍ അരി തേടിയെത്തിയത്. തുടര്‍ന്ന് റേഷന്‍ കടയുടെ വാതില്‍ തുള്ളിത്തുറക്കാന്‍ ശ്രമിച്ചു. എന്നാല്‍ അരി എടുക്കുകയോ മറ്റു നാശനഷ്ടങ്ങള്‍ വരുത്തുകയോ ചെയ്തില്ലെന്നും അല്പനേരത്തിനു ശേഷം ആന മടങ്ങിപ്പോയെന്നും അധികൃതര്‍ അറിയിച്ചു. ഇതിന്റെ ദൃശ്യങ്ങള്‍ തമിഴ്നാട് വനംവകുപ്പിന്റെ കൈവശമുണ്ട്.

കഴിഞ്ഞ കുറച്ചു ദിവസങ്ങളായി തമിഴ്നാട് ചെക്ക്പോസ്റ്റിനും മേഘമലയ്ക്കും ഇടയിലുള്ള കടനാട് ആനന്ദ എസ്റ്റേറ്റ് മേഖലയിലാണ് അരിക്കൊമ്പന്‍ നിലയുറപ്പിച്ചിരിക്കുന്നത്. എന്നാല്‍ അവിടെനിന്ന് മാറി പെരിയാര്‍ കടുവാ സങ്കേതത്തിനു സമീപമുള്ള മണലാര്‍ എസ്റ്റേറ്റിലേക്ക് അരിക്കൊമ്പന്‍ എത്തിയിട്ടുണ്ട്. ഇവിടെനിന്ന് പെരിയാര്‍ സങ്കേതത്തിലേക്ക് അരിക്കൊമ്പന്‍ മടങ്ങിയാല്‍ അത് കേരളത്തിനും തമിഴ്നാടിനും ആശ്വാസമാകും.

അരിക്കൊമ്പന്‍ പെരിയാറിലേക്കു മടങ്ങാനുള്ള സാധ്യത മങ്ങിയതായി വിദഗ്ധര്‍. കഴിഞ്ഞ ഒരാഴ്ചയായി തമിഴ്‌നാട് വനമേഖലയില്‍ത്തന്നെയാണ് ആന ചുറ്റിത്തിരിയുന്നത്. മേഘമലയിലെ കറുപ്പസ്വാമി എന്നയാളുടെ ഉടമസ്ഥതയിലുള്ള എസ്റ്റേറ്റിനു സമീപത്തെ വനമേഖലയിലാണ് ആന 2 ദിവസമായി നിലയുറപ്പിച്ചിരിക്കുന്നത്. അതിന് മുന്‍പ് മറ്റൊരു എസ്റ്റേറ്റിലൂടെ ആന സഞ്ചരിക്കുന്ന ദൃശ്യങ്ങള്‍ പുറത്തുവന്നിരുന്നു. ആന ആരോഗ്യവാനാണ് എന്നാണ് തമിഴ്‌നാട് വനംവകുപ്പ് നല്‍കുന്ന വിവരം. കറുപ്പസ്വാമിയുടെ ഉടമസ്ഥതയിലുള്ള എസ്റ്റേറ്റിന്റെ 500 മീറ്റര്‍ ചുറ്റളവിലാണ് കഴിഞ്ഞ ദിവസങ്ങളിലായി ആന ചുറ്റിത്തിരിയുന്നത്.