സംസ്ഥാനത്തെ വനമേഖലകളില്‍ ഇന്നു മുതല്‍ മൂന്നുദിവസം കാട്ടാനകളുടെ കണക്കെടുപ്പ് നടക്കും. ആറുവര്‍ഷത്തെ ഇടവേളയ്ക്കശേഷമാണ് കേരളത്തില്‍ കാട്ടാനകളുടെ കണക്കെടുപ്പ് നടക്കുന്നത്. അതിര്‍ത്തി സംസ്ഥാനങ്ങളായ തമിഴ്‌നാട്, കര്‍ണാടക എന്നിവിടങ്ങളിലും ആന്ധ്രപ്രദേശിലും ഇതേ ദിവസങ്ങളില്‍ കണക്കെടുക്കും. സംസ്ഥാന അതിര്‍ത്തി കടന്നു കാട്ടാനകള്‍ സഞ്ചരിക്കുന്നതിനാലാണ് ഒന്നിച്ച് കണക്കെടുക്കുന്നത്.

ജില്ലയില്‍ പാലക്കാട് വനം ഡിവിഷനില്‍ 13 ബ്ലോക്കുകളാണുള്ളത്. മണ്ണാര്‍ക്കാട് ഡിവിഷനെ 27, സൈലന്റ് വാലിയെ 18 എന്നിങ്ങനെയും ബ്ലോക്കുകളാക്കി തിരിച്ചിട്ടുണ്ട്. ഭൂപടത്തില്‍ ആനകളുള്ള സ്ഥാനം അടയാളപ്പെടുത്തുന്നതിനാലും എല്ലായിടത്തും ഒരേസമയം പരിശോധന നടക്കുന്നതിനാലും എണ്ണത്തില്‍ ആവര്‍ത്തനമുണ്ടാകില്ലെന്നും ഉദ്യോഗസ്ഥര്‍ പറയുന്നു.

ചീഫ് വൈല്‍ഡ് ലൈഫ് വാര്‍ഡന്റെ മേല്‍നോട്ടത്തിലാണ് പരിശോധന. അഡീഷണല്‍ പ്രിന്‍സിപ്പല്‍ ചീഫ് കണ്‍സര്‍വേറ്റര്‍ (ഭരണം) സംസ്ഥാന തലത്തില്‍ നോഡല്‍ ഓഫീസറാകും. പെരിയാര്‍, പറമ്പിക്കുളം കടുവസങ്കേതങ്ങളിലെ ഫീല്‍ഡ് ഡയറക്ടര്‍മാരും പ്രവര്‍ത്തനങ്ങള്‍ ഏകോപിപ്പിക്കും. ശേഖരിച്ച വിവരങ്ങള്‍ ക്രോഡീകരിച്ച് പിന്നീട് പുറത്തുവിടും. കാട്ടാനകളുടെ കണക്കെടുപ്പിനൊപ്പം സസ്യജാലങ്ങളുടെ കണക്കെടുപ്പും നടക്കും.

ആനപ്പിണ്ടം പരിശോധിച്ചും കാല്‍പ്പാടുകള്‍ നോക്കിയും നേരിട്ടു കാണുന്നവയുടെ എണ്ണമെടുത്തുമാണ് ആനകളുടെ കണക്കെടുക്കുന്നത്. ഇത്തരത്തില്‍ ശേഖരിക്കുന്ന വിവരങ്ങള്‍ പ്രത്യേക ആപ്പ് വഴി ഭൂപടത്തില്‍ രേഖപ്പെടുത്തും. ആദ്യമായാണ് കാട്ടാന കണക്കെടുപ്പിന് ആപ്പും ഭൂപടവും ഉപയോഗപ്പെടുത്തുന്നത്.