പൊട്ടിത്തെറിക്കാതിരിക്കാന്... ഡല്ഹിയിലെത്തിയിട്ടും മുഖ്യമന്ത്രി പദം കിട്ടാക്കനിയാണെന്ന് ഡികെയ്ക്ക് മനസിലായി; ഖാര്ഗെയുടെ നിര്ദ്ദേശങ്ങളോട് പ്രതികരിക്കാതെ മടങ്ങി ശിവകുമാര്; അന്തിമ തീരുമാനം സോണിയ എത്തിയ ശേഷം; പ്രഖ്യാപനം ബെംഗളൂരുവില് നടത്തും
നല്ല ഭൂരിപക്ഷം കിട്ടിയിട്ടും മുഖ്യമന്ത്രിയെ പ്രഖ്യാപിക്കാനാകാതെ കോണ്ഗ്രസ് അലയുകയാണ്. ഡികെയെ പിണക്കി സിദ്ധരാമയ്യയെ മുഖ്യമന്ത്രിയാക്കിയാല് വലിയ പ്രത്യാഘാതം ഉണ്ടാകാന് സാധ്യതയുണ്ട്. അതിനാല് സോണിയാ ഗാന്ധിയെ കൊണ്ട് ഡികെയെ അനുനയിപ്പിക്കാനാണ് ശ്രമിക്കുന്നത്.
മുതിര്ന്ന നേതാവ് സിദ്ധരാമയ്യ കര്ണാടക മുഖ്യമന്ത്രിയായേക്കുമെന്നു തന്നെയാണ് സൂചന. അന്തിമ തീരുമാനം യുപിഎ അധ്യക്ഷ സോണിയ ഗാന്ധി ഡല്ഹിയിലെത്തിയ ശേഷമായിരിക്കും. ഷിംലയിലുള്ള അവര് ബുധനാഴ്ച ഡല്ഹിയിലെത്തും.
മുഖ്യമന്ത്രി ആരെന്ന കാര്യത്തില് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ തീരുമാനം എടുത്തില്ല. സോണിയാ ഗാന്ധിയുടെ അഭിപ്രായം കൂടി കണക്കിലെടുത്തായിരിക്കും തീരുമാനം. പാര്ലമെന്ററി പാര്ട്ടി യോഗം വീണ്ടും ചേര്ന്ന് മുഖ്യമന്ത്രിയെ പിസിസി അധ്യക്ഷന് ബെംഗളൂരുവില് പ്രഖ്യാപിക്കും. സത്യപ്രതിജ്ഞാ തീയതി നിയുക്ത മുഖ്യമന്ത്രി തീരുമാനിക്കും.
മുഖ്യമന്ത്രി പദത്തിന് അവകാശവാദം ഉന്നയിക്കുന്ന സിദ്ധരാമയ്യയുമായും ഡി.കെ.ശിവകുമാറുമായും മല്ലികാര്ജുന് ഖര്ഗെ കൂടിക്കാഴ്ച നടത്തി. കെ.സി.വേണുഗോപാലും സിദ്ധരാമയ്യയും തമ്മിലും കൂടിക്കാഴ്ച നടത്തി. ഭൂരിപക്ഷം എംഎല്എമാരുടെ പിന്തുണയുള്ള സിദ്ധരാമയ്യയെ കര്ണാടക മുഖ്യമന്തിയാക്കുന്നതിനോടാണു ഹൈക്കമാന്ഡിനു യോജിപ്പെങ്കിലും ഡി.കെ.ശിവകുമാറിനെ എങ്ങനെ അനുനയിപ്പിക്കുമെന്ന കാര്യത്തില് ആശയക്കുഴപ്പം നിലനില്ക്കുകയാണ്.
സോണിയയുടെ സാന്നിധ്യത്തില് സിദ്ധരാമയ്യയ്ക്കും ശിവകുമാറിനുമിടയില് സമവായം ഉറപ്പിക്കുകയാണു ഹൈക്കമാന്ഡിന്റെ ലക്ഷ്യം. സിദ്ധരാമയ്യയ്ക്കു കീഴില് ഉപമുഖ്യമന്ത്രിയായി ഇരിക്കാന് ശിവകുമാര് തയാറായേക്കില്ലെന്നും സൂചനയുണ്ട്. മുഖ്യമന്ത്രി സ്ഥാനം ലഭിച്ചില്ലെങ്കില് പ്രധാന വകുപ്പുകള്ക്കു മേല് ശിവകുമാര് അവകാശവാദമുന്നയിക്കും. മുഖ്യമന്ത്രി പദത്തിനു പുറമെ വകുപ്പുകളുടെ കാര്യത്തിലും ഹൈക്കമാന്ഡിനു തീരുമാനമെടുക്കേണ്ടി വരും. മല്ലികാര്ജുന് ഖര്ഗെ, രാഹുല് ഗാന്ധി, സംഘടനാകാര്യ ജനറല് സെക്രട്ടറി കെ.സി.വേണുഗോപാല് എന്നിവരുടെ നേതൃത്വത്തിലാണു സമവായ ചര്ച്ച.
ഹൈക്കമാന്ഡ് നിര്ദേശപ്രകാരം ഇന്നു ഡല്ഹിയിലെത്തിയ ഡികെ, 'പാര്ട്ടി അമ്മയെപോലെയാണ്, മകന് ആവശ്യമായതു പാര്ട്ടി നല്കും' എന്ന് പ്രതികരിച്ചിരുന്നു. മുഖ്യമന്ത്രിയെ തീരുമാനിക്കാന് ഞായറാഴ്ച രാത്രി ബെംഗളൂരുവില് ഹൈക്കമാന്ഡ് നിരീക്ഷകര് വിളിച്ച എംഎല്എമാരുടെ യോഗത്തില് സിദ്ധരാമയ്യയും ഡി.കെ.ശിവകുമാറും പദവിക്കായി അണിയറനീക്കം ശക്തമാക്കിയിരുന്നു. ഇതിനുശേഷമാണ് മുഖ്യമന്ത്രിയെ തീരുമാനിക്കാനുള്ള ശ്രമങ്ങള് ഡല്ഹിയിലേക്കു മാറ്റിയത്. സിദ്ധരാമയ്യ ഇന്നലെ ഡല്ഹിയിലെത്തിയിരുന്നു.
അതേസമയം കോണ്ഗ്രസ് അധ്യക്ഷന് മല്ലികാര്ജ്ജുന് ഖാര്ഗെയുടെ നിര്ദ്ദേശങ്ങളോട് പ്രതികരിക്കാതെ ഡികെ ശിവകുമാര്. ചര്ച്ചക്കു ശേഷം നിലപാട് വ്യക്തമാക്കാതെയാണ് ശിവകുമാര് മടങ്ങിയത്. മുഖ്യമന്ത്രി സ്ഥാനത്തെക്കുറിച്ചുള്ള ടേം വ്യവസ്ഥയോടും ശിവകുമാര് പ്രതികരിച്ചില്ല. അതേസമയം, ഇനിയും തുടര് ചര്ച്ചകള്ക്ക് സാധ്യതയെന്നാണ് വിവരം. ഖാര്ഗെയുമായുള്ള ചര്ച്ചക്ക് ശേഷം സിദ്ധരാമയ്യയും മടങ്ങിയിരിക്കുകയാണ്. അതേസമയം, ഇരുവരുമായും ചര്ച്ച നടത്തിയ ഖാര്ഗെ സോണിയ ഗാന്ധിയും, രാഹുല് ഗാന്ധിയുമായും ചര്ച്ച നടത്തുമെന്നാണ് വിവരം. മുഖ്യമന്ത്രി പ്രഖ്യാപനം ബെംഗളൂരുവില് നടത്തുന്നതിനെ കുറിച്ചും ആലോചനയുണ്ട്.
സിദ്ധരാമയ്യയെ മുഖ്യമന്ത്രിയാക്കാനുള്ള ധാരണയിലാണ് കോണ്ഗ്രസ് നേതൃത്വം. ദില്ലിയില് രാഹുല് ഗാന്ധി പങ്കെടുത്ത യോഗത്തിലാണ് ധാരണയായത്. ഡി കെ ശിവകുമാറിനെ ഉപമുഖ്യമന്ത്രിയാക്കാനും ധാരണയുണ്ട്. പിസിസി അധ്യക്ഷസ്ഥാനത്തും ഡികെ തുടരും. കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ സിദ്ധരാമയ്യയെയും ഡികെ ശിവകുമാറിനെയും കണ്ടു. തുടര്ന്ന് ഡികെ സോണിയാ ഗാന്ധിയുമായി കൂടിക്കാഴ്ച നടത്തും. സോണിയഗാന്ധി നേരിട്ട് ശിവകുമാറിനെ അനുനയിപ്പിക്കുമെന്നാണ് ലഭിക്കുന്ന വിവരം. രണ്ടാംഘട്ടത്തില് ഡികെയെ മുഖ്യമന്ത്രിയാക്കും.
"
https://www.facebook.com/Malayalivartha
