അയ്യപ്പന്റെ ചൈതന്യം ഒളിഞ്ഞിരിക്കുന്ന പൊന്നമ്പല മേട്ടിലെ ഒരു പൂജയാണ് ഇപ്പോള്‍ വാര്‍ത്തകള്‍ നിറയെ. രഹസ്യമായി പൂജനടത്തിയത് ആരുംഅറിയില്ലായിരുന്നു. എന്നാല്‍ ആരോ ചിത്രീകരിച്ച വീഡിയോ വൈറലായതോടെയാണ് ദേവസ്വം വകുപ്പ് രംഗത്തെത്തിയത്.

അതേസമയം പൂജ നടന്ന സ്ഥലം പൊന്നമ്പലമേടാണെന്ന് ഉറപ്പില്ലെന്ന് ദേവസ്വം ബോര്‍ഡ് പ്രസിഡന്റ് കെ അനന്തഗോപന്‍. ഇനി പൊന്നമ്പലമേടാണെങ്കില്‍ വനംവകുപ്പിന്റെ അനുമതിയോടെയാണോ അകത്തു കടന്നത് എന്ന് അന്വേഷിക്കണം. പൂജ നടത്തുന്നതായി ദൃശ്യങ്ങളില്‍ കാണുന്നയാള്‍ വലിയ തട്ടിപ്പുകാരന്‍ ആണ്.

ശബരിമല തന്ത്രിയുടെ ബോര്‍ഡ് വച്ച് കാര്‍ ഉപയോഗിച്ചിരുന്നു. ദേവസ്വം കമ്മീഷണര്‍ ഇന്ന് തന്നെ മന്ത്രിക്ക് റിപ്പോര്‍ട്ട് നല്‍കുമെന്നും ദേവസ്വം ബോര്‍ഡ് പറഞ്ഞു. അനധികൃതമായി വനത്തില്‍ കയറിയതിന് തമിഴ്‌നാട് സ്വദേശി നാരായണനെതിരെ വനം വകുപ്പ് കേസ് രജിസ്റ്റര്‍ ചെയ്തിട്ടുണ്ട്. പച്ചക്കാനം ഫോറെസ്റ്റ് സ്റ്റേഷനിലാണ് കേസ് എടുത്തത്. ഒരാഴ്ച മുന്‍പാണ് ഇയാള്‍ പൊന്നമ്പലമേട്ടില്‍ എത്തി പൂജ നടത്തിയത്. ശബരിമലയില്‍ മുമ്പ് കീഴ്ശാന്തിയുടെ സഹായിയായിരുന്നു നാരായണന്‍ എന്നാണ് വിവരം.

അതേസമയം സംഭവത്തില്‍ ദേവസ്വം മന്ത്രി കെ രാധാകൃഷ്ണന്‍ അടിയന്തിര റിപ്പോര്‍ട്ട് തേടിയിട്ടുണ്ട്. തിരുവിതാംകൂര്‍ ദേവസ്വം ബോര്‍ഡ് കമ്മീഷണറോട് ഇതേക്കുറിച്ച് വിശദമായി അന്വേഷിച്ച് റിപ്പോര്‍ട്ട് സമര്‍പ്പിക്കാനാണ് മന്ത്രി ആവശ്യപ്പെട്ടത്. സംഭവം വിശദമായ അന്വേഷിക്കണമെന്ന് ആവശ്യപ്പെട്ട് വനം വകുപ്പ് മേധാവിക്കും പൊലീസ് മേധാവിക്കും പരാതി നല്‍കുമെന്ന് ദേവസ്വം ബോര്‍ഡ് വ്യക്തമാക്കി.

അതേസമയം ശബരിമലയില്‍ സാമ്പത്തിക തട്ടിപ്പ് നടത്തിയതിന് പുറത്താക്കിയ പൂജാരിയുടെ നേതൃത്വത്തില്‍ പൊന്നമ്പലമേട്ടില്‍ അതിക്രമിച്ച് കടന്ന് പൂജ നടത്തിയ സംഘത്തിനെതിരെ വനംവകുപ്പ് ജാമ്യമില്ലാ വകുപ്പു പ്രകാരം കേസെടുത്തു

പെരിയാര്‍ കടുവാ സങ്കേതത്തിന്റെ ഭാഗവും ശബരിമലയുടെ കിഴക്കായി, മകരജ്യോതി തെളിയുന്ന പുണ്യകേന്ദ്രവുമായ പൊന്നമ്പലമേട്ടില്‍ സന്ദര്‍ശക വിലക്ക് ലംഘിച്ചാണ് തൃശൂര്‍ തെക്കേക്കാട്ടുമഠം നാരായണന്‍ തിരുമേനിയുടെ നേതൃത്വത്തില്‍ തമിഴ്‌നാട്ടില്‍ നിന്നെത്തിയ സംഘം പൂജ നടത്തിയത്.

പൊന്നമ്പലമേട്ടിലെ തറയിലിരുന്ന് നാരായണന്‍ തിരുമേനി കളംവരച്ച് പൂജനടത്തുന്നത് ഒപ്പമുണ്ടായിരുന്നവര്‍ വീഡിയോയില്‍ പകര്‍ത്തി സമൂഹമാദ്ധ്യമങ്ങളില്‍ പ്രചരിപ്പിച്ചിരുന്നു. വീഡിയോ കണ്ട തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് അഡ്വ. കെ. അനന്തഗോപന്‍ ഡി.ജി.പിക്കും വനംവകുപ്പിനും പരാതി നല്‍കി. തുടര്‍ന്നാണ് പച്ചക്കാനം ഫോറസ്റ്റ് സ്റ്റേഷനില്‍ കേസെടുത്തത്.

മുന്‍പ് ശബരിമല കീഴ്ശാന്തിയുടെ സഹായിയായി സന്നിധാനത്ത് ഉണ്ടായിരുന്നപ്പോഴാണ് ഇയാള്‍ ക്രമക്കേട് കാട്ടിയത്. പുറത്താക്കിയെങ്കിലും തമിഴ്‌നാട്ടുകാര്‍ക്കൊപ്പം എല്ലാ മാസവും ഇയാള്‍ ശബരിമലയിലെത്താറുണ്ട്. വാഹനത്തില്‍ ശബരിമല തന്ത്രി എന്ന് ബോര്‍ഡ് വച്ചതിനും ഇയാള്‍ക്കെതിരെ കേസെടുത്തിട്ടുണ്ടെന്ന് പറയുന്നു. അതേസമയം പൊന്നമ്പലമേട്ടില്‍ വനംവകുപ്പിന്റെ മൗനാനുവാദത്തോടെ ആളുകള്‍ എത്തുന്നുണ്ടെന്ന പരാതികളുണ്ട്.

നാരായണന്‍ നമ്പൂതിരിയും സംഘവും എത്തിയതും ഉദ്യോഗസ്ഥരെ സ്വാധീനിച്ചാണെന്ന് സൂചനയുണ്ട്.നാരായണ സ്വാമിക്കെതിരെ ചുമത്തിയത് ഏഴുവര്‍ഷം വരെ വരെ തടവുശിക്ഷ ലഭിക്കാവുന്ന കേരള വന നിയമം വകുപ്പുകളാണ്.

പൊന്നമ്പലമേട്ടില്‍ അനുവാദമില്ലാതെ ആരേയും വനംവകുപ്പ് പ്രവേശിപ്പിക്കാറില്ല. മകരവിളക്ക് പൂജയ്ക്ക് ദേവസ്വം ബോര്‍ഡ് നിശ്ചയിക്കുന്നവര്‍ക്കൊപ്പം പൊലീസിന്റെയും വനംവകുപ്പിന്റെയും വൈദ്യുതി ബോര്‍ഡിന്റെയും അധികൃതര്‍ എത്താറുണ്ട്. കുമളി-പച്ചക്കാനം റോഡില്‍ പച്ചക്കാനം ഈസ്റ്റില്‍ നിന്ന് ജീപ്പു റോഡിലൂടെയും കൊച്ചുപമ്പയില്‍ നിന്നും പമ്പയില്‍ നിന്നും വനത്തിലൂടെയും പൊന്നമ്പലമേട്ടിലെത്താം. കൊച്ചുപമ്പയിലും പച്ചക്കാനത്തും വനംവകുപ്പിന്റെ ചെക്കുപോസറ്റുണ്ട്. സ്വകാര്യ വാഹനത്തിലെത്തുന്നവര്‍ക്ക് വനംവകുപ്പിന്റെ അനുമതിയില്ലാതെ കടക്കാനാവില്ല.

അയ്യപ്പ ഉപാസകനാണ് താനെന്ന് നാരായണന്‍ തിരുമേനി സോഷ്യല്‍ മീഡിയയിലൂടെ പറഞ്ഞു. സന്യാസ തുല്യമായ ജീവിതമാണ്. തൃശൂര്‍ സ്വദേശിയാണെങ്കിലും അയ്യപ്പ പൂജകളുമായി തമിഴ്‌നാട്ടിലാണ്. പൊന്നമ്പലമേട്ടില്‍ അയ്യപ്പന്റെ പൂജകള്‍ മാത്രമാണ് നടത്തിയത്. ഒരു തെറ്റും ചെയ്തിട്ടില്ലെന്നും അദ്ദേഹം പറഞ്ഞു.