സഹിക്കാനാവാതെ ചൈന... ബൈഡനെ വിസ്മയിപ്പിച്ച പ്രധാനമന്ത്രി നരേന്ദ്ര മോദി വൈറ്റ് ഹൗസില്; ഇന്ത്യ അമേരിക്ക ബന്ധം ലോക നന്മയ്ക്കെന്ന് ബൈഡന്; ഇന്ത്യ യുഎസ് ബന്ധം സുശക്തം; യുദ്ധവിമാന എന്ജിന് ഇന്ത്യയില് നിര്മിക്കാന് യുഎസുമായി ധാരണ
പ്രധാനമന്ത്രി നരേന്ദ്ര മോദിയുടെ ആരാധകനായി മാറിയ അമേരിക്കന് പ്രസിഡന്റ് ജോ ബൈഡനുമായുള്ള കൂടിക്കാഴ്ച വല്ലാത്ത അനുഭവമായി. നരേന്ദ്ര മോദിക്ക് സന്തോഷത്തോടെ ആതിഥ്യമരുളി അമേരിക്കന് പ്രസിഡന്റ് ജോ ബൈഡന്റെ ഔദ്യോഗിക വസതിയായ വൈറ്റ് ഹൗസ്. അമേരിക്കന് പ്രസിഡന്റ് ജോ ബൈഡനുമായുള്ള കൂടിക്കാഴ്ചയ്ക്ക് മുന്നോടിയായി ഇരു നേതാക്കളും വൈറ്റ് ഹൗസില് ജനത്തെ അഭിസംബോധന ചെയ്തു. ഇന്ത്യ അമേരിക്ക ബന്ധം ലോകനന്മയ്ക്കെന്ന് ബൈഡന് ചടങ്ങില് പറഞ്ഞു.
ഇന്ത്യയും അമേരിക്കയും പങ്കിടുന്നത് ഒരേ മൂല്യങ്ങളാണെന്ന് അമേരിക്കന് പ്രസിഡന്റ് പറഞ്ഞു. ഇരുരാജ്യങ്ങള്ക്കുമിടയില് ശക്തമായ ബന്ധമാണ് ഉള്ളതെന്നും അദ്ദേഹം പറഞ്ഞു. അമേരിക്കയില് തനിക്ക് ലഭിച്ച വരവേല്പ്പ് 140 കോടി ഇന്ത്യാക്കാര്ക്കുള്ള ആദരമാണെന്ന് പ്രധാനമന്ത്രി നരേന്ദ്ര മോദിയും പ്രസംഗത്തില് പറഞ്ഞു. ഇന്ത്യന് വംശജയായ യുഎസ് വൈസ് പ്രസിഡന്റ് കമല ഹാരിസിന്റെ ജീവിതം അടക്കം പരാമര്ശിച്ചാണ് ഇന്ത്യാ - അമേരിക്ക ബന്ധത്തിന്റെ തീവ്രതയെ കുറിച്ച് ജോ ബൈഡന് വാചാലനായി.
അമേരിക്കയുടെ വളര്ച്ചയ്ക്ക് പ്രവാസികളായ ഇന്ത്യാക്കാരുടെ പങ്ക് വളരെ വലുതാണ്. വൈവിധ്യവും, മതങ്ങളിലെ നാനാത്വവും ഇരു രാജ്യങ്ങളുടെയും ശക്തിയാണ്. ഇന്ത്യ - അമേരിക്ക ബന്ധത്തിന്റെ സാധ്യതകള് വളരെ വലുതാണ്. രണ്ട് മഹത്തായ രാഷ്ട്രങ്ങള്, രണ്ട് ഉറ്റസുഹൃത്തുക്കള്, രണ്ട് ലോക ശക്തികള്, അതാണ് അമേരിക്കയും ഇന്ത്യയും. 21ാം നൂറ്റാണ്ടിന്റെ ഗതി നിര്ണയിക്കുന്ന ശക്തികളാണ് ഇന്ത്യയും അമേരിക്കയുമെന്നും അദ്ദേഹം കൂട്ടിച്ചേര്ത്തു.
അമേരിക്കയിലെ ഇന്ത്യന് സമൂഹത്തിന്റെ അര്പ്പണവും, പരിശ്രമവും ഇന്ത്യയുടെ യശസ്സ് ഉയര്ത്തിയെന്ന് പ്രധാനമന്ത്രി നരേന്ദ്ര മോദി പറഞ്ഞു. ഇരു രാജ്യങ്ങളും തമ്മിലുള്ള ബന്ധത്തിന്റെ ശക്തമായ അടിത്തറ ഇന്ത്യന് സമൂഹമാണ്. വൈവിധ്യങ്ങളില് അഭിമാനിക്കുന്നവരാണ് ഇന്ത്യാക്കാര്. 30 വര്ഷങ്ങള്ക്ക് മുന്പ് ഞാന് അമേരിക്കയില് വന്നപ്പോള് വൈറ്റ് ഹൗസ് പുറത്ത് നിന്നാണ് കണ്ടത്. ഇതാദ്യമായാണ് ഇത്രയധികം ഇന്ത്യാക്കാര്ക്ക് അതിഥേയത്വം അരുളാനായി വൈറ്റ് ഹൗസിന്റെ ഗേറ്റ് തുറക്കപ്പെടുന്നത്.
ഇന്ത്യന് സമൂഹം ഇരുരാജ്യങ്ങള്ക്കുമിടയിലെ ബന്ധം നിലനിര്ത്തുന്നതിനുള്ള പാലമായി വര്ത്തിക്കും. കൊവിഡിന് ശേഷമുള്ള ലോകക്രമത്തെ ശക്തിപ്പെടുത്തി മുന്നോട്ട് കൊണ്ടുപോകുന്നതില് ഇന്ത്യയും അമേരിക്കയും ഒന്നിച്ച് നിന്ന് പ്രവര്ത്തിക്കും. ലോക സമാധാനത്തിനും ലോകനന്മയ്ക്കും സ്ഥിരതയ്ക്കും പുരോഗതിക്കും ബന്ധം ശക്തിയേകുമെന്നും അദ്ദേഹം പറഞ്ഞു.
ഇന്ത്യയില് ന്യൂനപക്ഷങ്ങളോടു വിവേചനമില്ലെന്നു പ്രധാനമന്ത്രി നരേന്ദ്ര മോദി പറഞ്ഞു. ഭരണഘടന അധിഷ്ഠിതമാക്കി പ്രവര്ത്തിക്കുന്ന കേന്ദ്ര സര്ക്കാര് ജാതിമതലിംഗ വേര്തിരിവില്ലാതെയാണു നയങ്ങള് നടപ്പാക്കുന്നതെന്നു മോദി പറഞ്ഞു. രാജ്യത്തെ അഭിപ്രായസ്വാതന്ത്ര്യവും ന്യൂനപക്ഷങ്ങളുടെ അവകാശസംരക്ഷണവും സംബന്ധിച്ച ചോദ്യങ്ങളോടു പ്രതികരിക്കുകയായിരുന്നു മോദി.
ഇന്ത്യയുടെ ഏറ്റവും വലിയ വ്യാപാര പങ്കാളിയാണ് യുഎസ്. അതിര്ത്തി കടന്നുള്ള ഭീകരവാദം തടയാന് ശക്തമായ നടപടികള് വേണം. ഭീകരതയ്ക്കെതിരെ തോളോടുതോള് ചേര്ന്നു പ്രവര്ത്തിക്കും. ഇന്തോപസിഫിക് മേഖലയില് സമാധാന അന്തരീക്ഷം നിലനിര്ത്താന് സഹകരിക്കും. 'ക്വാഡ്' പങ്കാളിത്തം അതിനായി ഉപയോഗിക്കും.
ഇന്ത്യന് വ്യോമസേനയ്ക്കായി ഇന്ത്യയില്ത്തന്നെ യുദ്ധവിമാന എന്ജിന് നിര്മിക്കാന് യുഎസ് കമ്പനി ജനറല് ഇലക്ട്രിക്കും കേന്ദ്രസര്ക്കാര് ഉടമസ്ഥതയിലുള്ള ഹിന്ദുസ്ഥാന് എയ്റോനോട്ടിക്സ് ലിമിറ്റഡും തമ്മില് ധാരണയായി. യുദ്ധവിമാന എന്ജിന് നിര്മിക്കുന്നതിനുള്ള സാങ്കേതികവിദ്യ ലഭിക്കുന്നത് പ്രതിരോധ മേഖലയില് ഇന്ത്യയ്ക്കു നേട്ടമാണ്.
യുഎസ് പ്രസിഡന്റ് ജോ ബൈഡനും പ്രധാനമന്ത്രി നരേന്ദ്ര മോദിയുമായി വൈറ്റ്ഹൗസില് നടന്ന കൂടിക്കാഴ്ചയ്ക്കു ശേഷമാണ് സുപ്രധാന കരാറുകള് പ്രഖ്യാപിച്ചത്. ബെംഗളൂരുവിലും അഹമ്മദാബാദിലും യുഎസ് കോണ്സുലേറ്റുകള് തുറക്കും. യുഎസില് ഇപ്പോഴുള്ള 5 കോണ്സുലേറ്റുകള്ക്കു പുറമേ സിയാറ്റിലില് ഇന്ത്യയുടെ കോണ്സുലേറ്റ് പ്രവര്ത്തനമാരംഭിക്കും. അലാസ്ക മേഖലയും ഇതിന്റെ പരിധിയില് വരും. യുഎസ് പാര്ലമെന്റിന്റെ സംയുക്ത സമ്മേളനത്തിലും മോദി പ്രസംഗിച്ചു.
https://www.facebook.com/Malayalivartha
