കെ. വിദ്യ ആശുപത്രി വിട്ടു... ഭക്ഷണവും വെളളവും കഴിക്കാത്തതിനെ തുടര്ന്ന് നിര്ജലീകരണം മൂലം ദേഹാസ്വാസ്ഥ്യം അനുഭവപ്പെടുകയായിരുന്നുവെന്ന് ഡോക്ടര്മാര്
വ്യാജ എക്സ്പീരിയന്സ് സര്ട്ടിഫിക്കറ്റ് കേസില് ചോദ്യം ചെയ്യലിനിടെ ദേഹാസ്വാസ്ഥ്യം അനുഭവപ്പെട്ടതിനെ തുടര്ന്ന് ആശുപത്രിയില് പ്രവേശിപ്പിച്ച കെ. വിദ്യ ആശുപത്രി വിട്ടു. ആരോഗ്യനില തൃപ്തികരമാണെന്ന് വിദ്യയെ പ്രവേശിപ്പിച്ച കോട്ടത്തറ ആശുപത്രിയിലെ ഡോക്ടര്മാര് അറിയിച്ചു. ഭക്ഷണവും വെളളവും കഴിക്കാത്തതിനെ തുടര്ന്ന് നിര്ജലീകരണം മൂലം ദേഹാസ്വാസ്ഥ്യം അനുഭവപ്പെടുകയായിരുന്നു. വ്യാജ സര്ട്ടിഫിക്കറ്റ് ഹാജരാക്കിയ അട്ടപ്പാടി കോളേജിലെ പ്രിന്സിപ്പല്, ഇന്റര്വ്യൂ ബോര്ഡിലുണ്ടായിരുന്ന മറ്റ് അധ്യാപകര് എന്നിവരുടെ സാന്നിധ്യത്തില് വിദ്യയെ വിശദമായി ചോദ്യം ചെയ്യാനായിരുന്നു നീക്കം. എന്നാല് അതിനു തൊട്ടു മുമ്പ് വിദ്യയ്ക്ക് ദേഹാസ്വാസ്ഥ്യം അനുഭവപ്പെട്ടെന്നാണ് പൊലീസ് പറയുന്നത്. കസ്റ്റഡി കാലാവധി അവസാനിക്കുന്നതോടെ വിദ്യയെ നാളെ ഉച്ചയോടെ മണ്ണാര്ക്കാട് കോടതിയില് ഹാജരാക്കും.
കൂട്ടുകാരിയ്ക്കൊപ്പമുള്ള സെല്ഫിയിലൂടെയാണ് ദിവസങ്ങള്ക്ക് ശേഷം വിദ്യയുടെ ഒളിയിടം പൊലീസ് കണ്ടെത്തിയത്. കൂട്ടുകാരിയുടെ ഫോണില് നിന്നാണ് വിദ്യക്കൊപ്പമുള്ള സെല്ഫി കണ്ടെത്തിയത്. സെല്ഫിയെടുത്തത് നാലു ദിവസം മുമ്പാണെന്ന് പൊലീസ് കണ്ടെത്തി. സുഹൃത്തിന്റെ ഫോണിലൂടെയായിരുന്നു ഒളിവില് വിദ്യ വിവരങ്ങള് അറിഞ്ഞത്. ഇതിനായി സുഹൃത്ത് പുതിയ സിം കാര്ഡ് എടുത്തിരുന്നു. ഈ ഫോണ് ലൊക്കേഷന് കേന്ദ്രീകരിച്ചാണ് പൊലീസ് അന്വേഷണം നടത്തിയത്. ഇതൊക്കെയാണെങ്കിലും വിദ്യയെ ഒളിവില് കഴിയാന് സഹായിച്ചവര്ക്കെതിരെ കേസെടുക്കാന് പൊലീസ് ഉദ്ദേശിക്കുന്നില്ല. വിദ്യയുടേത് ഗുരുതര കുറ്റമല്ലെന്നാണ് പൊലീസിന്റെ വിശദീകരണം.
വ്യാജ എക്സ്പീരിയന്സ് സര്ട്ടിഫിക്കറ്റ് വിദ്യയുടെ മൊബൈല് ഫോണിലുണ്ടെന്നാണ് സൂചന. ഇവരുടെ ഫോണിലെ പല ഇമെയിലുകളും ഡിലീറ്റ് ചെയ്ത നിലയിലാണ്. സൈബര് വിദഗ്ദ്ധന് ഉടന് ഫോണ് പരിശോധിച്ച് ഇക്കാര്യങ്ങളില് വ്യക്തത വരുത്തും. ഈ രീതിയില് ഡിലീറ്റ് ചെയ്ത രേഖകളെല്ലാം വീണ്ടെടുക്കാന് സാധിക്കും. മഹാരാജാസ് കോളേജിന്റെ വ്യാജ പ്രവൃത്തി പരിചയ സര്ട്ടിഫിക്കറ്റ് നിര്മ്മിച്ചിട്ടില്ലെന്ന് വിദ്യ ആവര്ത്തിക്കുമ്പോഴും അവരുടെ രണ്ട് മൊബൈല് ഫോണുകളില് നിന്നാണ് ചില സൂചനകള് പൊലീസിന് ലഭിച്ചത്. ഫോണില് തന്നെയായിരിക്കാം ഫോട്ടോ ഷോപ്പിലൂടെ വ്യാജ സര്ട്ടിഫിക്കറ്റ് നിര്മ്മിച്ചതെന്നാണ് പൊലീസി്നറെ സംശയം. എന്നാല് ഇതെല്ലാം ഫോണില് നിന്ന് കളഞ്ഞതായാണ് പൊലീസ് കണ്ടെത്തല്. സൈബര് വിദഗ്ധരുടെ പരിശോധനയ്ക്ക് ശേഷമേ ഇക്കാര്യത്തില് വ്യക്തത വരികയുള്ളു.
https://www.facebook.com/Malayalivartha
