ചോദ്യം ചെയ്യലിന് മുമ്പ് കെപിസിസി പ്രസിഡന്റ് കെ സുധാകരന്‍ പറഞ്ഞത് തനിക്ക് പേടിയില്ലെന്നാണ്. 'കടല്‍ താണ്ടി വന്നവനെ കൈത്തോട് കാണിച്ച് പേടിപ്പിക്കല്ലേ' എന്നാണ് പറഞ്ഞത്. പക്ഷെ സുധാകരന്‍ അറസ്റ്റിലായ വിവരമാണ് പുറത്തായത്. കോണ്‍ഗ്രസിനാകെ നാണക്കേടായി. ഇനി പ്രതിപക്ഷ നേതാവ് വിഡി സതീശന്റെ കേസ് എന്താകുമെന്നറിയാനുള്ള ആകാംക്ഷയിലാണ്

പുരാവസ്തു തട്ടിപ്പുകാരന്‍ മോന്‍സണ്‍ മാവുങ്കലിനെ സഹായിക്കാന്‍ കെ സുധാകരന്‍ ഉണ്ടാകുമെന്ന ഉറപ്പിലാണ് പണം നല്‍കിയതെന്നും അതിന്റെ വിഹിതം കൈപ്പറ്റിയെന്നുമുള്ള പരാതിയിലെ അന്വേഷണത്തിനൊടുവിലാണ് കെപിസിസി അധ്യക്ഷനെ ചോദ്യം ചെയ്തതും തുടര്‍ന്ന് അറസ്റ്റിന് വഴിയൊരുങ്ങിയതുംമെന്നാണ് പുറത്ത് വരുന്ന വാര്‍ത്ത.

വിദേശികള്‍ക്ക് പുരാവസ്തു വിറ്റവകയില്‍ ബാങ്കില്‍ കുടുങ്ങിയ മോന്‍സണിന്റെ 2.62 ലക്ഷം കോടി രൂപ വിട്ടുകിട്ടാന്‍ ഡല്‍ഹിയില്‍ സുധാകരന്‍ ഇടപെടുമെന്ന ഉറപ്പില്‍ പണം നല്‍കി കബളിപ്പിക്കപ്പെട്ട ആറുപേരാണ് പരാതിക്കാര്‍. കോഴിക്കോട് മാവൂര്‍ സ്വദേശികളായ യാക്കൂബ് പുറായില്‍, സിദ്ദീഖ് പുറായില്‍, പേരാമ്പ്ര സ്വദേശി ഇ എ സലീം, പന്തീരാങ്കാവ് സ്വദേശി എം ടി ഷമീര്‍, മലപ്പുറം മഞ്ചേരി സ്വദേശി ഷാനിമോന്‍, തൃശൂര്‍ വടക്കഞ്ചേരി സ്വദേശി അനൂപ് വി മുഹമ്മദ് എന്നിവരാണ് പരാതി നല്‍കിയത്.

സുധാകരന്‍ 2018 നവംബര്‍ 22ന് മോന്‍സണിന്റെ കൈയില്‍നിന്ന് 10 ലക്ഷം രൂപ വാങ്ങുന്നത് കണ്ടെന്ന ദൃക്സാക്ഷികളുടെ രഹസ്യമൊഴിയുടെ അടിസ്ഥാനത്തിലാണ് ക്രൈംബ്രാഞ്ച് കേസെടുത്തത്. പരാതിക്കാരിലൊരാളായ അനൂപ്, മോന്‍സണിന് 25 ലക്ഷം രൂപ നല്‍കിയിരുന്നു. ഇതിന് സുധാകരന്‍ ഇടനില നിന്നുവെന്നാണ് പരാതി. സുധാകരന് 10 ലക്ഷം രൂപ മോന്‍സണ്‍ കൈമാറിയെന്ന ദൃക്‌സാക്ഷി മൊഴിയുണ്ട്.

മൊഴികളും തെളിവുകളും സുധാകരനെതിരാവുകയായിരുന്നു. 25 ലക്ഷം രൂപ മോന്‍സണിന് കൈമാറിയത് സുധാകരന്റെ ഉറപ്പിലാണെന്ന് പരാതിക്കാരനായ അനൂപ് മുഹമ്മദ് മൊഴി നല്‍കിയിരുന്നു. വിദേശനാണ്യ വിനിമയ നിയമപ്രകാരം തടഞ്ഞുവച്ച മോന്‍സണിന്റെ 2.62 ലക്ഷം കോടി രൂപ വിട്ടുകിട്ടിയാല്‍ എല്ലാവരും സേഫ് സോണിലാകുമെന്ന് മോന്‍സണിന്റെ മുന്നില്‍വച്ച് സുധാകരന്‍ പറഞ്ഞതായും അനൂപ് മൊഴി നല്‍കി.

കേസില്‍ പേര് പരാമര്‍ശിച്ചാല്‍ ഇല്ലാതാക്കുമെന്ന സുധാകരന്റെ പേരിലുള്ള ശബ്ദസന്ദേശം പിഎ എബിന്‍ എബ്രഹാം കേള്‍പ്പിച്ചെന്ന മൊഴിയും അനൂപ് നല്‍കി. ഇതിന്റെ തെളിവുകളും ക്രൈംബ്രാഞ്ചിന് കൈമാറി. ഇതേക്കുറിച്ച് മരട് പൊലീസിലും ക്രൈംബ്രാഞ്ച് എഡിജിപിക്കും പരാതി നല്‍കിയതിന്റെ രേഖകളും അനൂപ് ചോദ്യംചെയ്യലിനിടെ കാണിച്ചു. 2018-19 കാലത്ത് സുധാകരന്‍ എംപിയാകുന്നതിനു മുമ്പും ശേഷവും മോന്‍സണ്‍ അറസ്റ്റിലാകുന്നതുവരെയുള്ള ഫോണ്‍വിളി രേഖകള്‍ ക്രൈംബ്രാഞ്ച് സുധാകരന്റെ മുന്നില്‍വച്ചു. ഇതോടൊപ്പം മോന്‍സണുമായി ബന്ധപ്പെട്ട സുധാകരന്റെ ചിത്രങ്ങളിലും വ്യക്തത തേടി.

സുധാകരന്‍ വീണത് മൂന്ന് ചോദ്യങ്ങളിലാണ്.

രാഷ്ട്രീയ പ്രവര്‍ത്തകനും അറിയപ്പെടുന്ന കോണ്‍ഗ്രസ് നേതാവും എംപിയുമായ കെ സുധാകരനും തട്ടിപ്പുകാരന്‍ മോന്‍സണ്‍ മാവുങ്കലും തമ്മിലുള്ള സൗഹൃദത്തിന്റെ തുടക്കം എങ്ങനെ? ആരാണ് ഇതിന് വഴിതുറന്നത് ?

എംപി ആകുന്നതിന് മുമ്പും ശേഷവും സുധാകരന്‍ മോന്‍സണുമായി സാമ്പത്തിക ഇടപാട് നടത്തിയിട്ടുണ്ടോ? (മോന്‍സണില്‍നിന്ന് സുധാകരന്‍ 10 ലക്ഷം രൂപ വാങ്ങുന്നത് കണ്ടതായി മോന്‍സണിന്റെ മൂന്ന് ജീവനക്കാര്‍ നല്‍കിയ രഹസ്യമൊഴി ക്രൈംബ്രാഞ്ച് പ്രധാന തെളിവായി ഹാജരാക്കി).

തന്റെ പിഎയാണെന്ന് കെ സുധാകരനും തന്റെ ജീവനക്കാരനാണെന്ന് മോന്‍സണും പറയുന്ന ഇരുമ്പനം കാട്ടേത്ത് എബിന്‍ എബ്രാഹമിന് ഈ കേസിലുള്ള ബന്ധം എന്താണ്? സുധാകരന്റെ പേര് പറയാതിരിക്കാന്‍ എബിന്‍ പരാതിക്കാരെ ഭീഷണിപ്പെടുത്തിയിട്ടുണ്ടോ?