നിരന്തരം ആരോപണം ഉന്നയിച്ച് സര്‍ക്കാരിനെ പ്രതിരോധത്തിലാഴ്ത്തിയ കോണ്‍ഗ്രസ് ഇപ്പോള്‍ സ്വയം പ്രതിരോധത്തിലാണ്. മാധ്യമങ്ങളും പ്രതിപക്ഷത്തിന് നേരെ തിരിഞ്ഞ് വാര്‍ത്ത നല്‍കുകയാണ്. പോലീസ് കുടുത്ത നടപടിയിലേക്ക് നീങ്ങുന്നത് ആരോപണ വിധേയരായ പ്രതിപക്ഷ നേതാക്കളുടെ മുട്ടിടിക്കുകയാണ്.

മോന്‍സന്‍ മാവുങ്കല്‍ മുഖ്യപ്രതിയായ വ്യാജപുരാവസ്തു തട്ടിപ്പു കേസില്‍ കെ.സുധാകരനെ കുടുക്കിയത് ഡിജിറ്റല്‍ തെളിവുകളെന്ന് ക്രൈം ബ്രാഞ്ച് വ്യക്തമാക്കിയിട്ടുണ്ട്. 12 തവണ സുധാകരന്‍ മോന്‍സനുമായി കൂടിക്കാഴ്ച നടത്തി. 2018 മുതല്‍ മോന്‍സന്‍ അറസ്റ്റിലാകുന്നതു വരെയായിരുന്നു കൂടിക്കാഴ്ചകള്‍. കൂടിക്കാഴ്ചകള്‍ സംബന്ധിച്ച് സുധാകരന് കൃത്യമായ മറുപടിയില്ല. പണം കൈപ്പറ്റിയിട്ടില്ലെന്ന് ക്രൈംബ്രാഞ്ചിനോട് സുധാകരന്‍ പറഞ്ഞു. കോടതി നിര്‍ദേശമുള്ളതിനാല്‍ അറസ്റ്റ് രേഖപ്പെടുത്തിയ ശേഷം സുധാകരനെ ജാമ്യത്തില്‍ വിട്ടു.


അതേസമയം ആഞ്ഞടിക്കുകയാണ് കോണ്‍ഗ്രസ് നേതൃത്വം. കെപിസിസി അധ്യക്ഷന്‍ കെ.സുധാകരനെ അറസ്റ്റ് ചെയ്ത നടപടി അങ്ങേയറ്റം പ്രതിഷേധാര്‍ഹമെന്ന് കോണ്‍ഗ്രസ് നേതാവ് രമേശ് ചെന്നിത്തല പറഞ്ഞു. കെപിസിസി പ്രസിഡന്റിനെതിരെ കള്ളക്കേസുണ്ടാക്കി വേട്ടയാടുന്ന പിണറായി വിജയന്റെ നടപടി അദ്ദേഹത്തിന്റെ ഭയത്തില്‍നിന്നും ഉണ്ടായതാണ്.

പാര്‍ട്ടി നിര്‍ദേശ പ്രകാരമാണ് ഈ അറസ്റ്റ് എന്നത് ആര്‍ക്കാണ് മനസ്സിലാകാത്തത്? അറസ്റ്റ് ചെയ്ത നടപടി തികച്ചും രാഷ്ടിയ പ്രേരിതമാണ്. പ്രതിപക്ഷ നേതാക്കളെ പിണറായി ഓലപ്പാമ്പ് കാട്ടി വിരട്ടാന്‍ നോക്കേണ്ട. അഴിമതിയിലും കെടുകാര്യസ്ഥതയിലും മുഖം നഷ്ടപ്പെട്ട സര്‍ക്കാരും പാര്‍ട്ടിയും ജനശ്രദ്ധ തിരിക്കാനുളള തന്ത്രത്തിന്റെ ഭാഗമാണ് ഈ നാടകങ്ങളൊക്കെ.

ഇതുകൊണ്ടൊന്നും പ്രതിപക്ഷത്തിന്റെ വായ് അടപ്പിക്കാമെന്ന് കരുതുന്ന പിണറായിയും ഗോവിന്ദനും മൂഢന്മാരുടെ സ്വര്‍ഗത്തിലാണ്. സര്‍ക്കാരിനെ വിമര്‍ശിക്കുന്നവരെ കേസില്‍ കുടുക്കുന്ന നരേന്ദ്ര മോദി സര്‍ക്കാരിന്റെ ഫാസിസ്റ്റ് മനോഭാവം തന്നെയാണ് പിണറായി വിജയനും. ഒരു ഭാഗത്ത് പാര്‍ട്ടി ക്രിമിനലുകള്‍ തലങ്ങുംവിലങ്ങും വിലസുമ്പോള്‍ കയ്യുംകെട്ടി നോക്കി നില്‍ക്കുന്ന പൊലീസ്, ക്രിമിനലുകളെ ഒളിപ്പിക്കുന്ന ജോലി കൂടി എറ്റെടുത്തിരിക്കുകയാണ്. സുധാകരനെതിരായ കേസ് രാഷ്ട്രീയമായും നിയമപരമായും നേരിടുമെന്നും ചെന്നിത്തല വ്യക്തമാക്കി.

പ്രതിപക്ഷ ഐക്യ ചര്‍ച്ചയ്ക്കിടെയാണു കേരളത്തിലെ കോണ്‍ഗ്രസ് അധ്യക്ഷനെ അറസ്റ്റ് ചെയ്തതെന്ന് കോണ്‍ഗ്രസ് സംഘടനാകാര്യ ജനറല്‍ സെക്രട്ടറി കെ.സി.വേണുഗോപാല്‍ പറഞ്ഞു. പിണറായിയുടെ നീക്കം ബിജെപിയെ സുഖിപ്പിക്കാനാണ്. പൊലീസിന്റെ അന്തസ്സ് പിണറായി കളഞ്ഞു കുളിച്ചു. പ്രതികാര രാഷ്ട്രീയം സിപിഎമ്മിനെ നാശത്തിലേക്ക് എത്തിക്കുമെന്നും അദ്ദേഹം ഡല്‍ഹിയില്‍ പറഞ്ഞു.

മറ്റു രാഷ്ട്രീയ പാര്‍ട്ടികളെല്ലാം ദേശീയ തലത്തില്‍ ഒരു ട്രാക്കില്‍ നീങ്ങുമ്പോള്‍ പിണറായി വിജയന്‍ മുണ്ടുടുത്ത മോദിയാണെന്ന് തെളിയിക്കാനുള്ള തിരക്കിലാണെന്ന് കോണ്‍ഗ്രസ് നേതാവ് ജയ്‌റാം രമേശ് കുറ്റപ്പെടുത്തി. കെപിസിസി പ്രസിഡന്റിനെ കള്ളക്കേസില്‍ കുടുക്കിയുള്ള അനാവശ്യ പീഡനം കേരളത്തില്‍ കോണ്‍ഗ്രസിനെ കൂടുതല്‍ ശക്തമാക്കുകയേ ഉള്ളൂവെന്നും അദ്ദേഹം പറഞ്ഞു.

അഴിമതിയില്‍ മുങ്ങിയ പിണറായി സര്‍ക്കാര്‍ ജനങ്ങളെ പേടിച്ചാണ് പ്രതിപക്ഷ നേതാക്കള്‍ക്കെതിരെ പ്രതികാര നടപടികളുമായി മുന്നോട്ടു പോകുന്നതെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി പി.എം.എ. സലാം പറഞ്ഞു. വ്യക്തമായ തെളിവുകളോടെ പ്രതിപക്ഷം ഉന്നയിക്കുന്ന ആരോപണങ്ങള്‍ക്ക് മറുപടി നല്‍കാന്‍ പോലും കഴിയാത്ത സര്‍ക്കാര്‍ യഥാര്‍ഥ വിഷയങ്ങളില്‍നിന്ന് ജനശ്രദ്ധ തിരിച്ചുവിടാനാണ് ഇത്തരം നാടകങ്ങളുമായി മുന്നോട്ടു പോകുന്നത്. ജനങ്ങളെ നേരിടാന്‍ പിണറായി സര്‍ക്കാരിന് പേടിയാണ്.

സര്‍ക്കാര്‍ നടപടി ജനാധിപത്യ കേരളത്തിനാകെ അപമാനമാണ്. വിമര്‍ശനം ഉന്നയിക്കുന്നവരെ കള്ളക്കേസെടുത്ത് നിശബ്ദമാക്കാമെന്ന് കരുതുന്നത് മൗഢ്യമാണ്. കേന്ദ്രത്തില്‍ മോദി ചെയ്യുന്നതെന്തോ അതാണ് കേരളത്തില്‍ പിണറായിയും ആവര്‍ത്തിക്കുന്നത്. പ്രതിപക്ഷ നേതാക്കളെ ഓലപ്പാമ്പ് കാട്ടി വിരട്ടാമെന്നത് വ്യാമോഹമാണ്. ആ പരിപ്പ് കേരളത്തില്‍ വേവില്ല. സുധാകരനെതിരായ കേസ് രാഷ്ട്രീയമായും നിയമപരമായും നേരിടാന്‍ യുഡിഎഫ് സജ്ജമാണെന്നും അദ്ദേഹം പറഞ്ഞു.