പേട്ടയില്‍ പെണ്‍സുഹൃത്തിന്റെ വീട്ടില്‍ വെച്ച് ഡിഗ്രി രണ്ടാം വര്‍ഷ വിദ്യാര്‍ത്ഥി അനീഷ് ജോര്‍ജിനെ (19) കൊലപ്പെടുത്തിയ കേസ് വിചാരണക്കായി തിരുവനന്തപുരം ജില്ലാ സെഷന്‍സ് കോടതിക്ക് മജിസ്‌ട്രേട്ട് കോടതി കമ്മിറ്റ് ചെയ്തയച്ചു ( സമര്‍പ്പിച്ചു).


തിരുവനന്തപുരം അഡീ. ചീഫ് ജുഡീഷ്യല്‍ മജിസ്‌ട്രേട്ട് എല്‍സാ കാതറിനാണ് പോലീസ് കുറ്റപത്രം , സാക്ഷി മൊഴികള്‍, രേഖകള്‍, തൊണ്ടിമുതലുകള്‍ എന്നിവയടക്കമുള്ള കേസ് റെക്കോര്‍ഡുകള്‍ കേസ് ലിസ്റ്റ് തയ്യാറാക്കി കമ്മിറ്റല്‍ ഉത്തരവ് സഹിതം ജില്ലാ കോടതിക്ക് കമ്മിറ്റ് ചെയ്തയച്ചത്. ജില്ലാ കോടതിയില്‍ നിന്നും സമന്‍സുത്തരവ് ലഭിക്കുമ്പോള്‍ ഹാജരാകാന്‍ പ്രതിയോട് കോടതി ഉത്തരവിട്ടു. കൊല്ലപ്പെട്ട പെണ്‍ സുഹൃത്തിന്റെ പിതാവ് പേട്ട ഏദന്‍ വീട്ടില്‍ സൈമണ്‍ ലാലയെന്ന ലാലനാണ് ഏക പ്രതി.


ഇന്ത്യന്‍ ശിക്ഷാ നിയമത്തിലെ 341 (അന്യായമായി തടഞ്ഞു വെക്കല്‍) , 342 ( അന്യായ തടങ്കലില്‍ വക്കല്‍) , 302 ( കൊലപാതകം ) എന്നീ കുറ്റങ്ങള്‍ക്കാണ് കോടതി പ്രതിക്കെതിരെ കേസെടുത്തത്.

2021 ഡിസംബര്‍ 28 വെളുപ്പിനാണ് തലസ്ഥാനം നടുങ്ങിയ അരും കൊലപാതകം നടന്നത്. അനീഷ് രാത്രി 1.37 ന് ശേഷമാണ് പെണ്‍ സുഹൃത്തിന്റെ വീട്ടിലെത്തിയതെന്നാണ് പോലീസ് കേസ്. അനീഷിന്റെ ഫോണില്‍ നിന്ന് രാത്രി 1.37 വരെ പെണ്‍ സുഹൃത്തിന്റെ ഫോണിലേക്ക് കോളുകള്‍ വന്നിരുന്നു. ഇതിന് ശേഷമാണ് അനീഷ് ഈ വിട്ടിലേക്കെത്തിയത്.

വീടിന്റെ പിന്‍ഭാഗത്തു കൂടിയാണ് അനീഷ് ഇവിടേക്കെത്തിയത്. പ്രധാന റോഡ് ഒഴിവാക്കി പിന്നിലുള്ള കാടുകയറിയ പ്രദേശത്തു കൂടിയുള്ള വഴിയിലൂടെയാണ് എത്തിയതെന്ന് ഡോഗ് സ്‌ക്വാഡ് പരിശോധനയില്‍ വ്യക്തമായിരുന്നു.