മലയാള ചലച്ചിത്ര മേഖലയില്‍ ഹിറ്റ് കോമ്പോ സംവിധായകരില്‍ പ്രധമനായ സിദ്ദിഖ് വിടവാങ്ങി. ചലച്ചിത്ര, രാഷ്ട്രീയ, സാംസ്‌കാരിക ലോകത്തുള്ള നിരവധി പ്രമുഖര്‍ തങ്ങളുടെ പ്രിയ സംവിധായകന് ആദരാഞ്ജലികള്‍ അര്‍പ്പിക്കുന്നുണ്ട്. ഇതിനിടെ തന്റെ നിര്‍ഭാഗ്യം തുറന്നുപറഞ്ഞും സിദ്ദിഖിന് ആദരാഞ്ജലികളര്‍പ്പിച്ചും നടന്‍ സുരാജ് വെഞ്ഞാറമ്മൂട് പങ്കുവച്ച ഫേസ്ബുക്ക് കുറിപ്പ് ശ്രദ്ധ നേടുകയാണ്.

ഹാസ്യ നടനെന്ന് പേരെടുത്തിട്ടും ഒരുപാട് ആഗ്രഹിച്ചിട്ടും സിദ്ദിഖിന്റെ ഒരു ചിത്രത്തില്‍ പോലും അഭിനയിക്കാന്‍ തനിക്ക് കഴിഞ്ഞിട്ടില്ലെന്ന് സുരാജ് ഓര്‍ക്കുന്നു. ഹാസ്യകലാകാരനെന്ന നിലയില്‍ അതൊരു നിര്‍ഭാഗ്യമായി കരുതുന്നതായി സുരാജ് വെഞ്ഞാറമ്മൂട് കുറിക്കുന്നു.

പ്രിയ സംവിധായകന് ആദരാഞ്ജലി അര്‍പ്പിച്ച് നടന്‍ ദുല്‍ഖര്‍ സല്‍മാന്‍ രംഗത്തെത്തിയിട്ടുണ്ട്. തന്റെ ഫേസ്ബുക്ക് പോസ്റ്റിലൂടെയാണ് താരം ആദരാഞ്ജലി അര്‍പ്പിച്ചത്. ഒരുപാട് മികച്ച സിനിമകള്‍ അദ്ദേഹം നല്‍കിയിട്ടുണ്ടെന്നും അതിലെ പല സംഭാഷണങ്ങളും ദൈനംദിന ജീവിതത്തില്‍ ഉപയോഗിക്കാറുണ്ടെന്നും ദുല്‍ഖര്‍ കുറിച്ചു. വളരെ നല്ല മനുഷ്യനാണ്. അദ്ദേഹത്തിന്റെ വിയോഗം നികത്താനാവാത്ത നഷ്ടമാണെന്നും താരം പ്രതികരിച്ചു.