തെരുവ് നായയുടെ കടിയേറ്റ് ചികിത്സയിലായിരുന്നയാള്‍ മരിച്ചു. പെരുമ്പാവൂര്‍ കൂവപ്പടി ആയത്തുപടി പള്ളിക്കരക്കാരന്‍ പത്രോസ് പൈലിയാണ് (പോളച്ചന്‍ 57) മരിച്ചത്.എറണാകുളം ഗവ. ആശുപത്രിയില്‍ ചികിത്സയിലിരിക്കെ ചൊവ്വാഴ്ച പുലര്‍ച്ചെയായിരുന്നു മരണം.

ഈ മാസം രണ്ടിനാണ് ആലുവ കെ.എസ്.ആര്‍.ടി.സി പരിസരത്തുവച്ച് നായ് കടിച്ചത്. പേ ഇളകിയപോലെ അക്രമാസക്തയായിരുന്ന നായ് വിവിധ സമയങ്ങളിലായി 13 ഓളം പേരെയാണ് കടിച്ചത്.

തൊഴിലുറപ്പ് ജോലിക്കാരനായ പത്രോസ് പൈലി ആലുവ ജില്ല ആശുപത്രിയില്‍ നേരത്തെ ശസ്ത്രക്രിയയ്ക്ക് വിധേയനായിരുന്നു. ഇതിന്റെ ഭാഗമായി തുടര്‍ പരിശോധനക്ക് ഡോക്ടറെ കാണാനായി ആശുപ്രതിയിലേക്ക് വരുന്ന വഴിയാണ് തെരുവുനായ് ആക്രമിച്ചത്. തുടര്‍ന്ന് സാധാരണ നല്‍കുന്ന വാക്‌സിന്‍ പത്രോസ് പൈലി എടുത്തിരുന്നു. രണ്ടുദിവസം മുമ്പാണ് ഇയാള്‍ക്ക് പേവിഷബാധയുടെ ലക്ഷണങ്ങള്‍ കണ്ടത്.

പനിയെ തുടര്‍ന്ന് ആശുപത്രിയിലെത്തിച്ച പത്രോസ് പൈലിയെ പേവിഷ ബാധയുണ്ടായിരുന്നതിനാല്‍ ഐസൊലേഷന്‍ വാര്‍ഡിലാണ് കിടത്തിയിരുന്നത്. ജനങ്ങളെ ആക്രമിച്ച നായയെ നഗരസഭ ആരോഗ്യ വിഭാഗം പിടികൂടി കൂട്ടിലടച്ചിരുന്നു. പിന്നീട് നായ് മരിച്ചതിനെ തുടര്‍ന്ന് പോസ്റ്റ് മോര്‍ട്ടം ചെയ്തതോടെ പേ വിഷ ബാധ സ്ഥിരീകരിച്ചു.