മൂന്നാംഘട്ട വോട്ടെടുപ്പ് ....പ്രധാനമന്ത്രി നരേന്ദ്രമോദി വീണ്ടും അയോധ്യയില്.... യോഗി ആദിത്യനാഥിനൊപ്പം റോഡ്ഷോയും നടത്തി, 12 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 92 മണ്ഡലങ്ങളാണ് ജനവിധിയെഴുതാനൊരുങ്ങുന്നത്
മൂന്നാംഘട്ട വോട്ടെടുപ്പ്.... പ്രധാനമന്ത്രി നരേന്ദ്രമോദി വീണ്ടും അയോധ്യയില്. അയോധ്യയിലെത്തിയ മോദി രാമക്ഷേത്രത്തില് ദര്ശനവും പൂജയും നടത്തിയശേഷം ക്ഷേത്ര പരിസരത്ത് റോഡ് ഷോ നടത്തി. തുടര്ന്ന് ക്ഷേത്ര പരിസരത്ത് രണ്ട് കിലോമീറ്റര് ദൂരം പ്രധാനമന്ത്രി റോഡ് ഷോ നടത്തി. പ്രധാനമന്ത്രിയുടെ മുസ്ലീം വിരുദ്ധ പരാമര്ശം വലിയ വിവാദമായതിന് പിന്നാലെയാണ് രാമക്ഷേത്രം വീണ്ടും സജീവ ചര്ച്ചയാക്കി നിര്ത്താനായി മോദി തന്നെ നേരിട്ടിറങ്ങുന്നത്.
ജനുവരിയില് രാമക്ഷേത്രത്തിലെ പ്രാണ പ്രതിഷ്ഠയ്ക്ക് ശേഷം ആദ്യമായാണ് മോദി അയോധ്യയിലെത്തുന്നത്. രാമക്ഷേത്രം യാഥാര്ത്ഥ്യമാക്കിയത് തെരഞ്ഞെടുപ്പില് സജീവ ചര്ച്ചയാക്കി നിര്ത്താനാണ് മോദിയുടെ ശ്രമം. യോഗി ആദിത്യനാഥിനൊപ്പമാണ് മോദി റോഡ് ഷോ നടത്തിയത്. ഒരു മണിക്കൂറോളം റോഡ് ഷോ നീളുകയായിരുന്നു.
12 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 92 മണ്ഡലങ്ങളാണ് ജനവിധിയെഴുതാനൊരുങ്ങുന്നത്. ഗുജറാത്തില് 25 മണ്ഡലങ്ങളിലും, കര്ണാടകത്തില് ജഗദീഷ് ഷെട്ടാര് മത്സരിക്കുന്ന ബെലഗാവി, യെദിയൂരപ്പയുടെ മകന് ബി വൈ രാഘവേന്ദ്രക്കെതിരെ ഈശ്വരപ്പ വിമതനായി മത്സരിക്കുന്ന ശിവമൊഗ ഉള്പ്പടെ പോളിംഗ് ബാക്കിയുള്ള 14 മണ്ഡലങ്ങളും ബൂത്തിലെത്തും.
എതിര് സ്ഥാനാര്ത്ഥികള് പിന്മാറിയതിനെ തുടര്ന്ന് ബിജെപി സ്ഥാനാര്ത്ഥിയെ വിജയിയായി പ്രഖ്യാപിച്ച സൂറത്തില് പോളിംഗില്ല. വോട്ടിംഗ് തീയതി മാറ്റിയതിനാല് അനന്ത്നാഗ് രജൗരി മണ്ഡലത്തിലും ചൊവ്വാഴ്ച വോട്ടെടുപ്പ് നടക്കില്ല. മൂന്നാം ഘട്ട പോളിംഗ് പൂര്ത്തിയാകുന്നതോടെ രാജ്യത്തെ പകുതിയിലധികം ലോക്സഭാ മണ്ഡലങ്ങളിലും തെരഞ്ഞെടുപ്പ് പൂര്ത്തിയാകുകയും ചെയ്യും.
"
https://www.facebook.com/Malayalivartha