കെ. ബാബുവിനെതിരായ വിജിലന്‍സ് കോടതി ഉത്തരവിന് ഹൈക്കോടതി സ്‌റ്റേ അനുവദിച്ചു. ബാര്‍ കോഴക്കേസില്‍ എഫ്.ഐ.ആര്‍ രജിസ്റ്റര്‍ ചെയ്ത് അന്വേഷണം നടത്തണമെന്ന തൃശൂര്‍ വിജിലന്‍സ് കോടതി ഉത്തരവിനെതിരെ കെ.ബാബുവാണ് ഹൈക്കോടതിയെ സമീപിച്ചത്. രണ്ടു മാസത്തേക്കാണ് ഹൈക്കോടതി സ്‌റ്റേ അനുവദിച്ചിരിക്കുന്നത്. വിജിലന്‍സ് കോടതി അനാവശ്യമായി തിടുക്കം കാണിച്ചുവെന്ന് കോടതി നിരീക്ഷിച്ചു. എന്നാല്‍ ദ്രുതപരിശോധന തുടരാമെന്നും റിപ്പോര്‍ട്ട് 10 മാസത്തിനകം സമര്‍പ്പിക്കണമെന്നും കോടതി വ്യക്തമാക്കി. 
വിജിലന്‍സ് കോടതി ഉത്തരവ് റദ്ദാക്കണമെന്നും സി.ബി.ഐ അന്വേഷണം ആവശ്യപ്പെട്ട് ഹൈക്കോടതിയിലുള്ള കേസിന്റെ വാദം പൂര്‍ത്തിയാകുന്നതുവരെ സ്‌റ്റേ ചെയ്യണമെന്നും ആവശ്യപ്പെട്ട് ബാബു ഹര്‍ജി നല്‍കിയത്. കേസ് ജസ്റ്റിസ് പി. ഉബൈദ് ബുധനാഴ്ച പരിഗണിച്ചെങ്കിലും വാദം കേട്ട് വിധി പറയാനായി ഇന്നത്തേക്ക് മാറ്റുകയായിരുന്നു.

ഹൈകോടതിയുടെ പരിഗണനയിലുള്ള കേസില്‍ ജനുവരി 25ന് ഇടക്കാല വിധി വരാനിരിക്കെ 23ന് വിജിലന്‍സ് കോടതി ഇത്തരമൊരു ഉത്തരവിട്ടത് ശരിയായ നടപടിയല്ല എന്നായിരുന്നു ഹരജിയില്‍ ബാബു ചൂണ്ടിക്കാണിച്ചത്. ഹൈക്കോടതിയിലെ കേസ് ചൂണ്ടിക്കാട്ടുകയും ദ്രുതാന്വേഷണ റിപ്പോര്‍ട്ട് സമര്‍പ്പിക്കാന്‍ കൂടുതല്‍ സമയം ആവശ്യപ്പെടുകയും ചെയ്തിട്ടും അംഗീകരിക്കാതെ തൃശൂര്‍ വിജിലന്‍സ് കോടതി എഫ്.ഐ.ആര്‍ രജിസ്റ്റര്‍ ചെയ്ത് അന്വേഷണം നടത്തണമെന്ന് ഉത്തരവിടുകയായിരുന്നു എന്നുമാണ് ബാബു ഹരജിയില്‍ ചൂണ്ടിക്കാട്ടിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha