ഓടുന്ന ട്രെയിനില്‍ നിന്ന് പുഴയിലേക്ക്.... കോടതിയിലേക്ക് കൊണ്ടു പോകുകയായിരുന്ന തടവുപുള്ളി ട്രെയിനില്‍ നിന്ന് പുഴയിലേക്ക് ചാടി.
കാസര്‍കോട്ടു നിന്ന് ആലുവ കോടതിയിലേക്ക് കൊണ്ടുപോയ തടവുപുള്ളി സനീഷാണ് ഓടുന്ന തീവണ്ടിയില്‍ നിന്ന് പുഴയിലേക്ക് ചാടിയത്.

ഇന്നലെ ഉച്ചയ്ക്ക് രണ്ടരയോടെ മംഗലാപുരം-തിരുവനന്തപുരം ഏറനാട് എക്‌സ്പ്രസിലാണ് സംഭവമുണ്ടായത്. ഭാരതപ്പുഴയ്ക്ക് കുറുകെയുള്ള മേല്‍പ്പാലത്തിലെത്തിയപ്പോഴായിരുന്നു പ്രതി പുഴയിലേക്ക് ചാടിയത്.

പാലത്തിന് അടുത്ത് എത്തിയപ്പോള്‍ ശൗചാലയത്തില്‍ പോകണമെന്നു പറഞ്ഞ പ്രതിയുടെ ഒരു കൈയിലെ വിലങ്ങ് പൊലീസ് അഴിച്ചുകൊടുത്തു. വാതിലിന് സമീപമെത്തി പാലത്തിന് മുകളിലെത്തിയതോടെ പ്രതി പുഴയിലേക്ക് ചാടി. ഇയാള്‍ക്കൊപ്പമുണ്ടായിരുന്ന രണ്ട് പൊലീസുകാര്‍ കൂടി പിന്നാലെ എടുത്തു ചാടി പ്രതിയെ പിടികൂടി.

പാലത്തിന് മുകളില്‍ ട്രെയിനിന് വേഗത കുറവായിരുന്നുവെന്നത് മനസ്സിലാക്കിയാണ് ഇയാള്‍ രക്ഷപ്പെടാന്‍ ശ്രമം നടത്തിയത്. പുഴയില്‍ വെള്ളം കുറവായതിനാല്‍ പ്രതിയെ പൊലീസുകാര്‍ക്ക് പിടികൂടാനായി. പുഴയിലേക്ക് ചാടിയതിനെ തുടര്‍ന്ന് അപസ്മാരം അനുഭവപ്പെട്ട പ്രതിയെ തൃശ്ശൂര്‍ മെഡിക്കല്‍ കോളേജ് ആശുപത്രിയിലേക്ക് മാറ്റിയിരിക്കുകയാണ്.