വിഗ്രഹഘോഷയാത്ര ഇന്ന് അനന്തപുരിയിലെത്തുന്നതോടെ തലസ്ഥാനത്ത് നവരാത്രി ആഘോഷങ്ങള്ക്ക് തുടക്കമാകും....
പദ്മനാഭപുരത്തു നിന്നും പുറപ്പെട്ട വിഗ്രഹഘോഷയാത്ര ഇന്ന് അനന്തപുരിയിലെത്തുന്നതോടെ തലസ്ഥാനത്ത് നവരാത്രി ആഘോഷങ്ങള്ക്ക് തുടക്കമാകും. ഇന്നലെ സംസ്ഥാന അതിര്ത്തിയായ കളിയിക്കാവിളയില് സര്ക്കാരിന്റെയും വിവിധ ഹൈന്ദവ സംഘടനകളുടെയും അഭിമുഖ്യത്തില് നടന്ന സ്വീകരണ പരിപാടിയില് ഗവര്ണര് രാജേന്ദ്ര വിശ്വനാഥ് ആര്ലേക്കര് ഘോഷയാത്രയെ വരവേറ്റു.
കേരള പൊലീസ് പുരുഷ, വനിതാ ബറ്റാലിയനുകളും തമിഴ്നാട് പൊലീസും വിഗ്രഹ ഘോഷയാത്രയ്ക്ക് ഗാര്ഡ് ഓഫ് ഓണര് നല്കി. സ്വീകരണച്ചടങ്ങിനു മുന്നോടിയായി നടന്ന സമ്മേളനം ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്തു. സി.കെ.ഹരീന്ദ്രന് എം.എല്.എ അദ്ധ്യക്ഷനായി. ഗവര്ണര്, തിരുവിതാംകൂര് ദേവസ്വംബോര്ഡ് പ്രസിഡന്റ് പി.എസ്.പ്രശാന്ത് തുടങ്ങിയവര് തട്ടപൂജ നടത്തി വിഗ്രഹഘോഷയാത്രയെ വരവേറ്റു.
അതേസമയം ഉച്ചക്ക് രണ്ടോടെ പാറശാല മഹാദേവര് ക്ഷേത്രത്തിലെത്തിയ ഘോഷയാത്ര ഉച്ചഭക്ഷണത്തിനും വിശ്രമത്തിനും ശേഷം വൈകിട്ട് മൂന്നോടെ പുറപ്പെട്ട് രാത്രി നെയ്യാറ്റിന്കര ശ്രീകൃഷ്ണസ്വാമി ക്ഷേത്രത്തിലെത്തി. അവിടെനിന്നും ഇന്നു രാവിലെ പുറപ്പെട്ട് വൈകിട്ട് മൂന്നോടെ നഗരാതിര്ത്തിയായ നേമത്തെത്തും.
അവിടെ നിന്നും ഘോഷയാത്ര കരമന ആവടി അമ്മന് ക്ഷേത്രത്തിനു മുന്നിലെത്തിയ ശേഷം അലങ്കരിച്ച വെള്ളിക്കുതിരപ്പുറത്ത് കുമാരസ്വാമി വിഗ്രഹത്തെ എഴുന്നള്ളിക്കും. സന്ധ്യയോടെ ഘോഷയാത്ര കിഴക്കേകോട്ടയിലെത്തുമ്പോള് ശ്രീപദ്മനാഭസ്വാമി ക്ഷേത്രത്തില് ഉടവാള് ഏറ്റുവാങ്ങി ആചാരപ്രകാരം വരവേല്ക്കുകയും ചെയ്യും.
പദ്മതീര്ത്ഥത്തിലെ ആറാട്ടിനുശേഷം നവരാത്രി മണ്ഡപത്തില് സരസ്വതിദേവീയെ ഒക്ടോബര് 4 വരെ പൂജയ്ക്കിരുത്തും. കുമാരസ്വാമിയേയും വെള്ളിക്കുതിരയേയും ആര്യശാല ദേവീക്ഷേത്രത്തിലും മുന്നൂറ്റിനങ്കയെ ചെന്തിട്ട ദേവീക്ഷേത്രത്തിലുമാണ് പൂജയ്ക്കിരുത്തുക.
https://www.facebook.com/Malayalivartha
