പട്ടാമ്പിയില്‍ വീട്ടില്‍ അതിക്രമിച്ച് കയറി തീയിട്ട സംഭവത്തില്‍ എറണാകുളം പറവൂര്‍ സ്വദേശി പ്രേംദാസിനെതിരെ കേസെടുത്ത് കൊപ്പം പൊലീസ്. ഇന്നലെയായിരുന്നു കേസിനാസ്പദമായ സംഭവം. മച്ചിങ്ങാതൊടി കിഴക്കേതില്‍ ഇബ്രാഹിമിന്റെ വീടിനാണ് പ്രേംദാസ് തീയിട്ടത്. വീട്ടില്‍ കയറി അതിക്രമം, വധശ്രമം തുടങ്ങിയ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. വീടിന് തീയിട്ട ശേഷം ആത്മഹത്യയ്ക്ക് ശ്രമിച്ച പ്രേംദാസ് ഇപ്പോള്‍ ചികിത്സയിലാണ്. ഡോക്ടറുടെ അനുമതി ലഭിച്ചാലുടന്‍ ഇയാളുടെ മൊഴി രേഖപ്പെടുത്തും.

വീട്ടുമുറ്റത്ത് നിര്‍ത്തിയിട്ടിരുന്ന കാറും ബൈക്കും കത്തിക്കാന്‍ ശ്രമിക്കുന്നതിനിടെ വീടിനും തീപിടിക്കുകയായിരുന്നു. ശേഷം സ്വയം കഴുത്തറുത്ത് ഇയാള്‍ ആത്മഹത്യയ്ക്ക് ശ്രമിച്ചു. വീട്ടുടമസ്ഥന്‍ ഇബ്രാഹിം ഇയാള്‍ക്ക് ഒരുലക്ഷം രൂപ നല്‍കാനുണ്ട്. ഇത് നല്‍കാത്തതിനാലാണ് ഇന്നോവ കാറിന് തീയിട്ടത്. ഇന്നോവ കാറും ഒരു സ്‌കൂട്ടറും പൂര്‍ണമായും കത്തി നശിച്ചു. വീട്ടിലെ ഉപകരണങ്ങളും കത്തിനശിച്ചു. വീടും ഭാഗികമായി കത്തിയിട്ടുണ്ട്.

പ്രവാസിയായ ഇബ്രാഹിമിന്റെ ഭാര്യയും രണ്ട് കുട്ടികളും മാത്രമാണ് സംഭവസമയത്ത് വീട്ടിലുണ്ടായിരുന്നത്. ഇവര്‍ ഓടിരക്ഷപ്പെട്ടതിനാല്‍ ആളപായമുണ്ടായില്ല. പ്രദേശത്ത് നിന്നും ഇബ്രാഹിമിന്റെ സാമ്പത്തിക ഇടപാടുമായി ബന്ധപ്പെട്ട നോട്ടീസ് കണ്ടെത്തിയിട്ടുണ്ട്. എറണാകുളം ജില്ലയിലെ പ്രേംദാസിന് ഒരു ലക്ഷം രൂപ നല്‍കാനുണ്ടെന്നും മാന്യനാണെങ്കില്‍ പണം തിരികെ നല്‍കണമെന്നും, പണം നല്‍കാതെ ഇബ്രാഹം മുങ്ങി നടക്കുകയാണെന്നും നോട്ടീസില്‍ എഴുതിയിട്ടുണ്ട്.