സ്‌കൂട്ടറില്‍ യാത്ര തുടരുന്നതിനിടെ എന്തോ അസ്വാഭാവികത തോന്നി ബ്രേക്കിലേക്ക് നോക്കിയപ്പോള്‍ കണ്ടത് ഉഗ്രനൊരു വിഷപ്പാമ്പിനെ. ഒന്നുപേടിച്ചെങ്കിലും മനോധൈര്യം കെവിടാതെ വീണ്ടും ബ്രേക്കുപിടിച്ച് വണ്ടി നിറുത്തി പുറത്തിറങ്ങി. പടന്നക്കാട് നെഹ്‌റു കോളേജിലെ ചരിത്രവിഭാഗം അദ്ധ്യാപിക തൈക്കടപ്പുറം സ്വദേശി ഷറഫുന്നീസയാണ് പാമ്പിന്റെ കടിയേല്‍ക്കാതെ അത്ഭുതകരമായി രക്ഷപ്പെട്ടത്. കോളേജില്‍ നിന്ന് കഷ്ടിച്ച് ഒരുകിലോമീറ്റര്‍ അകലെവച്ചായിരുന്നു സംഭവം.

തൈക്കടപ്പുറത്തെ വീട്ടില്‍നിന്ന് സ്‌കൂട്ടറിലാണ് ഇവര്‍ സ്ഥിരമായി കോളേജിലേക്ക് പോകുന്നത്. ഇന്നലെ രാവിലെ വീട്ടില്‍ നിന്നിറങ്ങുമ്പോള്‍ അസ്വാഭാവികമായി ഒന്നും തോന്നിയില്ല. കുറച്ചുദൂരം കഴിഞ്ഞ് ബ്രേക്കുപിടിച്ചപ്പോഴാണ് വലതുഭാഗത്താണ് പാമ്പിനെ കണ്ടത്. ഇനി മുന്നോട്ടുപോകുന്നത് അപകടമാണെന്ന് വ്യക്തമായതോടെ വണ്ടിനിറുത്തി പുറത്തിറങ്ങാന്‍ തീരുമാനിച്ചു.

വലതുഭാഗത്തെ ബ്രേക്കുപിടിച്ചാല്‍ പാമ്പിന് പരിക്കേല്‍ക്കുകയും അത് ആക്രമണകാരിയായി മാറുമെന്നും മനസിലാക്കിയ ഷറഫുന്നീസ ഇടതുഭാഗത്തെ ബ്രേക്കുപിടിച്ച് നിറുത്തി വണ്ടിയില്‍ നിന്ന് പുറത്തിറങ്ങുകയായിരുന്നു.

വിവരമറിഞ്ഞ് സ്ഥലത്തുണ്ടായിരുന്നവര്‍ മെക്കാനിക്കിനെ വിളിച്ചുവരുത്തി. അവരെത്തി വണ്ടിയുടെ ബോഡി മാറ്റിയപ്പോഴാണ് ഉള്ളില്‍ നല്ല വലിപ്പമുള്ള വിഷപ്പാമ്പിനെ കണ്ടത്. പാമ്പ് സ്‌കൂട്ടറിനകത്ത് എങ്ങനെ കയറിപ്പറ്റിയെന്ന് വ്യക്തമല്ല. സ്‌കൂട്ടറിനുമുന്നിലുള്ള വിടവിലൂടെ അകത്ത് കടന്നതാകാം എന്നാണ് കരുതുന്നത്.