കൂട്ടുകാരന്റെ പിറന്നാള് കഞ്ചാവ് വലിച്ച് ആഘോഷിച്ച് വിദ്യാര്ത്ഥികള്
കൂട്ടുകാരന്റെ പിറന്നാള് ആഘോഷത്തിന് കേക്കിന് പകരം കഞ്ചാവ് വലിച്ച വിദ്യാര്ത്ഥികളെ എക്സൈസ് പിടികൂടി. ചങ്ങനാശേരിയില് എക്സൈസ് നടത്തിയ പരിശോധനയിലാണ് പത്താം ക്ലാസ് വിദ്യാര്ത്ഥിയും പ്ലസ് വണ് വിദ്യാര്ത്ഥിയും അടങ്ങുന്ന ആറംഗ സംഘം പിടിയിലായത്. കൂട്ടത്തില് ഒരാള്ക്ക് മാത്രമാണ് 18 വയസ് തികഞ്ഞത്.
കൂട്ടുകാരന്റെ പിറന്നാളിന് കേക്കിന് പകരമാണ് വിദ്യാര്ത്ഥികള് കഞ്ചാവ് വലിച്ച് ആഘോഷിച്ചത്. കപ്ലങ്ങാ ചെടിയുടെ (പപ്പായ) തണ്ടും പ്ലാസ്റ്റിക് ബോട്ടിലും എം സീല് ഉപയോഗിച്ച് കൂട്ടിയോജിപ്പിച്ചാണ് വിദ്യാര്ത്ഥികള് കഞ്ചാവ് വലിക്കുന്നതിനുള്ള ബോങ് തയ്യാറാക്കിയത്. ഇതില് കഞ്ചാവ് നിറച്ച് മാറി മാറി വലിക്കുന്നതിനിടയിലാണ് ഇവര് പിടിയിലാകുന്നത്.
ശനിയാഴ്ച എസി റോഡില് ഒഴിഞ്ഞ തുരുത്തില് നിന്നാണ് വിദ്യാര്ത്ഥികളെ പിടികൂടിയത്. ഒഴിഞ്ഞ തുരുത്തിലേക്ക് യൂണിഫോം ധരിച്ച വിദ്യാര്ത്ഥികള് പോകുന്നത് കണ്ട് സംശയം തോന്നിയ നാട്ടുകാരാണ് എക്സൈസിനെ വിവരം അറിയിച്ചത്. മഫ്തിയിലെത്തിയ ചങ്ങനാശേരി എക്സൈസ് ഉദ്യോഗസ്ഥരും ഇന്റലിജന്സ് ഉദ്യോഗസ്ഥരും വിദ്യാര്ത്ഥികളെ വളയുകയായിരുന്നു. നാലു പേരെ പിടികൂടിയെങ്കിലും രണ്ട് പേര് ഓടിരക്ഷപ്പെട്ടു. വിദ്യാര്ത്ഥികളെ പിടികൂടാനുള്ള ശ്രമത്തിനിടയില് വീണ് പരിക്കേറ്റ ഉദ്യോഗസ്ഥനെ ജനറല് ആശുപത്രിയില് പ്രവേശിപ്പിച്ചു.
പിടിയിലായ വിദ്യാര്ത്ഥികളുടെ കൈയില് നിന്ന് ഒരു പായ്ക്കറ്റ് കഞ്ചാവ് പിടിച്ചെടുത്തു. പ്രതികള്ക്ക് പ്രായപൂര്ത്തിയാകാത്തതിനാല് ഇവരെ കൗണ്സിലിംഗിന് അയയ്ക്കും. ഓടി രക്ഷപ്പെട്ട രണ്ട് വിദ്യാര്ത്ഥികളുടെയും വിവരങ്ങള് ശേഖരിച്ചു. മാതാപിതാക്കളുമായി ഹാജരാകാന് നിര്ദേശം നല്കി.
എക്സൈസ് ഇന്സ്പെക്ടര് കെ അഭിലാഷിന്റെ നേതൃത്വത്തിലുള്ള സംഘമാണ് വിദ്യാര്ത്ഥികളെ പിടികൂടിയത്. ഇന്റലിജന്സ് ബ്യൂേേറാ ഇന്സ്പെക്ടര് ജി കിഷോര്, ഉദ്യോഗസ്ഥരായ ആന്റണി മാത്യു, ആന്റണി സേവ്യര്, ഉണ്ണികൃഷ്ണന്, ഷിജു, സജില്, രതീഷ്, സിയാദ് എന്നിവരും അന്വേഷണ സംഘത്തിലുണ്ടായിരുന്നു.
https://www.facebook.com/Malayalivartha
