പ്രധാനമന്ത്രി നരേന്ദ്ര മോദി പുതിയ ഓഫീസിലേക്ക്.അതിന്റെ കൂടുതൽ വിശദാംശങ്ങളാണ് പുറത്തു വരുന്നത് . ഉടൻ തന്നെ പുതിയ വിലാസത്തിലേക്ക് മാറിയേക്കുമെന്നാണ് റിപ്പോർട്ട്. സെൻട്രൽ വിസ്ത പുനർവികസന പദ്ധതിയുടെ ഭാഗമായി നിർമ്മിച്ച 'സേവാ തീർത്ഥ്' സമുച്ചയത്തിലേക്ക് ഈ ആഴ്ച തന്നെ പ്രധാനമന്ത്രി മാറിയേക്കും.ജനുവരി 14 ന് മകരസംക്രാന്തി ദിനത്തിൽ ഈ മാറ്റം നടപ്പിലാക്കാനാണ് പദ്ധതി. പ്രധാനമന്ത്രിയുടെ ഓഫീസ്,

കാബിനറ്റ് സെക്രട്ടേറിയറ്റ്, ദേശീയ സുരക്ഷാ കൗൺസിൽ സെക്രട്ടേറിയറ്റ് (എൻ‌എസ്‌സി‌എസ്) എന്നിവ സ്ഥാപിക്കുന്നതിനായാണ് ഈ സമുച്ചയം രൂപകൽപ്പന ചെയ്തിരിക്കുന്നത്, അവയിൽ മൂന്നിനും പ്രത്യേകം കെട്ടിടങ്ങൾ ലഭിക്കും.ആധുനിക സൗകര്യങ്ങളോടും സാംസ്കാരികമായി പ്രചോദനം ഉൾക്കൊണ്ട മീറ്റിങ് റൂമുകളോടും കൂടിയാണ് പുതിയ ഓഫീസ് നിർമിച്ചിരിക്കുന്നത്. കേന്ദ്ര ഭരണമേഖലയെ പുനർവികസിപ്പിക്കുകയെന്ന ലക്ഷ്യത്തോടെ 2019 ൽ നരേന്ദ്ര മോദി സർക്കാർ പ്രഖ്യാപിച്ച പദ്ധതിയുടെ നാലാം ഘട്ടമാണിത്.

നേരത്തെ 'എക്സിക്യൂട്ടീവ് എൻക്ലേവ്' എന്ന് അറിയപ്പെട്ടിരുന്ന കെട്ടിടം ഇപ്പോൾ 'സേവാ തീർഥ്' എന്ന് പുനർനാമകരണം ചെയ്യുകയായിരുന്നു. സേവനത്തിൻ്റെ പുണ്യസ്ഥലം എന്ന അർഥത്തിലാണ് സേവാ തീർഥ് എന്ന് പേര് മാറ്റിയത്.പ്രധാനമന്ത്രിയുടെ ഓഫീസ് സ്ഥാപിക്കുന്ന പുതിയ കെട്ടിടത്തിന് 'സേവാ തീർത്ഥ്-1' എന്നായിരിക്കും പേര്. 'സേവനം' എന്ന പ്രമേയത്തെ പ്രതിഫലിപ്പിക്കുന്ന ഗംഭീരമായ വർക്ക്സ്പേസുകളും ആചാരപരമായ മുറികളും ഇവിടെയുണ്ട്.

1947-ൽ ഇന്ത്യ സ്വാതന്ത്ര്യം നേടിയത് മുതൽ സൗത്ത് ബ്ലോക്കിലാണ് പ്രധാനമന്ത്രിയുടെ ഓഫീസ് പ്രവർത്തിച്ചിരുന്നത്. ഇതോടെ ആ കാലഘട്ടത്തിന് അന്ത്യമാകും.'സേവാ തീർഥ് 2' ഇതിനകം തന്നെ കാബിനറ്റ് സെക്രട്ടേറിയറ്റായി പ്രവർത്തനം ആരംഭിച്ചിട്ടുണ്ട്. കഴിഞ്ഞ വർഷം സെപ്റ്റംബറിലാണ് മാറ്റിസ്ഥാപിച്ചത്. എന്നാൽ 'സേവാ തീർഥ് -3' ദേശീയ സുരക്ഷാ ഉപദേഷ്ടാവിന്റെ ഓഫീസ് സ്ഥാപിക്കും.ഒഴിപ്പിച്ച് കഴിഞ്ഞാൽ, സൗത്ത്, നോർത്ത് ബ്ലോക്കുകൾ 'യുഗേ യുഗീൻ ഭാരത് സംഗ്രഹാലയ' എന്ന പേരിൽ ഒരു പൊതു മ്യൂസിയമാക്കി മാറ്റും.

ആസൂത്രിത മ്യൂസിയത്തിന്റെ വികസനത്തിനുള്ള സാങ്കേതിക സഹകരണത്തിനായി 2024 ഡിസംബർ 19 ന് ഫ്രാൻസിന്റെ മ്യൂസിയം വികസന ഏജൻസിയുമായി ഒരു കരാർ ഒപ്പുവച്ചിരുന്നു.സേവാ തീർത്ഥം മുഴുവൻ (എക്സിക്യൂട്ടീവ് എൻക്ലേവ് എന്നും അറിയപ്പെടുന്നു) 1,189 കോടി രൂപ ചെലവിൽ ലാർസൻ & ട്യൂബ്രോ കമ്പനിയാണ് നിർമിക്കുന്നത്. ഇത് 2,26,203 ചതുരശ്ര അടി വിസ്തൃതിയുള്ളതാണ്. "എക്സിക്യൂട്ടീവ് എൻക്ലേവ് പാർട്ട് 2" എന്ന് പേരിട്ടിരിക്കുന്ന പ്രധാനമന്ത്രിയുടെ പുതിയ ഔദ്യോഗിക വസതിയും സമീപത്ത് നിർമ്മാണത്തിലാണ്.