കൈവരികള്‍ തകര്‍ന്നും കോണ്‍ക്രീറ്റ് പാളികള്‍ അടര്‍ന്നും മണപ്പാടിപാലം അപകടാവസ്ഥയിലായിട്ടും അപകട ഭീഷണി പരിഹരിക്കാതെ പെയിന്റടിച്ച് വെളുപ്പിച്ച് പൊതുമരാമത്ത് വകുപ്പ് അധികൃതര്‍. അറക്കുളം പഞ്ചായത്തിലെ 9, 11 വാര്‍ഡുകളെ തമ്മില്‍ ബന്ധിപ്പിക്കുന്ന പാലത്തിന്റെ നിലവിലെ അവസ്ഥയാണിത്. പാലം ഭീഷണിയായിട്ടും അധികൃതര്‍ക്ക് യാതൊരു കുലുക്കവുമില്ല. 15 വര്‍ഷം മുമ്പ് അപകടാവസ്ഥ തിരിച്ചറിഞ്ഞപ്പോള്‍, മുന്നറിയിപ്പ് ബോര്‍ഡ് സ്ഥാപിച്ച് കണ്ണില്‍ പൊടിയിടാനായി ചില്ലറ അറ്റകുറ്റപ്പണികള്‍ നടത്തി വരുന്നതല്ലാതെ പുനര്‍നിര്‍മ്മാണം എങ്ങുമെത്തിയിട്ടില്ല.

ഇതിനിടയിലാണ് ഇടയ്ക്കിടെയുള്ള ചായംപൂശല്‍. മൂലമറ്റംവഴി പുള്ളിക്കാനം വാഗണ്‍ ഭാഗത്തേക്കുള്ള പ്രധാനപാതയിലാണ് പാലം. വാഗമണ്‍, കോലാഹലമേട് അടക്കമുള്ള മേഖലകളിലേക്ക് വിനോദസഞ്ചാരികള്‍ ഉള്‍പ്പെടെ നൂറ് കണക്കിനാളുകളാണ് ദിവസവും ഈ പാലം വഴി സഞ്ചരിക്കുന്നത്. മഴക്കാലത്ത് വെള്ളംകെട്ടിക്കിടന്നും യാത്ര ദുരിതമാണ്. വീതികുറഞ്ഞ പാലം വാഹനയാത്രികര്‍ക്കും കാല്‍നടയാത്രക്കാര്‍ക്കും ഇരട്ടി ദുരിതമാണ്.

60 വര്‍ഷത്തോളം പഴക്കമുള്ള പാലം അപകടാവസ്ഥയിലായതിനെ തുടര്‍ന്ന് ഭാരവാഹനങ്ങള്‍ക്ക് മുന്നറിയിപ്പുമായി പൊതുമരാമത്ത് വകുപ്പ് 15 വര്‍ഷങ്ങള്‍ക്ക് മുമ്പ് സ്ഥാപിച്ച ബോര്‍ഡ് പാലത്തേക്കാള്‍ അപകടാവസ്ഥയില്‍. ഏത് നിമിഷവും നിലം പതിക്കാവുന്ന അവസ്ഥയിലാണ് ഈ ബോര്‍ഡ്. ഇതിനിടയിലാണ് പെയിന്റടിച്ച് പാലം സൗന്ദര്യവത്കരിക്കാനുള്ള അധികൃതരുടെ ജാഗ്രത.

ഒരു ബോര്‍ഡ് പോലും സംരക്ഷിക്കാനാകാത്തവര്‍ പാലം എങ്ങനെ സംരക്ഷിക്കുമെന്നാണ് ജനം ചോദിക്കുന്നത്. കൈവരികള്‍ തകര്‍ന്നു വീതികുറഞ്ഞ പാലത്തില്‍ വാഹനാപകടങ്ങള്‍ തുടര്‍ക്കഥയാവുകയാണ്. അപകടത്തില്‍ പാലത്തിന്റെ കൈവരികളും തകര്‍ന്നിട്ടുണ്ട്. ഏതാനും നാളുകള്‍ക്ക് മുമ്പ് നിയന്ത്രണം വിട്ട ഒരു വാഹനം ഇടിച്ചാണ് കൈവരി തകര്‍ന്നത്.