സിപിഎം കേന്ദ്രകമ്മിറ്റിയംഗം കെ.കെ.ശൈലജ ഇത്തവണ പേരാവൂരില്‍ മല്‍സരിക്കും. ഇന്നു ചേര്‍ന്ന സിപിഎം കണ്ണൂര്‍ ജില്ലാ സെക്രട്ടേറിയറ്റിന്റേതാണ് തീരുമാനം. സിറ്റിങ് സീറ്റായ മട്ടന്നൂരില്‍ ഇത്തവണ ശൈലജയെ പാര്‍ട്ടി പരിഗണിച്ചിരുന്നില്ല. എന്നാല്‍ ജനപിന്തുണയുള്ള നേതാവിനെ ഒഴിവാക്കുന്നത് തിരിച്ചടിയാകുമെന്ന വികാരം പാര്‍ട്ടിയിലെ ഒരു വിഭാഗം പ്രകടിപ്പിച്ചിരുന്നു. മട്ടന്നൂരില്‍നിന്ന് ഒഴിവാക്കുന്നതില്‍ ശൈലജയും അതൃപ്തി പ്രകടിപ്പിച്ചിരുന്നതായി സൂചനയുണ്ട്.

രണ്ടു ടേം മാനദണ്ഡത്തിന്റെ പേരില്‍ ഇത്തവണ മാറ്റിനിര്‍ത്തുന്ന നേതാക്കളുടെ കൂട്ടത്തില്‍ ശൈലജയുടെ പേരും ഉയര്‍ന്നിരുന്നു. കണ്ണൂര്‍ ജില്ലാ സെക്രട്ടേറിയറ്റ് കഴിഞ്ഞ ദിവസം തയാറാക്കിയ സ്ഥാനാര്‍ഥിപ്പട്ടികയില്‍ മട്ടന്നൂരില്‍ ശൈലജയുടെ പേര് ഉണ്ടായിരുന്നില്ല. ശൈലജയെ മല്‍സരിപ്പിക്കണമെന്ന് പാര്‍ട്ടിക്കുള്ളില്‍നിന്നു തന്നെ ആവശ്യമുയര്‍ന്നിരുന്നെങ്കിലും ഉറച്ച സീറ്റുകളില്‍ ടേം വ്യവസ്ഥയില്‍ ഇളവു നല്‍കേണ്ടെന്ന തീരുമാനത്തില്‍ നേതൃത്വം ഉറച്ചു നില്‍ക്കുകയായിരുന്നു, അതേസമയം, ജയം ഉറപ്പില്ലാത്ത മണ്ഡലങ്ങളില്‍ വ്യവസ്ഥയില്‍ ഇളവു നല്‍കാമെന്ന തീരുമാനവുമുണ്ടായി. എന്നാല്‍ ശൈലജയെ മത്സരിപ്പിക്കണമെന്നു കേന്ദ്ര നേതൃത്വം നിര്‍ദേശിച്ചതായി വിവരമുണ്ടായിരുന്നു.

5 തവണ മത്സരിച്ച ശൈലജ 4 ജയങ്ങളോടെ 20 വര്‍ഷം എംഎല്‍എയായിരുന്നു. 3 മണ്ഡലങ്ങളിലായാണു ജയങ്ങള്‍; 1996ലും 2016ലും കൂത്തുപറമ്പിലും 2006ല്‍ പേരാവൂരിലും. 60,963 വോട്ടിന്റെ റെക്കോര്‍ഡ് ഭൂരിപക്ഷത്തിലാണ് കെ.കെ.ശൈലജ കഴിഞ്ഞ തവണ മട്ടന്നൂര്‍ മണ്ഡലത്തില്‍ ജയിച്ചത്. ആര്‍എസ്പിയിലെ ഇല്ലിക്കല്‍ അഗസ്തിയായിരുന്നു എതിരാളി. 2016ല്‍ കൂത്തു പറമ്പില്‍നിന്ന് 12,291 വോട്ടിനു വിജയിച്ചു. ജെഡിയുവിലെ കെ.പി.മോഹനനായിരുന്നു എതിരാളി. 2011ല്‍ പേരാവൂര്‍ മണ്ഡലത്തില്‍ കോണ്‍ഗ്രസിലെ സണ്ണി ജോസഫിനോട് 3,440 വോട്ടിനു പരാജയപ്പെട്ടു. 2006ല്‍ പേരാവൂരില്‍ 9,099 വോട്ടിനു വിജയിച്ചു. കോണ്‍ഗ്രസിലെ എ.ഡി.മുസ്തഫയായിരുന്നു എതിരാളി.

2011ല്‍ ശൈലജയെ തോല്‍പിച്ച സണ്ണി ജോസഫില്‍നിന്നു പേരാവൂര്‍ തിരിച്ചുപിടിക്കാന്‍ അവിടെ മത്സരിപ്പിക്കണമെന്ന നിര്‍ദേശം 2016ലും 2021ലും പാര്‍ട്ടിയില്‍ ഉയര്‍ന്നിരുന്നെങ്കിലും സുരക്ഷിത മണ്ഡലങ്ങള്‍ നല്‍കുകയായിരുന്നു.