ജ്യൂസില് വിഷം കലര്ത്തി നല്കി മക്കള്ക്ക് നല്കി; പിതാവിനും മകള്ക്കും കണ്ണീരോടെ വിട
ജ്യൂസില് വിഷം കലര്ത്തി നല്കി മക്കള്ക്ക് നല്കിയ ശേഷം വിഷം കഴിച്ച് ജീവനൊടുക്കിയ പിതാവിനും മകള്ക്കും കണ്ണീരോടെ യാത്രാമൊഴി നല്കി നാട്. മാന്നാര് ഗ്രാമപഞ്ചായത്ത് 19ാം വാര്ഡില് ശിവശൈലത്തില് മനോജ് (45), ആറാം ക്ലാസ് വിദ്യാര്ഥിനിയായ മൂത്തമകള് ശിവനന്ദന എന്നിവരുടെ വേര്പാടാണ് ഒരു നാടിനെ ഒന്നടങ്കം നൊമ്പരപ്പെടുത്തിയത്. ഇരുവരുടെയും മൃതദേഹങ്ങള് വന് ജനാവലിയുടെ സാന്നിധ്യത്തില് കുരട്ടിക്കാട് മുത്താരമ്മന് ട്രസ്റ്റ് ശ്മശാനത്തില് സംസ്കരിച്ചു. കഴിഞ്ഞ ദിവസമാണ് നാടിനെ നടുക്കിയ സംഭവമുണ്ടായത്. കുരട്ടിക്കാട് ശ്രീഭുവനേശ്വരി സ്കൂള് വിദ്യാര്ഥിനികളായ രണ്ടു പെണ്മക്കളെയും മനോജ് കാറിലെത്തി നേരത്തേ വിളിച്ചുകൊണ്ടുപോകുകയായിരുന്നു. വഴിയില് വെച്ച് വിഷം കലര്ത്തിയ ജ്യൂസ് മക്കള്ക്ക് നല്കിയ ശേഷം മനോജും കുടിച്ചു. ഇതറിയാതെയാണ് നിഷ്കളങ്കരായ ആ കുരുന്നുകള് ജ്യൂസ് കുടിച്ചത്. പിന്നീട് റോഡരികില് നിര്ത്തിയിട്ട കാറില് അവശനിലയില് കണ്ട ഇവരെ പ്രദേശവാസികളിലൊരാള് അതേ കാറില്തന്നെ പരുമലയിലെ ആശുപത്രിയില് എത്തിച്ചെങ്കിലും മനോജിന്റെയും ശിവനന്ദനയുടെയും ജീവന് രക്ഷിക്കാനായില്ല.
രണ്ടാമത്തെ മകള് ശിവഗംഗ അപകടനില തരണം ചെയ്തിട്ടുണ്ട്. ആലപ്പുഴ മെഡിക്കല് കോളേജില് പോസ്റ്റ്മോര്ട്ടത്തിന് ശേഷം രണ്ട് ആംബുലന്സുകളിലായി മൃതദേഹങ്ങള് വീട്ടിലെത്തിച്ചപ്പോള് ഹൃദയഭേദകമായ കാഴ്ചകളാണ് അരങ്ങേറിയത്. മൃതദേഹം ഒരുനോക്ക് കാണാന് വലിയ ജനത്തിരക്കാണ് അനുഭവപ്പെട്ടത്. ശിവനന്ദനയും ശിവഗംഗയും പഠിച്ച സ്കൂളിലെ അധ്യാപകരും വിദ്യാര്ഥികളും ഉള്പ്പെടെ നാനാതുറകളില്പ്പെട്ട നിരവധി പേര് അന്ത്യാഞ്ജലി അര്പ്പിക്കാന് എത്തിയിരുന്നു.
https://www.facebook.com/Malayalivartha
