സര്ക്കാര് നല്കിയ ഉറപ്പിന്മേല് മെഡിക്കല് കോളേജ് ഡോക്ടര്മാരുടെ സമരം താല്കാലികമായി നിറുത്തിവച്ചു
മെഡിക്കല് കോളേജ് ഡോക്ടര്മാരുടെ ശമ്പള കുടിശ്ശിക അനുവദിക്കുന്ന കാര്യത്തിലും ആശുപത്രികളുടെ നിലവാരം വര്ദ്ധിപ്പിക്കുന്ന കാര്യത്തിലും സര്ക്കാര് നല്കിയ ഉറപ്പിനെത്തുടര്ന്ന്, രോഗികളുടെയും വിദ്യാര്ത്ഥികളുടെയും ബുദ്ധിമുട്ടുകള് കണക്കിലെടുത്ത് നിലവിലെ സമരപരിപാടികള് താല്ക്കാലികമായി നീട്ടിവെക്കാന് കേരള ഗവണ്മെന്റ് മെഡിക്കല് കോളേജ് ടീച്ചേഴ്സ് അസോസിയേഷന് തീരുമാനിച്ചു.
ഒ.പി , അധ്യയനം, മുന്കൂട്ടി നിശ്ചയിച്ച ശസ്ത്രക്രിയകള് എന്നിവയില് നിന്നുള്ള വിട്ടുനില്ക്കല് അടുത്ത ഒരാഴ്ച്ചത്തേക്ക് താല്ക്കാലികമായി മാറ്റിവെച്ചു. നിരാഹാര സമരവും നിര്ത്തിവച്ചു. .ആരോഗ്യവകുപ്പ് മന്ത്രിയുടെ നിര്ദ്ദേശപ്രകാരം ആരോഗ്യവകുപ്പ് അഡീഷണല് ചീഫ് സെക്രട്ടറിയുമായി കെ.ജി.എം.സി.ടി.എ സംസ്ഥാന ഭാരവാഹികള് നടത്തിയ ചര്ച്ചകളിലാണ് അനുകൂല തീരുമാനമുണ്ടായത്. 18 മാസത്തെ കുടിശ്ശിക ഇപ്പോള് തന്നെ അനുവദിക്കുവാനുള്ള നടപടികള് എടുക്കാമെന്നും, ബാക്കി 39 മാസത്തെ തുക നിയമപരമായ തീരുമാനങ്ങള്ക്ക് അനുസരിച്ച് നല്കാമെന്നും ഗവണ്മെന്റിന് വേണ്ടി ആരോഗ്യവകുപ്പ് അഡീഷണല് ചീഫ് സെക്രട്ടറി രേഖാമൂലം ഉറപ്പു നല്കി. 18 മാസത്തെ കുടിശ്ശിക നല്കുന്നതിന് മറ്റ് നിയമപരമായ തടസ്സങ്ങളില്ലെന്ന് വ്യക്തമാക്കിയ അഡീഷണല് ചീഫ് സെക്രട്ടറി, തുക എത്രയും വേഗം ലഭ്യമാക്കുന്നതിന് ആരോഗ്യവകുപ്പ് ഉത്തരവാദിത്തം ഏറ്റെടുക്കുമെന്നും സംഘടനാ പ്രതിനിധികളെ അറിയിച്ചു.
തസ്തികകളുടെ എണ്ണം വര്ദ്ധിപ്പിക്കല് ഉള്പ്പെടെ ആശുപത്രികളുടെ നിലവാരം മെച്ചപ്പെടുത്തുന്നതിന് വേണ്ടിയുള്ള നടപടികള് കാര്യക്ഷമമായി നടപ്പിലാക്കാമെന്ന് നേരത്തെ തന്നെ അധികൃതര് ഉറപ്പു നല്കിയിരുന്നു. സമരം തുടങ്ങിയതിനു ശേഷം ഇതിന്റെ ഭാഗമായി കുറച്ചെങ്കിലും പുതിയ തസ്തികകള് സൃഷ്ടിക്കുകയും ചെയ്തിട്ടുണ്ട്. കാസര്ഗോഡ്, വയനാട് മെഡിക്കല് കോളേജുകളിലായി ഡോക്ടര്മാരുടെ 44 തസ്തികകള് സമരത്തെ തുടര്ന്ന് 2025 നവംബറില് സൃഷ്ടിച്ചിരുന്നു. പൊതുസമൂഹത്തിനായി ഈ സമരം നല്കിയ സംഭാവനയായി ഇതിനെ വിലയിരുത്തണം. മെഡിക്കല് കോളേജുകളുടെ പ്രവര്ത്തന നിലവാരം വര്ദ്ധിപ്പിക്കുവാന് കൂടുതല് തസ്തികകള് സൃഷ്ടിക്കുന്ന കാര്യം പരിഗണിക്കാമെന്നും അധികൃതര് അറിയിച്ചിട്ടുണ്ട്.
പ്രവേശന തസ്തികയിലെ ശമ്പള കുറവ് സമരത്തിന്റെ ആദ്യഘട്ടത്തില് പരിഹരിച്ചത് മെഡിക്കല് കോളജുകളിലേക്ക് കൂടുതല് യുവ ഡോക്ടര്മാര് എത്താനും അതുവഴി ഒഴിഞ്ഞുകിടക്കുന്ന തസ്തികകളും പുതുതായി സൃഷ്ടിക്കാന് പോകുന്ന തസ്തികകളും നികത്താനും കാരണമാകും . അത് മെഡിക്കല് കോളജുകള് തകര്ച്ചയിലേക്ക് പോകുന്നത് ഒഴിവാക്കാന് സഹായിക്കും. മെഡിക്കല് കോളേജുകളുടെ നിലവാരം ഉയര്ത്തുവാന് വേണ്ടിയുള്ള മറ്റ് ക്രിയാത്മകമായ നിര്ദ്ദേശങ്ങളുമായി ഇനിയും മുന്നോട്ടു പോകുമെന്നും സംഘടന അറിയിച്ചു.
https://www.facebook.com/Malayalivartha
