കോര്‍പറേഷന്‍ പ്രവര്‍ത്തനം അവതാളത്തിലായെന്ന് വിമര്‍ശനം ഉന്നയിച്ച മന്ത്രി വി ശിവന്‍കുട്ടിക്കെതിരെ മേയര്‍ വിവി രാജേഷ്. നഗരത്തിലെ മാലിന്യം സംസ്‌കരണം അവതാളത്തിലാക്കിയത് ശിവന്‍കുട്ടിയുടെ നേതൃത്വത്തിലാണ്. തിരുവനന്തപുരത്ത് മാത്രമല്ല, മാലിന്യ സംസ്‌കരണമെന്ന് കേള്‍ക്കുമ്പോള്‍ സിപിഎം കേരളത്തെ മുഴുവന്‍ ഭയപ്പാടിലാക്കുന്ന തരത്തിലാണ് പ്രവര്‍ത്തിച്ചത്. വിളപ്പില്‍ശാല എന്ന് കേള്‍ക്കുമ്പോള്‍ ആളുകള്‍ക്ക് ഭയമാണെന്നും രാജേഷ് പറഞ്ഞു. തിരുവനന്തപുരം ന?ഗരത്തില്‍ പലയിടത്തും കുടിവെള്ളം മുടങ്ങിയ അവസ്ഥയിലാണെന്ന് വാര്‍ത്തകള്‍ പുറത്തുവന്നിരുന്നു. ഇതിന് പിന്നാലെയാണ് മന്ത്രി കോര്‍പ്പറേഷനെതിരെ രൂക്ഷ വിമര്‍ശനവുമായി രംഗത്ത് വന്നത്.

കോര്‍പറേഷന്‍ പ്രവര്‍ത്തനം അവതാളത്തിലായെന്നും നാറാത്തത് നാറുമെന്നായിരുന്നു ബിജെപിക്കെതിരെ ശിവന്‍കുട്ടിയുടെ വിമര്‍ശനം. മാലിന്യ നിര്‍മാര്‍ജനം പാടെ പാളിയെന്നും തെരുവുനായ് ശല്യം കൂടിയെന്നും ശിവന്‍കുട്ടി ആരോപിച്ചിരുന്നു. പലയിടത്തും തെരുവുവിളക്ക് കത്തുന്നില്ല. മാലിന്യനീക്കം പാടെ പാളി. നഗരം പകര്‍ച്ച വ്യാധി ഭീതിതിയിലാണെന്നും നഗരത്തിലെ ജനജീവിതം ദുസ്സഹമാക്കരുതെന്നും സര്‍വ്വ കക്ഷിയോഗം വിളിക്കണമെന്നും ശിവന്‍കുട്ടി ആവശ്യപ്പെട്ടിരുന്നു. എന്നാല്‍ ശിവന്‍കുട്ടിയുടെ ആവേശം നാലാം തീയതി ആകുമ്പോഴെക്കും അടങ്ങുമെന്ന് വിവി രാജേഷ് തിരിച്ചടിച്ചു. നേതാവിന് ഇതുവരെ തോറ്റു എന്ന് ബോധ്യപ്പെട്ടിട്ടില്ല. അതുകൊണ്ടാണ് എന്തിനും കോര്‍പ്പറേഷന്റെ മുകളിലേക്ക് കയറുന്നതെന്നും മേയര്‍ മറുപടി നല്‍കി.

മഴക്കാല പൂര്‍വ്വ ശുചീകരണ പ്രവര്‍ത്തനങ്ങള്‍ക്കായി തെരഞ്ഞെടുപ്പ് ചട്ടം വരുന്നതിന് മുന്‍പ് തന്നെ വാര്‍ഡുകള്‍ക്ക് സാമ്പത്തിക സഹായം നല്‍കുന്നതിനുള്ള നടപടികള്‍ സ്വീകരിച്ചുവെന്ന് വി.വി രാജേഷ് പറഞ്ഞു. നഗരത്തില്‍ പരമാവധി 30 ശതമാനം മേഖലയാണ് കോര്‍പ്പറേഷന്‍ പരിധിയില്‍ വരുന്നത്. ശുചീകരണത്തിനായി റിട്ടയേര്‍ഡ് ഉദ്യോഗസ്ഥരുടെ അടക്കം അഭിപ്രായം തേടിയിരുന്നു. കോര്‍പ്പറേഷന്‍ ഫണ്ട്, ദുരന്ത നിവാരണ ഫണ്ട് എന്നിവ ഉപയോഗിച്ച് ഇന്ന് വൈകുന്നേരം മുതല്‍ ശുചീകരണം ആരംഭിക്കും. 38 വാര്‍ഡുകളിലാണ് വെള്ളക്കെട്ട് രൂപപ്പെടുന്നത്. ഇവിടങ്ങളില്‍ പല ഭാഗങ്ങളും സന്ദര്‍ശിച്ചതായും മേയര്‍ മാധ്യമങ്ങളോട് പ്രതികരിച്ചു.

മറ്റു ഡിപ്പാര്‍ട്ട്‌മെന്റുകള്‍ അവരവരുടെ മേഖലകള്‍ വൃത്തിയാക്കണം. ഇതിന് കാലതാമസം ഉണ്ടെങ്കില്‍ കോര്‍പ്പറേഷന്‍ അനുമതി വാങ്ങി ശുചീകരിക്കും. റെയില്‍വേ യോഗം വിളിച്ച് അവരുടെ ഉത്തരവാദിത്തം പൂര്‍ത്തീകരിക്കാന്‍ കോര്‍പ്പറേഷന്‍ ആവശ്യപ്പെടും. ആമയിഴഞ്ചന്‍ തോട് ക്ലീന്‍ ചെയ്യുന്നതില്‍ തദ്ദേശ സ്വയംഭരണ വകുപ്പിന്റെ റെബോട്ടിന് പരിമിതികള്‍ ഉണ്ട്. ജെസിബി ചെയ്യുന്ന ജോലി മാത്രമാണ് റെബോട്ടിന് ചെയ്യാന്‍ കഴിയുന്നത്. കൂടുതല്‍ മെഷിനറി ആവശ്യമാണ്. വകുപ്പുകളുമായി സംസാരിച്ച് ഇതിന് ആവശ്യമായ നടപടികള്‍ സ്വീകരിക്കുമെന്നും മേയര്‍ വിവി രാജേഷ് വ്യക്തമാക്കി.