വര്‍ക്കലയെയും ഫോര്‍ട്ട് കൊച്ചിയെയും കുറിച്ച് ഇന്ത്യന്‍ വ്‌ലോഗറുടെ വിദ്വേഷ പ്രചരണത്തില്‍ പ്രതികരിച്ച് ആഭ്യന്തരമന്ത്രി രമേശ് ചെന്നിത്തല. ആവിഷ്‌കാര സ്വാതന്ത്ര്യം ഉത്തരവാദിത്വത്തോടെ വിനിയോഗിക്കേണ്ടതാണെന്നും അത് സമൂഹത്തില്‍ ഭിന്നതയും വര്‍ഗീയ വിദ്വേഷവും പടര്‍ത്താനുള്ള ഉപാധിയാകരുതെന്നും അദ്ദേഹം പറഞ്ഞു. ഫേസ്ബുക്ക് പോസ്റ്റിലൂടെയാണ് അദ്ദേഹത്തിന്റെ പ്രതികരണം.

വര്‍ക്കലയെയും ഫോര്‍ട്ട് കൊച്ചിയെയും കുറിച്ച് വ്യാജപ്രചാരണങ്ങള്‍ നടത്തി വര്‍ഗീയ സംശയവും വിദ്വേഷവും വളര്‍ത്താനുള്ള ശ്രമങ്ങള്‍ ഗൗരവത്തോടെയാണ് കാണുന്നതെന്നും രമേശ് ചെന്നിത്തല വ്യക്തമാക്കി. നിയമം ലംഘിക്കുന്നവര്‍ക്കെതിരെ കര്‍ശന നടപടി ആഭ്യന്തര വകുപ്പ് സ്വീകരിക്കും. ഈ വിഷയത്തില്‍ വ്‌ലോഗര്‍ അമൃത് സിംഗ് ഡാരനെതിരെ ഫോര്‍ട്ട് കൊച്ചി പൊലീസ് എഫ്‌ഐആര്‍ രജിസ്റ്റര്‍ ചെയ്തിട്ടുണ്ടെന്നും അദ്ദേഹം വ്യക്തമാക്കി.

ഫോര്‍ട്ട് കൊച്ചിയില്‍ നിറയെ മുസ്ലിങ്ങളാണെന്നും കേരളം അപകടത്തിലാണെന്നും പറഞ്ഞ് വീഡിയോ പങ്കുവച്ച സംഭവത്തില്‍ ഇന്നലെ ഉത്തരേന്ത്യന്‍ വ്‌ലോഗര്‍ക്കെതിരെ പൊലീസ് കേസെടുത്തിരുന്നു. വ്‌ലോഗറായ അമൃത് സിംഗ് ഡാരനെതിരെയാണ് ബിഎന്‍എസ് 353(2), 192 വകുപ്പുകള്‍ ചുമത്തി കേസെടുത്തിരിക്കുന്നത്.

താനിപ്പോള്‍ കേരളത്തിലാണെന്നും ഇത് പറഞ്ഞതിന്റെ പേരില്‍ തനിക്ക് എന്തെങ്കിലും സംഭവിച്ചാല്‍ ഉത്തരവാദി കേരള സര്‍ക്കാരാണെന്നും ഇയാള്‍ വിഡിയോയില്‍ പറഞ്ഞിരുന്നു. കേരളത്തില്‍ മുഴുവന്‍ ബീഫാണെന്നും കൂടുതലും മുസ്ലിങ്ങളാണെന്നും പറയുന്ന വ്‌ലോഗര്‍ കേരളം കൈവിട്ട് പോയെന്നും കേന്ദ്രം എത്രയും വേഗം ഇടപെടണമെന്ന് ആവശ്യപ്പെടുകയും ചെയ്തിരുന്നു.