കൊച്ചിയില്‍ വീണ്ടും നെടുമ്പാശേരി മോഡല്‍ അപകടം..അഡീഷണല്‍ സെഷന്‍സ് ജഡ്ജിയുടെ 17-കാരനായ മകന്‍ ഓടിച്ച ബെന്‍സ് കാറിടിച്ച് തട്ടുകട ഉടമ കൊല്ലപ്പെട്ടു..ബന്ധുക്കളോട് ജഡ്ജിയുടെ ഭീഷണി..
കൊച്ചിയില്‍ വീണ്ടും നെടുമ്പാശേരി മോഡല്‍ അപകടം. കൊച്ചി ചേരാനല്ലൂരില്‍ അഡീഷണല്‍ സെഷന്‍സ് ജഡ്ജിയുടെ 17-കാരനായ മകന്‍ ഓടിച്ച ബെന്‍സ് കാറിടിച്ച് തട്ടുകട ഉടമ മാഞ്ഞാലി സ്വദേശി ജയബാലകൃഷ്ണന്‍ കൊല്ലപ്പെട്ട സംഭവത്തില്‍ പൊലീസിനും ജഡ്ജിക്കുമെതിരെ ഗുരുതര ആരോപണങ്ങളുമായി കുടുംബം. സംഭവം ഒതുക്കിത്തീര്‍ക്കാന്‍ ശ്രമം നടക്കുന്നതായും പ്രതിയായ പ്രായപൂര്‍ത്തിയാകാത്ത കൗമാരക്കാരനും കുടുംബത്തിനും പൊലീസ് സംരക്ഷണം ഒരുക്കുകയാണെന്നും ജയബാലകൃഷ്ണന്റെ ബന്ധുക്കള്‍ ആരോപിച്ചു. നിയമത്തിന് മുന്‍പില്‍ എല്ലാവരും തുല്യരാണെന്നും,
പ്രായപൂര്‍ത്തിയാകാത്ത കുട്ടിക്ക് ലൈസന്‍സില്ലാതെ അതിവേഗത്തില്‍ ഓടിക്കാന്‍ വാഹനം നല്‍കിയ മാതാപിതാക്കള്‍ക്കെതിരെ കൊലക്കുറ്റത്തിന് കേസെടുക്കണമെന്നും കുടുംബം ആവശ്യപ്പെട്ടു.കഴിഞ്ഞ 26 വര്‍ഷമായി പ്രദേശത്ത് തട്ടുകട നടത്തി കുടുംബം പുലര്‍ത്തിയിരുന്ന അതീവ ശാന്തനായ മനുഷ്യനായിരുന്നു കൊല്ലപ്പെട്ട ജയബാലകൃഷ്ണന്‍. മകളുടെ കല്യാണ ആവശ്യങ്ങള്‍ക്കും കുടുംബപരമായ ബാധ്യതകള്‍ക്കുമായി സഹകരണ ബാങ്കിലടക്കം വലിയ തുക കടബാധ്യതയുള്ള ഇദ്ദേഹം ഒരു ദിവസം കട തുറന്നില്ലെങ്കില്‍ ആ കുടുംബത്തിന്റെ ജീവിതം വഴിമുട്ടുന്ന അവസ്ഥയിലാണ്.
പുലര്‍ച്ചെ ജോലി കഴിഞ്ഞ് അരിയും മറ്റ് സാധനങ്ങളുമായി സ്‌കൂട്ടറില്‍ വീട്ടിലേക്ക് മടങ്ങവെയാണ് അമിതവേഗത്തിലെത്തിയ ബെന്‍സ് കാര്‍ പിന്നില്‍ ഇടിച്ചുതെറിപ്പിച്ചത്.അപകടമുണ്ടാക്കിയ ബെന്‍സ് കാര്‍ നൂറിലധികം കിലോമീറ്റര്‍ വേഗതയിലായിരുന്നു സഞ്ചരിച്ചിരുന്നതെന്ന് ദൃക്സാക്ഷികളും കുടുംബവും പറയുന്നു. സ്‌കൂട്ടറില്‍ ഇടിച്ചതിന് ശേഷവും വാഹനം നിര്‍ത്താതെ ഒരു കിലോമീറ്ററോളം മുന്നോട്ട് പാഞ്ഞുപോയി. 'അപകടമുണ്ടാക്കിയ കാറിന്റെ സെന്ററില്‍ തന്നെ തലയിടിച്ച പാട് കൃത്യമായി കാണാം. കാര്‍ കിടക്കുന്നതിന്റെ മീറ്ററുകള്‍ അപ്പുറത്താണ് അപകടമുണ്ടായത്.
അതായത് അതിവേഗത്തില്‍ വന്ന കാര്‍ എന്റെ അമ്മാവനെ ഇടിച്ച ശേഷം നിര്‍ത്താതെ പോകാനാണ് ശ്രമിച്ചത്. മറ്റു വഴിയില്ലാത്തതുകൊണ്ടാണ് 17-കാരന്‍ അവിടെ കുടുങ്ങിയത്.' മരിച്ച ജയബാലകൃഷ്ണന്റെ സഹോദരീപുത്രി ജയലക്ഷ്മി പറഞ്ഞു.അപകടവിവരമറിഞ്ഞ് ചേരാനല്ലൂര്‍ പൊലീസ് സ്റ്റേഷനിലെത്തിയ ബന്ധുക്കളെ പ്രതിയായ കൗമാരക്കാരനെയോ അയാളുടെ പിതാവിനെയോ കാണാന്‍ പൊലീസ് ആദ്യം അനുവദിച്ചില്ല.തുടര്‍ന്ന് പ്രതിയുടെ പിതാവായ ജഡ്ജിയോട് സംസാരിച്ചപ്പോള്‍ വളരെ മോശമായ അനുഭവമാണ് ഉണ്ടായതെന്ന് ബന്ധുക്കള്‍ വ്യക്തമാക്കുന്നു. '17 വയസ്സുള്ള പയ്യന്റെ കയ്യില്‍ വണ്ടി കൊടുത്തുവിടാന്‍ പാടില്ലെന്ന് അറിയില്ലേയെന്ന് ചോദിച്ചപ്പോള്‍ 'നിങ്ങളെന്നെ ചോദ്യം ചെയ്യാനൊന്നും നില്‍ക്കേണ്ട' എന്നായിരുന്നു അദ്ദേഹത്തിന്റെ മറുപടി.
മാമന്‍ റോഡില്‍ ചിതറിക്കിടക്കുമ്പോഴാണീ അഹങ്കാരം... ഇടിയുടെ ആഘാതത്തില്‍ ശരീരത്തിലെ ഓരോ പാര്‍ട്‌സും റോഡില്‍ ചിന്നിച്ചിതറി വീണുകിടക്കുമ്പോഴാണ് ഈ ഹുങ്ക്. അത്രയ്ക്കും സ്‌ട്രോങ് ആയിട്ടാണ് വണ്ടി വന്ന് ഇടിച്ചത്.ഞങ്ങള്‍ സ്റ്റേഷനില്‍ ചെന്നപ്പോഴും 'നിങ്ങളെന്നെ ചോദ്യം ചെയ്യാനൊന്നും നില്‍ക്കേണ്ട' എന്ന് തന്നെയാണ് കാറോടിച്ച പയ്യന്റെ അച്ഛന്‍ പറഞ്ഞത്. ആ ഒരു അധികാരത്തിന്റെ ഹുങ്കും അഹങ്കാരവും അംഗീകരിക്കാനാകില്ല. ഡിസ്ട്രിക്ട് ജഡ്ജിയാണെങ്കിലും ദൈവം തമ്പുരാനാണെങ്കിലും ഞങ്ങള്‍ക്ക് ചോദ്യം ചെയ്യാതിരിക്കാനാകില്ലല്ലോ? അല്‍പം എളിമയോടെയെങ്കിലും ആ ജഡ്ജി സംസാരിച്ചിരുന്നെങ്കില്‍ ഇത്രയും ബുദ്ധിമുട്ട് തോന്നില്ലായിരുന്നു.' ജയലക്ഷ്മി മാധ്യമങ്ങളോട് പറഞ്ഞു.
https://www.facebook.com/Malayalivartha
