പതിനഞ്ച് വർഷം മുമ്പ് യുവതിയെയും രണ്ടര വയസ്സുള്ള മകളെയും കടലിൽ തള്ളിയിട്ട് കൊലപ്പെടുത്തിയ ഊരൂട്ടമ്പലം ഇരട്ടക്കൊലപാതകക്കേസിന്റെ വിചാരണ ഇന്ന് ആരംഭിക്കും. തിരുവനന്തപുരം ഏഴാം അഡീഷണൽ സെഷൻസ് കോടതി ജഡ്ജി അനിറ്റ് ജോസഫാണ് കേസ് പരിഗണിക്കുന്നത്.

പൂവാർ മണ്ണാംവിളാകം മാഹിൻ മൻസിലിൽ മനു എന്ന മാഹിൻകണ്ണ് (45), ഭാര്യ റുഖിയ (38) എന്നിവരാണ് കേസിലെ ഒന്നും രണ്ടും പ്രതികൾ. മാറനല്ലൂർ വില്ലേജിലെ വെള്ളൂർക്കോണം അംബിക വിലാസത്തിൽ താമസിച്ചിരുന്ന ദിവ്യ (23), രണ്ടര വയസ്സുള്ള മകൾ ഗൗരി എന്നിവരാണ് കൊല്ലപ്പെട്ടത്. 2011 ആഗസ്റ്റ് 18-നാണ് കേസിനാസ്പദമായ സംഭവം നടന്നത്.

മാഹിൻകണ്ണുമായി പ്രണയത്തിലായ ദിവ്യ ഊരൂട്ടമ്പലത്തെ വാടകവീട്ടിൽ ഇയാളോടൊപ്പം താമസിച്ചുവരികയായിരുന്നു. ദിവ്യ ഗർഭിണിയായതോടെ മാഹിൻകണ്ണ് വിദേശത്തേക്ക് കടന്നു. പ്രസവശേഷം നാട്ടിൽ തിരിച്ചെത്തിയ ഇയാൾ ദിവ്യയോടൊപ്പം വീണ്ടും താമസം തുടങ്ങി. ഇതിനിടെ മാഹിൻകണ്ണ് നേരത്തേ വിവാഹിതനാണെന്ന വിവരം ദിവ്യ അറിഞ്ഞതോടെ ഇരുവരും തമ്മിൽ നിരന്തരം കലഹമുണ്ടായി.

ആദ്യ കുടുംബജീവിതത്തിന് ദിവ്യയും കുഞ്ഞും ഭീഷണിയാകുമെന്ന് കരുതിയ മാഹിൻകണ്ണിനോട് ഇരുവരെയും ഒഴിവാക്കാൻ ഭാര്യ റുഖിയ ആവശ്യപ്പെട്ടതായും തുടർന്ന് ഇരുവരും ചേർന്ന് കൊലപാതകം ആസൂത്രണം ചെയ്തതായുമാണ് പ്രോസിക്യൂഷൻ കേസ്.

സംഭവദിവസം കുഞ്ഞിനോടൊപ്പം മാഹിൻകണ്ണിന്റെ കൂടെ പോകുകയാണെന്ന് ദിവ്യ അമ്മ രാധയെയും സഹോദരി ശരണ്യയെയും അറിയിച്ചിരുന്നു. പിന്നീട് ഇരുവരെയും കാണാതായി. പൂവാർ, മാറനല്ലൂർ പൊലീസ് സ്റ്റേഷനുകളിൽ പരാതി നൽകിയെങ്കിലും ദിവ്യ വേളാങ്കണ്ണിയിലുണ്ടെന്നും അവളെ കൂട്ടിക്കൊണ്ടുവരാമെന്നും പൊലീസിനെ വിശ്വസിപ്പിച്ച് മാഹിൻകണ്ണ് വീണ്ടും വിദേശത്തേക്ക് കടന്നു.

ഊരൂട്ടമ്പലത്തുനിന്ന് ഓട്ടോറിക്ഷയിൽ ദിവ്യയെയും കുഞ്ഞിനെയും വിളവൻകോട് ആളില്ലാത്തുറയ്ക്ക് സമീപമുള്ള വിജനമായ ഇടപ്പാട് കടൽത്തീരത്തെത്തിച്ച ശേഷം കടലിൽ തള്ളിയിട്ട് കൊലപ്പെടുത്തിയെന്നാണ് പ്രോസിക്യൂഷൻ കേസ്.

തേങ്ങാപ്പട്ടണം, കുളച്ചൽ തീരങ്ങളിൽനിന്ന് ദിവ്യയുടെയും കുഞ്ഞിന്റെയും മൃതദേഹങ്ങൾ തമിഴ്നാട് പൊലീസാണ് കണ്ടെത്തിയത്. തിരുവനന്തപുരം ജില്ലാ ക്രൈംബ്രാഞ്ചാണ് കേസിൽ കുറ്റപത്രം സമർപ്പിച്ചത്.
109 സാക്ഷികളെ പ്രോസിക്യൂഷൻ വിസ്തരിക്കും. 104 രേഖകളും പ്രോസിക്യൂഷൻ കോടതിയിൽ ഹാജരാക്കിയിട്ടുണ്ട്. പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ എം. സലാഹുദ്ദീൻ ഹാജരാകും.