അ​ഗ്നിവീറുകളുടെ സേവന കാലാവധി രണ്ടു വർഷം കൂടി നീട്ടി... നാലുവർഷത്തെ സേവനം പൂർത്തിയാക്കുന്ന അഗ്നിവീറുകളിൽ സ്ഥിരസേനയിലേക്ക് തിരഞ്ഞെടുക്കപ്പെടാത്ത 75 ശതമാനം പേർക്കും രണ്ടുവർഷം കൂടി സേവനത്തിന് അവസരം ലഭ്യമാകും. ഇതോടെ ഇവരുടെ പരമാവധി സേവനകാലം ആറുവർഷമാകുകയും ചെയ്യും. അധിക സേവനം പൂർത്തിയാക്കുന്നവർക്ക് സ്ഥിരസേനയിൽ ചേരാൻ വീണ്ടും അവസരം ലഭിക്കുന്നതാണ്. അഗ്നിവീർ പദ്ധതിയിൽ നിർണായക മാറ്റവുമായി കേന്ദ്രസർക്കാർ.

അതേസമയം 2022ൽ ആരംഭിച്ച പദ്ധതിയിലെ ആദ്യ ബാച്ചിന്റെ സേവനകാലാവധി അവസാനിക്കാനിരിക്കെയാണ് ഈ തീരുമാനം. 18,300ലേറെ പേരാണ് ഡിസംബർ 31നകം പുറത്തുപോകേണ്ടിയിരുന്നത്

.സേനകളുടെ ശുപാർശ പ്രധാനമന്ത്രി നരേന്ദ്രമോദിയുടെ അദ്ധ്യക്ഷതയിൽ ചേർന്ന കേന്ദ്രമന്ത്രിസഭയാണ് അംഗീകരിച്ചത് . പ്രതിരോധ മേധാവി ജനറൽ എൻ.എസ്. രാജ സുബ്രഹ്മണിയാണ് ഡൽഹിയിൽ ഇക്കാര്യം പ്രഖ്യാപിച്ചത്.

നിലവിലെ വ്യവസ്ഥപ്രകാരം ഓരോ ബാച്ചിലെയും 25 ശതമാനം പേരെ മെരിറ്റിന്റെയും സേനയുടെ ആവശ്യകതയുടെയും അടിസ്ഥാനത്തിൽ സ്ഥിരസേനയിൽ ഉൾപ്പെടുത്തുന്നുണ്ട്. ശേഷിക്കുന്നവർ നാലുവർഷത്തിനുശേഷം മടങ്ങണം.

ആദ്യ നാലുവർഷത്തെ അഗ്നിവീറുകളുടെ പ്രകടനം ആശാവഹമെന്ന് ബോധ്യമായതോടെയാണ് വ്യവസ്ഥയിൽ മാറ്റം വരുത്തിയതെന്ന് പ്രതിരോധ മേധാവി വ്യക്തമാക്കുകയും ചെയ്തു.

അധിക രണ്ടുവർഷത്തെ സേവനത്തിന് നിലവിലേതിനേക്കാൾ ഉയർന്ന പ്രതിഫലം ലഭിക്കുകയും ചെയ്യും. തുടർന്നുള്ള സ്ഥിരനിയമനം വസ്തുനിഷ്ഠമായ തിരഞ്ഞെടുപ്പ് മാനദണ്ഡങ്ങൾക്ക് വിധേയമായിരിക്കും. റിക്രൂട്ട്‌മെന്റിലും മാറ്റമുണ്ട്. ശാരീരികക്ഷമതാ പരീക്ഷയ്ക്കു മുമ്പ് എഴുത്തുപരീക്ഷ നടത്തുന്നതാണ്.