ന്യൂസിലന്‍ഡിനെതിരായ ഏകദിന പരമ്പരയിലെ ആദ്യ മത്സരത്തില്‍ ഇന്ത്യക്ക് 186 റണ്‍സ് വിജയലക്ഷ്യം. 40.2 ഓവറില്‍ 185 റണ്‍സിന് കിവികള്‍ ഓള്‍ഔട്ടാകുകയായിരുന്നു. 38 റണ്‍സ് നേടിയ ഓപ്പണര്‍ ടിം സെയ്‌ഫെര്‍ടാണ് ആതിഥേയരുടെ ടോപ് സ്‌കോറര്‍.

അവസാന ഓവറുകളില്‍ തകര്‍ത്തടിച്ച ബ്ലയര്‍ ടിക്ക്‌നറുടെ (34) പ്രകടനവും അവര്‍ക്ക് നിര്‍ണായകമായി. ഇന്ത്യക്കായി അര്‍ഷ്ദീപ് സിങ് നാലും ഗുർനൂർ ബ്രാർ മൂന്നും വിക്കറ്റുകള്‍ നേടുകയും ചെയ്തു.

മത്സരത്തില്‍ ടോസ് നേടിയ ഇന്ത്യന്‍ ക്യാപ്റ്റന്‍ ശുഭ്മന്‍ ഗില്‍ ഫീല്‍ഡിങ് തെരഞ്ഞെടുക്കുകയായിരുന്നു. മികച്ച പ്രകടനത്തിലൂടെ ഇന്ത്യന്‍ ബൗളര്‍മാര്‍ കിവീസ് നിരയെ തുടക്കത്തില്‍ തന്നെ പ്രതിരോധത്തിലാക്കുകയും ചെയ്തു. അര്‍ഷ്ദീപ് സിങ്ങും ഗുര്‍നൂര്‍ ബ്രാറും രണ്ട് വിക്കറ്റുകള്‍ വീതം വീഴ്ത്തി കിവീസിനെ തുടക്കത്തില്‍ തന്നെ ഞെട്ടിച്ചു.

സ്‌കോര്‍ ബോര്‍ഡില്‍ 40 റണ്‍സ് പിറക്കുന്നതിനിടെ ഓപ്പണര്‍ വില്‍ യങ്ങും (9) മൂന്നാം നമ്പരിലിറങ്ങിയ ഹെന്റി നിക്കോള്‍സും (9) മടങ്ങി. തുടര്‍ന്ന് ടിം സീഫര്‍ട്ടും (38) ഡാരില്‍ മിച്ചലും (28) ചെറുത്തുനില്‍പ്പിന് ശ്രമിച്ചെങ്കിലും ഇന്ത്യന്‍ ബൗളര്‍മാര്‍ക്കു മുന്നില്‍ ഏറെ നേരം പിടിച്ചുനില്‍ക്കാൻ കഴിഞ്ഞില്ല.
‌മത്സരത്തില്‍ ഇന്ത്യന്‍ താരങ്ങളുടെ ഫീല്‍ഡിങ് മികവ് ശ്രദ്ധേയമാകുകയും ചെയ്തു.