ഒരു തെളിവെങ്കിലും അവശേഷിക്കും. അതാണ് ഇവിടേയും സംഭവിച്ചത്. മഴ വന്നില്ലായിരുന്നെങ്കിൽ ഇത് ഒരു മിസ്സിംഗ് കേസായി മാത്രം മാറിയേനെ. തിരുവനന്തപുരം ശ്രീകാര്യത്ത് പാങ്ങപ്പാറയിൽ പ്ലസ് വൺ വിദ്യാർഥിയായ അഭിരാമിനെ കൊലപ്പെടുത്തിയ സംഭവത്തിൽ കൂടുതൽ ഞെട്ടിക്കുന്ന വിവരങ്ങൾ പുറത്ത്. കൊലപാതകം പെട്ടെന്നുണ്ടായ പ്രകോപനത്തിന്റെ പേരിലല്ലെന്നും കൃത്യമായ ആസൂത്രണത്തോടെയാണ് നടന്നതെന്നുമാണ് പൊലീസിന്റെ കണ്ടെത്തൽ. പെൺസുഹൃത്തായ ആനന്ദയുടെ മൊബൈൽ ഫോൺ സംഭവത്തിന് ദിവസങ്ങൾക്കു മുൻപുതന്നെ ഒന്നാംപ്രതിയായ പതിനേഴുകാരന്റെ കൈവശമായിരുന്നു. ഈ ഫോൺ ഉപയോഗിച്ച് ആനന്ദയുടെ ഇൻസ്റ്റഗ്രാം അക്കൗണ്ടിലൂടെ അഭിരാമിന് നിരന്തരം സന്ദേശങ്ങൾ അയച്ചാണ് പ്രതികൾ കെണിയൊരുക്കിയത്. ആനന്ദയാണെന്ന് വിശ്വസിച്ച അഭിരാമിനെ പാങ്ങപ്പാറയിലെ ആളൊഴിഞ്ഞ സ്ഥലത്തേക്ക് വിളിച്ചുവരുത്തുകയായിരുന്നു. മുൻപ് പ്രണയത്തിലായിരുന്ന പെൺകുട്ടി ബന്ധം അവസാനിപ്പിച്ച് മറ്റൊരു യുവാവുമായി അടുപ്പത്തിലായതാണ് പതിനേഴുകാരനിൽ വൈരാഗ്യമുണ്ടാക്കിയതെന്നാണ് പൊലീസ് പറയുന്നത്. ആ യുവാവിനെ വകവരുത്താനായിരുന്നു ആദ്യം പദ്ധതിയിട്ടത്. എന്നാൽ ഇയാളുടെ സുഹൃത്തായ അഭിരാമിനെ ഉപയോഗിച്ച് ലക്ഷ്യസ്ഥാനത്തേക്ക് എത്തിക്കാമെന്നായിരുന്നു പ്രതിയുടെ കണക്കുകൂട്ടൽ.

ഞായറാഴ്ച ഉച്ചകഴിഞ്ഞ് മൂന്നുമണിയോടെ അഭിരാം ബസിൽ യാത്രചെയ്ത് പാങ്ങപ്പാറയിലെത്തുകയായിരുന്നു. അവിടെ പതിനേഴുകാരനും രണ്ടാംപ്രതിയായ ഉമർ മുഫ്താറും കാത്തുനിൽക്കുന്നുണ്ടായിരുന്നു. താൻ ചതിക്കപ്പെട്ടുവെന്ന് മനസ്സിലാക്കിയ അഭിരാം അവിടെനിന്ന് രക്ഷപ്പെടാൻ ശ്രമിച്ചെങ്കിലും പ്രതികൾ അനുവദിച്ചില്ല. തങ്ങൾ ലക്ഷ്യമിട്ടിരുന്ന സുഹൃത്തിനെ ഫോണിൽ വിളിച്ച് അവിടേക്ക് വരുത്തണമെന്ന് അഭിരാമിനോട് ആവശ്യപ്പെട്ടു. അഭിരാം രണ്ടുതവണ സുഹൃത്തിനെ വിളിച്ചെങ്കിലും സ്ഥലത്തേക്ക് വരാൻ സുഹൃത്ത് തയ്യാറായില്ല. ഇതോടെ അഭിരാമിനുമേൽ സമ്മർദം ചെലുത്തി. പിന്നീട് മടങ്ങാൻ ശ്രമിച്ച അഭിരാമിനെ പ്രതികൾ ബലംപ്രയോഗിച്ച് തടഞ്ഞു. തുടർന്നുണ്ടായ സംഘർഷത്തിനിടെ കൈകൊണ്ടും ബെൽറ്റ് ഉപയോഗിച്ചും കഴുത്തിൽ മുറുക്കി കൊലപ്പെടുത്തിയെന്നാണ് പൊലീസ് പറയുന്നത്. കൊലപാതകത്തിന് പിന്നാലെ മൃതദേഹം എങ്ങനെ മറച്ചുവെക്കാമെന്നതിനെക്കുറിച്ചും പ്രതികൾ ആലോചിച്ചു.

മരിച്ചെന്ന് ഉറപ്പായതോടെ അഭിരാമിന്റെ മൃതദേഹം ചാക്കിൽ കെട്ടി കായലിൽ ഉപേക്ഷിക്കാനായിരുന്നു പ്രതികളുടെ പദ്ധതി. ഇതിനായി ചാക്ക് കൊണ്ടുവന്ന് മൃതദേഹം അതിനുള്ളിലാക്കുകയും ചെയ്തു. എന്നാൽ രാത്രിയിൽ ശക്തമായ മഴ പെയ്തതോടെ കായലിലേക്ക് മൃതദേഹം കൊണ്ടുപോകാനുള്ള പദ്ധതി ഉപേക്ഷിക്കേണ്ടിവന്നു. തുടർന്ന് മൃതദേഹം അതേ സ്ഥലത്ത് ഉപേക്ഷിച്ച് പ്രതികൾ മടങ്ങുകയായിരുന്നു. ഇതിനിടെ അഭിരാമിന്റെ മൊബൈൽ ഫോൺ നശിപ്പിക്കുകയും ചെയ്തു. കൊലപാതകത്തിന് പിന്നാലെ പിടിക്കപ്പെട്ടാൽ കുറ്റത്തിന്റെ ഉത്തരവാദിത്തം പതിനേഴുകാരൻ ഒറ്റയ്ക്ക് ഏറ്റെടുക്കണമെന്ന ധാരണയും പ്രതികൾക്കിടയിലുണ്ടായിരുന്നുവെന്നാണ് പൊലീസിന്റെ വെളിപ്പെടുത്തൽ. പ്രായപൂർത്തിയാകാത്തതിനാൽ ശിക്ഷയിൽ ഇളവ് ലഭിക്കുമെന്ന കണക്കുകൂട്ടലും ഇതിനു പിന്നിലുണ്ടായിരുന്നുവെന്നാണ് അന്വേഷണസംഘം പറയുന്നത്. എന്നാൽ ചോദ്യംചെയ്യലിൽ ലഭിച്ച വിവരങ്ങളും മറ്റ് തെളിവുകളും കേസിന്റെ കൂടുതൽ ചുരുളഴിച്ചു. കാപ്പാ കേസുകളടക്കം ക്രിമിനൽ പശ്ചാത്തലമുള്ള ഉമർ മുഫ്താറിന്റെ പങ്കും അന്വേഷണത്തിൽ പുറത്തുവന്നു. കൗമാരക്കാരുടെ ബന്ധങ്ങളിലെ തർക്കം മറ്റൊരു കൗമാരക്കാരന്റെ ജീവനെടുത്ത സംഭവത്തിൽ കൂടുതൽ പേർക്ക് പങ്കുണ്ടോയെന്നും ഡിജിറ്റൽ തെളിവുകൾ ഉൾപ്പെടെ പരിശോധിച്ച് പൊലീസ് അന്വേഷണം തുടരുകയാണ്.