കേരളത്തിലെ കോണ്‍ഗ്രസ് രാഷ്ട്രീയത്തില്‍ വീണ്ടും പുതിയ നാടകീയ നീക്കങ്ങള്‍ക്കും വാദപ്രതിവാദങ്ങള്‍ക്കും കളമൊരുങ്ങുന്നു. വി ഡി സതീശന്റെ നേതൃത്വത്തിൽ പുതിയ സർക്കാർ അധികാരത്തിൽ വന്നിട്ട് മാസങ്ങൾ ആയിട്ടും കെ പി സി സി കസേര ഒഴിഞ്ഞു കിടക്കുകയാണ് .
കെ.പി.സി.സി. അധ്യക്ഷ പദവി ഏറ്റെടുക്കുന്നതിനായി നിലവിലുള്ള മന്ത്രിസ്ഥാനം എ.പി. അനില്‍കുമാര്‍ ഒഴിഞ്ഞേക്കുമെന്ന തരത്തിലുള്ള ചര്‍ച്ചകളാണ് ഇപ്പോള്‍ രാഷ്ട്രീയ കേന്ദ്രങ്ങളില്‍ ശക്തമായിരിക്കുന്നത്. യു.ഡി.എഫ് ഭരണസംവിധാനത്തിലെ നിര്‍ണ്ണായകമായ ഒരു വകുപ്പ് കൈയാളുന്ന മുതിര്‍ന്ന നേതാവ് ഇത്തരം ഒരു പദവി മാറ്റത്തിന് തയ്യാറാകുമോ

എന്ന സംശയങ്ങള്‍ ആദ്യം ഉയര്‍ന്നു വന്നെങ്കിലും, ഡല്‍ഹി കേന്ദ്രീകരിച്ചുള്ള ഉന്നത നേതാക്കളുടെ ശക്തമായ ഇടപെടലുകളും സമ്മര്‍ദ്ദങ്ങളും ഈ സാധ്യതയെ സജീവമാക്കി നിര്‍ത്തുന്നുണ്ട്. പാര്‍ട്ടിയുടെ സംഘടനാപരമായ നിയന്ത്രണം ഉറപ്പാക്കുന്നതിന്റെ ഭാഗമായാണ് ഈ പുതിയ നീക്കങ്ങള്‍ നടക്കുന്നത് എന്നാണ് വിവരം.സംസ്ഥാനത്തെ കോണ്‍ഗ്രസ് സംഘടനയെയും മുന്നണിയെയും ഒരേപോലെ പിടച്ചുനിര്‍ത്തുന്ന തരത്തിലുള്ള ചരടുവലികളാണ് ഇപ്പോള്‍ അരങ്ങേറിക്കൊണ്ടിരിക്കുന്നത്. കെ.പി.സി.സി. അധ്യക്ഷ പദവിയിലേക്ക് ബെന്നി ബെഹനാന്‍, കൊടിക്കുന്നില്‍ സുരേഷ്, ജോസഫ് വാഴക്കന്‍ തുടങ്ങിയ പ്രമുഖരുടെ പേരുകള്‍ ഉയര്‍ന്നുകേള്‍ക്കുന്നുണ്ടെങ്കിലും,

ഇവരില്‍ പലര്‍ക്കുമെതിരെ ഹൈക്കമാന്‍ഡ് തലത്തിലും പാര്‍ട്ടിയിലെ മറ്റ് പ്രമുഖ വിഭാഗങ്ങളുടെ ഭാഗത്തുനിന്നും തടസ്സവാദങ്ങള്‍ ഉയരുന്നുണ്ട്. ബെന്നി ബെഹനാന്‍ വന്നാല്‍ എ ഗ്രൂപ്പ് വീണ്ടും ശക്തമാകുമെന്ന ആശങ്കയും,കൊടിക്കുന്നേല്‍ സുരേഷ് വന്നാല്‍ ഡല്‍ഹി കേന്ദ്രീകരിച്ച് മറ്റൊരു ശക്തികേന്ദ്രം രൂപപ്പെടുമെന്ന ചിന്തയുമാണ് ചിലരെ നയിക്കുന്നത്. ഈ സാഹചര്യത്തിലാണ് എല്ലാ വിഭാഗങ്ങള്‍ക്കും സ്വീകാര്യനും എന്നാല്‍ കേന്ദ്ര നേതൃത്വത്തിന് കര്‍ശനമായ നിയന്ത്രണത്തില്‍ നിര്‍ത്താന്‍ കഴിയുന്നതുമായ ഒരു മുഖം വേണമെന്ന ആവശ്യത്തിലേക്ക് കാര്യങ്ങള്‍ എത്തിയത്.ഇതിന്റെ തുടര്‍ച്ചയെന്നോണം എ.പി. അനില്‍കുമാറിനെ കെ.പി.സി.സി. അധ്യക്ഷ പദവിയിലേക്ക്

കൊണ്ടുവരാന്‍ സംഘടനാതലത്തില്‍ ശക്തമായ സമ്മര്‍ദ്ദങ്ങള്‍ ഉണ്ടെന്നാണ് ലഭിക്കുന്ന വിവരങ്ങള്‍. തുടക്കത്തില്‍ സ്വന്തം മന്ത്രിസ്ഥാനം ഉപേക്ഷിച്ച് പാര്‍ട്ടി നേതൃത്വത്തിലേക്ക് പോകാന്‍ അദ്ദേഹം വിമുഖത കാണിച്ചെങ്കിലും, ഉന്നതതലങ്ങളില്‍ നിന്നുള്ള നിരന്തരമായ ആവശ്യത്തെ തുടര്‍ന്ന് അദ്ദേഹം അനുകൂല നിലപാടിലേക്ക് മാറിയേക്കാമെന്നാണ് സൂചനകള്‍. എന്നാല്‍ ഈ മാറ്റം യാഥാര്‍ത്ഥ്യമായാല്‍ അത് കോണ്‍ഗ്രസ് മന്ത്രിസഭയ്ക്കുള്ളിലും വലിയ തോതിലുള്ള ചലനങ്ങളും അധികാര വടംവലികളുമാണ് സൃഷ്ടിക്കുക.