ശബരിമല നെഞ്ചിലെ തീയാണ് കെ.മുരളീധരന് ... അട്ടിമറിക്ക് സാധ്യതയെന്ന് സംശയം വലവിരിച്ച് ഇന്റലിജൻസ്

ശബരിമല തീർത്ഥാടനം അട്ടിമറിക്കാൻ മനപ്പൂർവ്വം ശ്രമമുള്ളതായി സംശയിച്ച് സർക്കാർ . ഏറെ ജാഗ്രതയോടെ വേണം ഇക്കുറി തീർത്ഥാടനം സംഘടിപ്പിക്കാൻ എന്ന് ദേവസ്വം മന്ത്രി കെ മുരളീധരൻ ദേവസ്വം ബോർഡ് പ്രസിഡൻറ് കെ ജയകുമാറിനെയും ബോർഡ് ഭാരവാഹികളെയും അറിയിച്ചു സർക്കാരിൻറെ ക്ലീൻ ഇമേജ് തടസ്സപ്പെടുത്താൻ ഏറ്റവും നല്ല മാർഗ്ഗം ശബരിമല തീർഥാടനത്തിൽ പാളിച്ചകൾ സൃഷ്ടിക്കുക എന്നതാണെന്ന് സർക്കാർ ഉന്നതർ സംശയിക്കുന്നു . ശബരിമല തീർഥാടനത്തിൽ പാളിച്ച സംഭവിക്കാതിരിക്കാൻ പോലീസും അതീവ ജാഗ്രതയിലാണ്. കർശനമായ ഇന്റലിജൻസ് പരിശോധനയാണ് സന്നിധാനത്ത് ഏർപ്പെടുത്തിയിരിക്കുന്നത്. സന്നിധാനത്ത് ശബരിമല മണ്ഡല കാലവുമായി ബന്ധപ്പെട്ട് പ്രവർത്തിക്കുന്ന എല്ലാ ഉദ്യോഗസ്ഥരെ കുറിച്ചും ഇൻറലിജൻസ് പരിശോധന നടന്നു കഴിഞ്ഞു. ബോർഡ് ജീവനക്കാരുടെയും മറ്റ് കരാർ തൊഴിലാളികളുടെയും പിന്തുണയോടുകൂടി തീർഥാടന കാലം അട്ടിമറിക്കാൻ ശ്രമിക്കുമോ എന്ന സംശയത്തിലാണ് സർക്കാർ. സർക്കാരിനെ സംബന്ധിച്ചടത്തോളം വലിയൊരു വെല്ലുവിളിയായി മാറിയിരിക്കുകയാണ് ശബരിമല തീർഥാടനം.
ശബരിമല തീർഥാടന കാലത്ത് ശബരിമലയിൽ പ്രശ്നങ്ങളുണ്ടാക്കുന്നതിന് പിന്നിൽ രാഷ്ട്രീയമില്ലെന്ന് ദേവസ്വം മന്ത്രി കെ. മുരളീധരൻ പറഞ്ഞെങ്കിലും സർക്കാരിന് വലിയ സംശയങ്ങളാണുള്ളത്. ടെൻഡർ ലഭിക്കാത്തവരും കച്ചവട താത്പര്യക്കാരുമാണ് ബഹളത്തിന് ഇറങ്ങിയിരിക്കുന്നതെന്ന് മന്ത്രി പറഞ്ഞു. എന്നാൽ മന്ത്രിക്ക് വാസ്തവം എന്തെന്ന് അറിയാം.
ശബരിമലയിൽ തീർഥാടന കാലത്ത് ബോധപൂർവം പ്രതിസന്ധി സൃഷ്ടിക്കാൻ ചില ക്ഷുദ്രശക്തികൾ ശ്രമിക്കുന്നുണ്ടെന്നും ഭക്ഷണത്തിൽ പോലും വിഷം ചേർക്കാൻ കെൽപ്പുള്ളവർ ഇക്കൂട്ടത്തിലുണ്ടെന്നും കെ. മുരളീധരൻ അഭിപ്രായപ്പെട്ടു.
കഴിഞ്ഞ ദിവസം ശബരിമലയിലെ ടോയ്ലറ്റിലെ വാൽവ് അടച്ചിട്ടതും ഇന്ന് പുലർച്ചെ ഒരാൾ ബഹളമുണ്ടാക്കിയതും ഉൾപ്പെടെയുള്ള സംഭവങ്ങൾ ഗൗരവത്തോടെയാണ് കാണുന്നത്. സംഭവത്തിൽ ദേവസ്വം ബോർഡ് തന്നെ പൊലിസിനോട് അന്വേഷണം ആവശ്യപ്പെട്ടിട്ടുണ്ടെന്നും മന്ത്രി വ്യക്തമാക്കി.
ഇന്റലിജൻസ് വിഭാഗത്തോട് വിഷയം സസൂക്ഷ്മം പരിശോധിക്കാൻ നിർദേശിച്ചിട്ടുണ്ട്. ഹൈക്കോടതിയുടെ മേൽനോട്ടത്തിലാണ് ശബരിമലയിലെ എല്ലാ കാര്യങ്ങളും നടക്കുന്നതെന്നും ഇതുവരെയുള്ള ക്രമീകരണങ്ങളിൽ താൻ പൂർണ സംതൃപ്തനാണെന്നും മന്ത്രി പറഞ്ഞു.
ഒരു പിശുക്കും കൂടാതെ മുഖ്യമന്ത്രി എല്ലാ കാര്യങ്ങൾക്കും പണം അനുവദിക്കുന്നുണ്ടെന്നും ചെറിയ പാളിച്ചകൾ പോലും സംഭവിക്കാതിരിക്കാൻ കർശന മുൻകരുതലുകൾ സ്വീകരിച്ചിട്ടുണ്ടെന്നും മുരളീധരൻ കൂട്ടിച്ചേർത്തു.
മണ്ഡല മകരവിളക്ക് തീർത്ഥാടനത്തിന് തൊട്ടു മുമ്പായി ശബരിമല പമ്പയിലെ 200 ഓളം ജലവിതരണത്തിന്റെ പ്രധാന വാൽവുകൾ അടച്ചിട്ടു. പോലീസ് മെസ്സിലേക്കുള്ള ജലവിതരണം ഉൾപ്പെടെ മുടങ്ങി. തീർത്ഥാടകർ വലിയ ബുദ്ധിമുട്ടിലായി. സംഭവത്തിന് പിന്നിൽ അട്ടിമറി ഉണ്ടെന്നാണ് ദേവസ്വം ബോർഡ് പ്രസിഡൻറ് കെ ജയകുമാർ പറഞ്ഞത്. പമ്പയിലേക്ക് വെള്ളം എത്തിക്കുന്ന പ്രധാന വാൽവുകൾ ആരോ മനപ്പൂർവ്വം അടച്ചിട്ടതായി പരിശോധനയിൽ കണ്ടെത്തി. തകരാറുകൾ ഒന്നുമില്ലാത്ത വാൽവുകൾ സ്വയം അടയില്ലെന്നും ഇതിന് പിന്നിൽ സംഘടിത അട്ടിമറി ശ്രമം ഉണ്ടെന്നും കെ ജയകുമാർ വ്യക്തമാക്കി. മുൻവർഷങ്ങളിൽ ശുചിമറികളുടെ നടത്തിപ്പ് കരാർ എടുത്തിരുന്നവർ ഭക്തരിൽനിന്ന് അമിത തുക ഈടാക്കിയിരുന്നതിനാൽ ഇത്തവണ മുതൽ ദേവസ്വം ബോർഡ് ശുചിമുറികൾ പൂർണമായും സൗജന്യമാക്കിയിരുന്നു. ഇതിലുള്ള വൈരാഗ്യത്തിൽ മുൻ കരാറുകാർ നടത്തിയ ആസൂത്രിത നീക്കമാണ് എന്ന് ദേവസ്വം ബോർഡ് സംശയിക്കുന്നുണ്ട്. നേരത്തെ ചിത്തിര ആട്ടവിശേഷ സമയത്തും സമാനമായ രീതിയിൽ ശുചിമറികളിലേക്കുള്ള വെള്ളം തടസ്സപ്പെടുത്തി. അന്ന് ഒരു ദേവസ്വം ബോർഡ് ജീവനക്കാരനെ സ്വാധീനിച്ച് വെള്ളം മുടക്കിയതായി കണ്ടെത്തുകയും ആ ജീവനക്കാരനെ സർവീസിൽ നിന്ന് പിരിച്ചുവിടുകയും ചെയ്തിരുന്നു. ജലവിതരണം തടസ്സപ്പെടുത്തി സംഭവത്തിൽ ദേവസ്വം ബോർഡ് പരാതി നൽകി. ഇത്തരം സംഭവങ്ങൾ ആവർത്തിക്കാതിരിക്കാൻ വാൽവകൾക്ക് സമീപം കാവൽക്കാരെയും വിമുക്തഭടന്മാരെയും നിയോഗിക്കുകയും പ്രദേശത്ത് സിസിടിവി ക്യാമറകൾ സ്ഥാപിക്കാൻ തീരുമാനിക്കുകയും ചെയ്തു.
ശബരിമല തീർത്ഥാടനം അട്ടിമറിക്കാനുള്ള ശ്രമങ്ങൾ തുടങ്ങിയത് ഇന്നോ ഇന്നലെയോ അല്ല. 1902 ജനുവരിയിലെ മകരസംക്രമ ദിവസം ദീപാരാധനയ്ക്ക് നട അടച്ചിരിക്കുമ്പോഴാണ് ശബരിമലയിൽ ആദ്യത്തെ അഗ്നിബാധ ഉണ്ടാകുന്നത്. 1950 മെയ് മാസത്തിലാണ് ശബരിമല തീ വച്ച് നശിപ്പിച്ചത്..ആദ്യത്തെ അഗ്നിബാധ ശ്രീമൂലം തിരുനാൾ മഹാരാജാവ് തിരുവിതാംകൂർ ഭരിച്ചിരുന്ന സമയത്തായിരുന്നു. മണിക്കൂറുകളോളം ശബരിമല ക്ഷേത്രത്തിൽ അഗ്നി പടർന്നു കത്തി നിന്നു.
1902 ജനുവരി മാസത്തിൽ അന്ന് ശബരിമല ശാന്തി ചെങ്ങന്നൂർ മഹാക്ഷേത്രത്തിനു കിഴക്കുവശത്ത് കടക്കേത്തു മഠത്തിൽ രാമൻ വാസുദേവൻ എമ്പ്രാന്തിരിയായിരുന്നു .അന്നത്തെ ശബരിമല ക്ഷേത്രത്തിന് ഒരു പ്രത്യേകതയുണ്ടായിരുന്നു. ക്ഷേത്രത്തിൻ്റെ ശ്രീകോവിൽ മണ്ഡപം, ബലിക്കൽപ്പുര, തിടപ്പള്ളി എന്നിവയെല്ലാം ചെമ്പ് മേഞ്ഞതായിരുന്നുവെങ്കിലും പഴക്കം കൊണ്ട് പല ഭാഗങ്ങളും ജീർണിച്ച് നനഞ്ഞൊലിച്ചു തുടങ്ങിയിരുന്നു. ഇതുകാരണം മകര സംക്രമ ദിവസങ്ങളിൽ മേൽക്കൂരയിലെ ചെമ്പ് തകിടിനു മുകളിൽ പുല്ലുമേയുന്നത് പതിവായിരുന്നു. ഇത് കാരണം ശബരിമലയിൽ എത്തുന്നവർ കരുതിയിരുന്നത് ശബരിമല അമ്പലം പുല്ലുമേഞ്ഞ മേൽക്കൂരയോടു കൂടിയതാണെന്നാണ്.
1902 ജനുവരിയിലെ മകരസംക്രമ ദിവസം മണ്ഡപത്തിൽ ആളിക്കത്തിക്കൊണ്ടിരുന്ന കർപ്പൂരനാളത്തിൽ നിന്ന് മണ്ഡപത്തിനും തുടർന്ന് ശ്രീകോവിലിനും തീ പിടിക്കുകയായിരുന്നു. നിമിഷനേരം കൊണ്ട് അഗ്നി എല്ലായിടത്തും പടർന്നു. ദീപാരാധനയ്ക്ക് നട അടച്ച് അയ്യപ്പസ്വാമിക്ക് തിരുവാഭരണം ചാർത്തി കൊണ്ടിരിക്കുന്നതിനിടയിലാണ് ശാന്തിക്കാരനായ വാസുദേവൻ എമ്പ്രാന്തിരി അഗ്നിബാധയുടെ വിവരമറിഞ്ഞത്. ഉടൻതന്നെ തിരുമേനി തിരുവാഭരണങ്ങളെല്ലാം പെട്ടിയിലാക്കി അതിൻ്റെ ചുമതലക്കാരെ ഏൽപ്പിച്ചു. അത്രയും സമയമായപ്പോഴേക്കും മേൽക്കൂര മുഴുവൻ അഗ്നി പടർന്നു പിടിച്ചിരുന്നു. മേൽക്കൂരയിൽ ചെമ്പ് തകിടുകൾ ഉറപ്പിച്ചിരുന്ന ആണികൾ ചൂടേറ്റ് ഇളകിത്തെറിച്ചു തുടങ്ങി. ഇതോടെ അയ്യപ്പന്മാർ പതിനെട്ടാം പഠിക്കും മുകളിൽ നിന്ന് ഓടി താഴെ ഇറങ്ങി അകലങ്ങളിൽ അഭയം പ്രാപിച്ചു.
പഞ്ചലോഹ നിർമ്മിതമായ അന്നത്തെ അയ്യപ്പഭവിഗ്രഹത്തിന് ഏതാണ്ട് ആറ് തുലാത്തോളം അതായത് ഏകദേശം 50 55 കിലോ ഭാരം ഉണ്ടായിരുന്നു. ഇത്രയും ഭാരമുള്ള അയ്യപ്പ വിഗ്രഹത്തെ ശാന്തി വാസുദേവൻ എമ്പ്രാന്തിരി കല്ലോട് കൂടി ഇളക്കിയെടുത്തു. വിഗ്രഹവുമായി അഅഗ്നിജ്വാലകൾക്കിടയിലൂടെ ക്ഷേത്രത്തിന് തൊട്ടു വടക്കുവശത്തുള്ള ഭസ്മ കുളത്തിൽ അദ്ദേഹം അഭയം പ്രാപിച്ചു. അഗ്നിബാധ അതിരൂക്ഷമായതോടെ അയ്യപ്പന്മാർ സന്നിധാനം ഒഴിഞ്ഞു പോയതിനാൽ ഇക്കാര്യം ആരും അറിഞ്ഞിരുന്നില്ല.
മണിക്കൂറുകളോളം ശബരിമല ക്ഷേത്രത്തിൽ അഗ്നി പടർന്നു കത്തി നിന്നു. അഗ്നിയുടെ താണ്ഡവം അകലങ്ങളിലിരുന്ന് അയ്യപ്പഭക്തന്മാർ കാണുന്നുണ്ടായിരുന്നു. ഇന്നത്തെ പോലെ അന്ന് വൈദ്യുതി വിളക്കോ പെട്രോമാക്സ് ഒന്നുമുണ്ടായിരുന്നില്ല. സന്നിധാനത്ത് മകരവിളക്കിന് എത്തുന്ന അയ്യപ്പഭക്തന്മാരുടെ എണ്ണത്തിലും അന്ന് ഇത്രയും വർദ്ധനവ് വന്നിട്ടില്ലായിരുന്നു. ഏകദേശം ആയിരം അയ്യപ്പഭക്തന്മാർ, ഏറിയാൽ 2000 പേർ. അന്നത്തെ കാലത്ത് മകരവിളക്കിന് അത്രത്തോളം പേർ മാത്രമേ ശബരിമലയിൽ എത്തിയിരുന്നുള്ളൂ.
അഗ്നിയുടെ രൂക്ഷത മൂലം മാളികപ്പുറത്തും മറ്റു പ്രദേശങ്ങളിലും അഭയം പ്രാപിച്ചിരുന്നു അയ്യപ്പഭക്തന്മാരും ക്ഷേത്ര ജീവനക്കാരും നേരം പുലർന്നതിനുശേഷം മാത്രമേ സന്നിധാനത്തേക്ക് വരാൻ ധൈര്യപ്പെട്ടുള്ളു. ഏവർക്കും അറിയേണ്ടിയിരുന്നത് അയ്യപ്പഭവിഗ്രഹത്തിനും ശാന്തി വാസുദേവൻ എമ്പ്രാന്തിരിക്കും എന്തു സംഭവിച്ചു എന്നായിരുന്നു. പരിപാവനമായ അയ്യപ്പ വിഗ്രഹം കഠിനമായ ചൂടിൽ ഉരുകി ഒലിച്ചു പോയിരിക്കുമെന്നും ശാന്തിക്കാരൻ തിരുമേനി അഗ്നിയിൽ ചാമ്പലായി തീർന്നിരിക്കുമെന്നുമാണ് ഏവരും കരുതിയത്. എന്നാൽ സന്നിധാനത്ത് എത്തിയവർക്ക് കാണാൻ കഴിഞ്ഞത് വാസുദേവൻ എമ്പ്രാന്തിരി ഭാരം ഏറെയുള്ള അയ്യപ്പ വിഗ്രഹവുമായി ഭസ്മ കുളത്തിൽ കഴിയുന്നതാണ്. ഈ കാഴ്ച കണ്ടതോടെ അയ്യപ്പഭക്തന്മാർ കൂട്ടമായി ശരണം വിളിച്ചുവെന്നും ചരിത്രരേഖകളിൽ പറയുന്നു.
തുടർന്ന് പതിനെട്ടാം പടിക്ക് മുകളിൽ സ്ഥലം ശുദ്ധി വരുത്തി തന്ത്ര വിധിപ്രകാരമുള്ള എല്ലാ കർമ്മങ്ങളും നടത്തി കത്തിപ്പോയ ക്ഷേത്രത്തിൻ്റെ ഈശാന കോണിൽ അന്നുതന്നെ ബാലാലയ പ്രതിഷ്ഠയും നടത്തുകയായിരുന്നു. അതിനുശേഷം പൂജകൾ തുടർന്നു. അയ്യപ്പഭവിഗ്രഹത്തെ ഒരു പോറൽ പോലും ഏൽപ്പിക്കാതെ സുരക്ഷിതമാക്കിയ വാസുദേവൻ എമ്പ്രാന്തിരിയുടെ ഭക്തിയും ധീരതയും വലിയ പരീതിയിൽ വാഴ്ത്തപ്പെടുകയും ചെയ്തു. സ്വന്തം ജീവൻ പോലും വകവയ്ക്കാതെ അയ്യപ്പസ്വാമിക്ക് വേണ്ടി എമ്പ്രാന്തിരി നടത്തിയ പ്രസ്തുത സേവനത്തെ കണക്കിലെടുത്ത് അദ്ദേഹത്തിന് കഴിവുള്ള കാലത്തോളം ശബരിമല ക്ഷേത്രത്തിലെ ശാന്തിക്കാരനായി തുടരാമെന്ന് മഹാരാജാവ് കല്പിക്കുകയും ചെയ്തു. മാത്രമല്ല കൊല്ലവർഷം 1098 ചിങ്ങം ഒന്നാം തീയതി മുതൽ വാസുദേവൻ എമ്പ്രാന്തിരിക്ക് സഹായിയായി ഒരു കീഴ്ശാന്തിയെ കൂടി ശബരിമലയിൽ നിയമിച്ചു. അന്നുമുതൽ വാസുദേവൻ എമ്പ്രാന്തിരി ശബരിമല ക്ഷേത്രത്തിലെ മേൽശാന്തിയായി മാറി. ഇതോടെ ശബരിമല ക്ഷേത്രത്തിലെ പ്രഥമ മേൽശാന്തി എന്ന സ്ഥാനത്തിന് അദ്ദേഹം അർഹനാവുകയും ചെയ്തു. കൊല്ലവർഷം 1068 ചിങ്ങമാസം മുതൽ 1108 തുലാമാസം വരെ നീണ്ട 40 വർഷം വാസുദേവൻ എമ്പ്രാന്തിരി ശബരിമല അയ്യപ്പൻ്റെ പൂജാരിയായിരുന്നു എന്ന് ചരിത്ര രേഖകൾ പറയുന്നു.
തുടർന്ന് ക്ഷേത്രം പുതുക്കിപ്പണിത് പുനഃപ്രതിഷ്ഠ നടത്തി പഴയ നിലയിലാക്കാൻ ഏകദേശം എട്ടുവർഷം വേണ്ടിവന്നു. 1085 മീനം 12 നാണ് ശബരിമല ക്ഷേത്രത്തിൽ പുനഃപ്രതിഷ്ഠ നടത്തിയത്. അന്ന് പ്രതിഷ്ഠ കർമ്മം നിർവഹിച്ചത് ചെങ്ങന്നൂർ താഴെമൺ മഠത്തിൽ പ്രഭാകരൻ തന്ത്രിയായിരുന്നു. ക്ഷേത്രത്തിൻറെ പുനരുദ്ധാരണ ജോലികൾ നടത്താൻ കോൺട്രാക്ട് ഏറ്റെടുത്തത് മാവേലിക്കര പോളച്ചിറക്കൽ കൊച്ചുമ്മൻ മുതലാളി ആയിരുന്നു. കൊല്ലം പുതുക്കുളങ്ങര കൊട്ടാരത്തിൽ വച്ചാണ് ശബരിമല ക്ഷേത്രം പുനഃനിർമ്മിക്കാൻ ആവശ്യമായ മരപ്പണി ഉൾപ്പെടെയുള്ള പ്രവർത്തികൾ നടത്തിയത്. ഈ ഉരുപ്പടികൾ ചെങ്ങന്നൂർ കൊണ്ടുവന്ന് പമ്പയാറിലൂടെ ആറന്മുള റാന്നി വഴി ശബരിമലയിൽ എത്തിക്കാമെന്നാണ് ആദ്യം കരുതിയത്. ഒടുവിൽ ആ വഴി ഒഴിവാക്കി വണ്ടിപ്പെരിയാറിലെ മൗണ്ട് എസ്റ്റേറ്റിൽ നിന്ന് പടിഞ്ഞാറേപ്പാറ വഴി ശബരിമലയിലേക്ക് കൊണ്ടുപോകുകയായിരുന്നു.
1950 മെയ് 20-ാം തീയതി മകര മാസ പൂജ കഴിഞ്ഞ് ശബരിമല നട അടച്ചു. ആ മാസം അവസാനത്തോടെ ധനുമാസ പൂജയ്ക്കായി ക്ഷേത്രം തുറക്കാനും ഒരുക്കങ്ങൾ നടത്താനുമായി മേൽശാന്തി ശബരിമല ക്ഷേത്രത്തിൽ എത്തി. അന്ന് മേൽശാന്തിയായിരുന്നത് പയ്യന്നൂർ സ്വദേശിയായ അബ്ഡി എന്ന് വിളിക്കുന്ന കൃഷ്ണൻ തിരുമേനിയായിരുന്നു. അന്ന് ചാലക്കയം റൂട്ട് നിലവിലില്ലാത്തതിനാൽ മേൽശാന്തി പടിഞ്ഞാറെപ്പാറ വഴിയാണ് ക്ഷേത്ര സന്നിധിയിൽ എത്തിയത്. എന്നാൽ അവിടെ കണ്ട കാഴ്ച മേൽശാന്തിയെയും സംഘത്തെയും ഞെട്ടിച്ചു. ക്ഷേത്രം ഇരുന്ന സ്ഥലത്ത് ക്ഷേത്രം കാണുവാനില്ല. ക്ഷേത്രാവശിഷ്ടങ്ങൾ വെന്ത് വെണ്ണിറായി കിടക്കുന്നു. അന്ന് ഇന്നത്തെ പോലെ ശബരിമലയിൽ സുരക്ഷാ ജീവനക്കാരോ പൊലീസ് ഉദ്യോഗസ്ഥരോ താമസിക്കുന്ന പതിവില്ലായിരുന്നു. പൂജ കഴിഞ്ഞ് നടയടച്ചാൽ അടുത്ത മാസത്തിലെ പൂജയ്ക്ക് ആളുകൾ എത്തുന്നത് വരെ ശബരിമലയും പരിസരവും വിജനമായിരിക്കും. അത്തരം ഒരു സാഹചര്യം നിലനിന്ന സമയത്താണ് ഈ സംഭവം നടക്കുന്നത്.
ശബരിമല ക്ഷേത്രം തീവച്ചു നശിപ്പിച്ച വാർത്ത നാട്ടിൽ ആകെ കോളിളക്കമുണ്ടാക്കി. ജനകോടികൾ പവിത്രമെന്ന് വിശ്വസിക്കുന്ന ഒരു ക്ഷേത്രത്തെ തീവച്ച് നശിപ്പിച്ചിരിക്കുന്നു. ആരാണത് ചെയ്തത്? ചെയ്തത് ആരാണെന്നതിനെക്കുറിച്ച് രാഷ്ട്രീയ അടിസ്ഥാനത്തിലും മത അടിസ്ഥാനത്തിലും ഒക്കെ നിരവധി വാദങ്ങൾ ഉയർന്നുവന്നു. നിലവിലെ മന്ത്രിസഭയെയും സമൂഹത്തിൽ നിലനിന്ന രാഷ്ട്രീയ പരിതസ്ഥിതിയെയുമൊക്കെ ശബരിമല ക്ഷേത്രം തീവച്ചു നശിപ്പിച്ച സംഭവം ഏറെ സ്വാധീനിച്ചു. ജനങ്ങളിലാകെ വല്ലാത്തൊരു അസ്വസ്ഥത പടർന്നു.
ഭക്തജനങ്ങളുടെ ആവശ്യപ്രകാരം ശബരിമല ക്ഷേത്രം തീവച്ചു നശിപ്പിച്ച സംഭവത്തിൽ സർക്കാർ അന്വേഷണം നടത്താൻ തീരുമാനിച്ചു. അന്ന് മദ്രാസ് സർവീസിലായിരുന്ന ഡിഐജി കേശവമേനോനെയാണ് ശബരിമല തീവെയ്പ്പ് കേസ് അന്വേഷിക്കാൻ ചുമതലപ്പെടുത്തിയത്. തീവെയ്പ്പിനെ സംബന്ധിച്ച് പൊലീസിന് വിവരം കിട്ടിയത് 1950 ജൂൺ 16നാണെന്നാണ് കേശവമേനോൻ തയ്യാറാക്കിയ റിപ്പോർട്ടിൽ പറയുന്നുണ്ട്. അക്രമികൾ സ്റ്റോർ മുറിയും അടുക്കളയും പൊളിച്ച് അകത്തുകയറി പാത്രങ്ങൾ പുറത്തേക്ക് എറിഞ്ഞതായും റിപ്പോർട്ടിൽ ചൂണ്ടിക്കാണിക്കുന്നു. ശ്രീകോവിലിൽ ഒരു മണ്ണെണ്ണ റാന്തൽ വിളക്ക് കാണപ്പെട്ടുവെന്ന് മേൽശാന്തി മൊഴി നൽകിയിരുന്നു. സാധാരണ ക്ഷേത്രങ്ങളുടെ ശ്രീകോവിനുള്ളിൽ ഒരിക്കലും മണ്ണെണ്ണ ഉപയോഗിച്ച് പ്രവർത്തിക്കുന്ന വസ്തുക്കൾ കാണപ്പെടാറില്ലായിരുന്നു. അക്രമികൾ ശ്രീകോവിൽ വെട്ടിപ്പൊളിച്ചാണ് അകത്തു കടന്നത്. അത് തെളിയിക്കുന്ന രീതിയിൽ കോടാലി ഉപയോഗിച്ചുള്ള 15 വെട്ടുകളുടെ പാടുകൾ ശ്രീകോവിലേക്ക് പ്രവേശിക്കുന്ന വാതിലിൽ ഉണ്ടായിരുന്നു. അയ്യപ്പൻ്റെ വിഗ്രഹം തകർക്കപ്പെട്ടിരുന്നു. വിഗ്രഹത്തിൻ്റെ തലയും ഇടതു കൈപ്പത്തിയും വിരലുകളും ഛേദിക്കപ്പെട്ടിരുന്നു. വിഗ്രഹത്തിൻ്റെ മുഖത്തും നെറ്റിയിലും വെട്ടിൻ്റെ പാടുകളുമുണ്ടായിരുന്നു. ക്ഷേത്രത്തിനുള്ളിൽ ഉപേക്ഷിച്ചിരുന്ന കോടാലിയുടെ വായ്ത്തലയിൽ പിച്ചളയുടെ അംശങ്ങളും കാണപ്പെട്ടു.
കൂടുതൽ പരിശോധനയിൽ നിന്നും കേശവമേനോൻ ഒരു കാര്യം മനസ്സിലാക്കി. ക്ഷേത്രം തീ വച്ച് നശിപ്പിക്കാൻ കുറഞ്ഞത് 12 മണിക്കൂറെങ്കിലും വേണ്ടിവന്നിരിക്കും. ക്ഷേത്രത്തിൻ്റെ കഴുക്കോലുകൾ പൊതിഞ്ഞ് പിച്ചള തകിടുകളും പതിപ്പിച്ചിട്ടുണ്ട്. അതുകൊണ്ടുതന്നെ തീപിടിപ്പിക്കാൻ കുറഞ്ഞത് രണ്ടും മൂന്നും മണിക്കൂർ പ്രയത്നം എങ്കിലും വേണ്ടിവന്നിരിക്കാമെന്നും കേശവമേനോൻ തൻ്റെ റിപ്പോർട്ടിൽ ചൂണ്ടിക്കാണിക്കുന്നു. മാത്രമല്ല തീ വയ്ക്കുവാനായി നെയ്യും തുണികളും ഉപയോഗിച്ചു എന്നുള്ളതിനും അദ്ദേഹത്തിന് തെളിവുകൾ ലഭിച്ചിരുന്നു.
കാട്ടിലെ ആദിവാസി വിഭാഗത്തിലെ മലമ്പുണ്ടാര സമുദായവാസിയായ നീലകണ്ഠനിൽ നിന്നും ലഭിച്ച വിവരങ്ങൾ അനുസരിച്ച് ഇടവം 17ന് മഴ ആരംഭിച്ചു എന്നും ഇടവും ആറിനും 11നും ഇടയ്ക്ക് ക്ഷേത്രപരിസരത്തുനിന്ന് പുക ഉയരുന്നത് കണ്ടു എന്നുമായിരുന്നു. ഈ വിവരങ്ങളുടെ അടിസ്ഥാനത്തിൽ തീവച്ചത് 1125 ഇടവം ആറിനും 11നും ഇടയ്ക്ക് ആയിരിക്കണമെന്ന് കേശവമേനോൻ റിപ്പോർട്ടിൽ സൂചിപ്പിക്കുന്നു. ഇത് സംബന്ധിച്ച റിപ്പോർട്ട് 1950 ജൂൺ 16ന് പൊലീസിന് ലഭിച്ചിരുന്നു. തുടർന്ന് അന്വേഷണത്തിന് കേശവമേനോനെ നിയമിച്ചത് നാലു മാസങ്ങൾക്ക് ശേഷമായിരുന്നു. സെപ്റ്റംബർ 10ന്. നിരവധി പ്രതികൂല സാഹചര്യങ്ങൾ ഉണ്ടായിരുന്നിട്ടു കൂടി കുറ്റവാളികൾക്കും നേരെ വിരൽചൂണ്ടുന്ന കാര്യത്തിൽ അദ്ദേഹം വിജയിക്കുകയും ചെയ്തു.
അതേസമയം സർക്കാർ ഈ വിഷയത്തിൽ ആദ്യം മുതൽ ഉദസീനത തുടർന്നു വന്നുവെന്നാണ് ആരോപണം ഉയർന്നത്. തീവൈപ്പ് കേസിലെ മേൽ നടപടികളുടെ കാര്യത്തിലും ഈ ഉദാസീനത ഉണ്ടായെന്നും നിരന്തര ആരോപണങ്ങൾ ഉയർന്നിരുന്നു. അതിനിടയിലാണ് അന്നത്തെ ഭരണകക്ഷിയുടെ പ്രമുഖനായ നേതാവും കോൺഗ്രസ് പ്രസിഡൻ്റുമായിരുന്ന സി കേശവൻ്റെ വിവാദമായ ഒരു പ്രസ്താവന പുറത്തുവന്നത്. ഒരു ക്ഷേത്രം നശിച്ചാൽ അത്രയും അന്ധവിശ്വാസം നശിക്കും എന്നുള്ളതായിരുന്നു ആ പ്രസ്താവന. ഇതിനിടയിൽ വീണ്ടും വീണ്ടും ആരോപണങ്ങൾ നിരവധി ഉയർന്നു. അന്നത്തെ ആഭ്യന്തരമന്ത്രി കുറ്റവാളികളെ സംരക്ഷിക്കാൻ നീക്കം നടത്തിയെന്ന് വാർത്തകളും പത്രങ്ങളിൽ വന്നിരുന്നു. ഇക്കാര്യം കേശവമേനോൻ തൻ്റെറിപ്പോർട്ടിൽ ചൂണ്ടിക്കാണിക്കുകയും ചെയ്തിരുന്നു.
പ്രസ്തുത റിപ്പോർട്ട് പ്രസിദ്ധീകരിക്കുകയോ അതിന്മേൽ നടപടികൾ സ്വീകരിക്കാൻ സർക്കാർ ഉത്തരവിടുകയോ ചെയ്തില്ല.. കേരള സംസ്ഥാനം രൂപീകൃതമാവുകയും 1957 ൽ കേരളത്തിൽ ആദ്യമായി കമ്മ്യൂണിസ്റ്റ് പാർട്ടിയുടെ നേതൃത്വത്തിൽ സർക്കാർ അധികാരത്തിലേറുകയും ചെയ്തു. ഈ സാഹചര്യത്തിലാണ് കേശവമേനോൻ റിപ്പോർട്ട് വെളിച്ചം കണ്ടത്. 1987 ഡിസംബർ 13ന് കേശവമേനോൻ റിപ്പോർട്ട് കേരള നിയമസഭയുടെ മേശപ്പുറത്ത് വച്ചു. അതോടെ പ്രസ്തുത റിപ്പോർട്ട് നിയമസഭ രേഖകളുടെ ഭാഗമായി മാറി.
കോട്ടയത്തുനിന്നും അക്കാലത്ത് ദേശബന്ധു എന്ന പേരിൽ ഒരു ദിനപത്രം പ്രസിദ്ധീകരിച്ചിരുന്നു. 1957 ഡിസംബർ 14ന് ദേശബന്ധു ദിനപത്രത്തിൽ ഈ റിപ്പോർട്ടിൻ്റെ പൂർണ്ണരൂപം പ്രസിദ്ധീകരിച്ചു. എന്നാൽ റിപ്പോർട്ടിന്മേൽ മേൽ നടപടികൾ ഒന്നും ഉണ്ടായില്ലെന്നുള്ളതു ഇവിടെ ശ്രദ്ധേയമാണ്.
കാലം മാറിയെങ്കിലും ശബരിമലയുടെ സുരക്ഷ അധികാരികൾക്ക് എന്നും തലവേദനയാണ്. അതുകൊണ്ടുതന്നെയാണ് മന്ത്രി കെ മുരളീധരൻ തന്റെ ആശങ്കകൾ കെ ജയകുമാറുമായി പങ്കുവയ്ക്കുന്നത്. ഒരു ശബരിമല മണ്ഡലകാലമാണ് പിണറായി വിജയൻ സർക്കാരിനെ കേരളത്തിന് അപ്രിയനാക്കിയത്.അയ്യപ്പ ഭക്തനായ മന്ത്രി കെ മുരളിധരനെ സംബന്ധിച്ചടത്തോളം ശബരിമല നെഞ്ചിലെ തീയാണ്. കാത്തുസൂക്ഷിച്ചേ മതിയാകൂ.
https://www.facebook.com/Malayalivartha






















